ފުޅާ ދާއިރާއެއްގައި ޑޮކްޓަރީ ބޭސް އިމްޑޯޓްކޮށް ވިއްކާ ”މައި ކެމިސްޓް“ ގެ ވެރިޔާ ހުސެއިން އިރުފާން، ގަސްދުގައި ޓެކްސް އަށް މަކަރު ހަދާ ކަމަށް ފާހަގަވެފައި ވާތީ އޭނާއާ ދެކޮޅަށް ދައުވާކޮށްދޭން އެދި މޯލްޑިވްސް އިންލޭންޑް ރެެވެނިއު އޮތޯރިޓީ، މީރާ އިން ޕްރޮސިކިއުޓާ ޖެނެރަލްގެ އޮފީހަށް ހުށަހަޅައިފި އެވެ.
އެ އިދާރާ އިން މިއަދު ނެރުނު ބަޔާނެއްގައި ބުނީ، އިރުފާން ގަސްދުގައި ޓެކްސް އަށް މަކަރު ހަދާ ކަމަށް ތުހުމަތު ކުރެވޭތީ، އެ ކަމާ ގުޅިގެން ޖިނާއީ ތަހުގީގެއް ހިންގާފައިވާ ކަމަށެވެ. އެގޮތުން 2018 އަދި 2019 އަށް އިރުފާން ހުށަހަޅާފައިވާ ބީޕީޓީ ބަޔާންތަކާއި 2020 އަށް ހުށަހަޅާފައިވާ އިންކަމް ޓެކްސް ބަޔާނުގައި ދޮގު މައުލޫމާތު ހިމަނާފައިވާ ކަމަށާއި އެކަން އޭނާ ކޮށްފައިވަނީ ޓެކްސް ދެއްކުމުން ގަސްދުގައި އެއްކިބާވުމުގެ ނިޔަތުގައި ކަމަށެވެ،
އިރުފާންގެ ހޯލްސޭލް ވިޔަފާރި ކަމަށްވާ ”މައި ކެމިސްޓް ގޯޑައުން“ އާ ގުޅޭ އާމްދަނީ އެއްވެސް ވަރަކަށް 2018-2020 އަށް ހުށަހަޅާފައިވާ ޓެކްސް ބަޔާންތަކުގައި ހިމަނާފައި ނުވާ ކަމަށްވެސް މީރާއިން ބުންޏެވެ.
މީރާއިން ބުނި ގޮތުގައި އެވްރެޖްކޮށް އަހަރަކު 53 މިލިއަން ރުފިޔާގެ އާމްދަނީ މީރާ އަށް ރިޕޯޓް ކޮށްފައި ނުވާއިރު، ޖުމްލަ 12 މިލިއަނަށް ވުރެ ގިނަ ރުފިޔާ އިތުރަށް ޓެކްސްގެ ގޮތުގައި ދައްކަން ޖެހޭ ކަން އޮޑިޓުން ހާމަވެފައިވާ ކަމަށެވެ. އެ ފައިސާ ދައްކަން މީރާއިން މިހާރު ވަނީ އޭނާއަށް އަންގައިފައެވެ.
މައި ކެމިސްޓުގެ ތިން ފިހާރައެއް މާލޭގައި ހުރެއެވެ.
