ބަނޑުހިކުމަކީ ކޮބާ؟

އާންމުގޮތެއްގައި ބޮޑުކަމުދިއުމުގެ އާދަ އަދި ދެވޭ މިންވަރު އެކި މީހުންނަށް ތަފާތެވެ. ބައެއްމީހުން ދުވާލަކު އެއްފަހަރު، ނުވަތަ ދެފަހަރު ނުވަތަ ތިން ފަހަރު ބޮޑުކަމުދާން ޖެހޭއިރު، އަނެއްބައި މީހުންނަށް 2 ދުވަހުން އެއްފަހަރު ދެވެއެވެ. މަދުން ނަމަވެސް ހަފްތާއަކު ގިނަވެގެން 3 ފަހަރު ބޮޑުކަމުދާންޖެހޭ މީހުން ވެސް އުޅެއެވެ. ނަމަވެސް އުދަނގޫތަކެއް މެދުވެރި ނުވާކަމުގައި ވާނަމަ މިގޮތަށް ބޮޑުކަމުދާން ޖެހުމަކީ މައްސަލައެއް ނޫނެވެ. ބޮޑުކަމުދާންޖެހޭ ނިސްބަތް، މީހާގެ އުމުރާ، ކާންބޭނުންކުރާ ކާނާ، ހަރަކާތްތެރިވެ އުޅޭ މިންވަރާ އަޅާ ރިއާޔަތްކުރާ އިރު ވެސް އެކަކު އަނެކަކާ ތަފާތުވުމަކީ ވެދާނެ ގޮތެކެވެ.

ބަނޑުހިކުން ކިޔަނީ ޢާންމުކޮށް ދެވޭ ވަރަށް ވުރެ މަދުން ބޮޑުކަމުދާން ޖެހުމުން، ނުވަތަ ބޮޑުކަމުދާތަކެތި ހަރުކޮށް ހުރުމުގެ ސަބަބުން ބޮޑުކަމުދާން އުނދަގޫވުމުން، ދެވޭ މިންވަރު މަދުވުމަށް ނިސްބަތްކޮށެވެ. 

އާންމު ނަޒަރަކުން ބަލާއިރު 3 ދުވަހަށްވުރެ ގިނަ ދުވަހު ބޮޑުކަމުނުދެވި ހުރެއްޖެނަމަ، ގޮހޮރާ، ފުރަގަސް ފަރާތުގައި ޖަމާވެފައި ހުންނަ ނަޖިސް ހަރުވެ، ދައުރުވުމަށް އުދަނގޫވާނެ އެވެ.

ބަނޑުހިކެނީ ކީއްވެ؟

ބަނޑުހިކުން ކުރިމަތިކުރުވާ އެންމެ މައިގަނޑު އެއްސަބަބަކީ ބޮޑުކަމުދާން ޖެހޭ ހިނދު، ނުވަތަ އެކަމަށް އާދަވެފައިވާ ވަގުތު ބޮޑުކަމު ނުގޮސް ހިފަހައްޓައިގެން ހުރުމެވެ. މިގޮތަށް ހުރުމުން ނަޖިސް ގޮހޮރުގައި ހަރުލާގޮތްވެ ނުވަތަ ޖަމާވާގޮތް ވެއެވެ. މިހެން ހަރުލާހުރުމުން އެއިން ފެން ހަށިގަނޑަށް ދެމި، ނަޖިސްހިކި، ހަރުވެ، ބޭރުކުރަން އުދަގޫވާގޮތް ވެއެވެ.

ބަނޑުހިކުން މެދުވެރިވާ ދެވަނަ ސަބަބަކީ ބޮޑުގޮހޮރުގެ ހަރަކާތް ހިނގުން ލަސްވުމެވެ. ގޮހޮރުގެ ހަރަކާތް ހިގުން ލަސްވުމަށް މެދުވެރިވާ ސަބަބުތަކެއް ވެއެވެ. އޭގެ ތެރޭގައި ފައިބަރ އެކުލެވޭ ކާނާ ބޭނުންކުރުން މަދުވުމާއި، ޕްރޮޓީން އެކުލެވޭ ކާނާ ( މަސް، ބިސް ފަދަ ) ބޭނުންކުރުން ގިނަވުމާއި، އަދި ދިޔާތަކެތި ބުއިންމަދުވުން ފަދަ ކަންތައްތައް ހިމެނެއެވެ.

ބަނޑުހިކުން މެދުވެރިކުރުވާ އެހެނިހެން ބައެއް ސަބަބަތުކަކުގެ ތެރޭގައި، ދިރިއުޅުމުގައި ދިމާވާ ފިއްތުއްތަކާ، ހާސްވެ، ފިކުރުބޮޑުވުން، މާޔޫސްވުން، ހެލިފެލިވެ އުޅުން މަދުވުން، މާބަނޑުވުން، ބަރާބަރަށް ނުކެއުން، ބައެއް ބާވަތުގެ ބޭސް ބޭނުންކުރުންފަދަ ކަންކަން ހިމެނެއެވެ. އަދި ހަކުރު ބަލި، ތައިރޮއިޑް ދަށްވުން، އިރިޓަބަލް ބަވަލް ސިންޑްރޯމް، އަދި ފުރަގަސްފަރާތު ބައްޔާ، ގޮހޮރުގެ ކެންސަރު އަދި މިނޫނަސް އެހެން ބަލިތައް ޖެހުމުން ބަނޑުހިކުން ކުރިމަތި ކުރުވައެވެ. ބަނޑު ފަސޭހަކުރުމަށްދޭ ބޭސް މާގިނައިން ބޭނުންކުރުމަކީ އޭގެ ސަބަބުން ގޮހޮރުގެ މަސްތަކުގެ ބާރުދޫވެ، ގޮހޮރުގެ ހަރަކާތަށް ބަދަލު ގެނެސް ބަނޑުހިކުން މެދުވެރި ކުރުވާނެ ކަމެކެވެ.

ބަނޑުހިކުން މެދުވެރިވުމުން ފެނިދާނެ އަލާމާތްތަކަކީ ކޮބާ؟

ބަނޑުގައި ރިއްސުން

ބަނޑުގައި ވައިހެނދި ފުފުން

މާގިނައިން ވައިބޭރުކުރެވުން

ކާހިތްނުވުން

މޭނުބައިކުރުން

ހޮނޑުލުން

ބޮލުގައި ރިހުން

ބޮޑުކަމުދާއިރު ބާރުލާން ނުވަތަ ހިފާލަންޖެހުން

ބޮޑުކަމު ނަޖިސް ހަރުކޮށްހުރުން

ބޮޑުކަމު ނަޖިސް ބޭރުވާ މިންވަރު މަދުވުން

މީގެ އިތުރުން ބައެއް ފަހަރު:-

ބޮޑުކަމުދެވެން އުޅޭހެން އިހްސާސްކުރެވުން

ބޮޑުކަމުދެވުނަސް ގޮހޮރު ހުސްނުވެ ހުންނަހެން ހީވުން

ބޮޑުކަމުދިއުމުގެ ތެރޭގައި ފުރަގަސްފަރާތުގައި ރިއްސުން

ފުރަގަސްފަރާތު ދޮރުގެ ވަށައިގެންވާ ހިސާބުގައި، ހިރުވައި، ފާރުއުފެދޭގޮތްވުން