ވިހި ވަނަ ރައްޔިތުންގެ މަޖިލީހުގެ ރައީސް ކަމަށް ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ އަދި މަޖިލީހުގެ ނައިބު ރައީސް ކަމަށް ދިއްގަރު ދާއިރާގެ މެންބަރު އަހުމަދު ނާޒިމް އިންތިހާބުކޮށްފިއެވެ.
މަޖިލީހުގެ ރައީސް ކަމަށް އަބްދުއްރަހީމްގެ އިތުރުން ދެން ވާދަކުރެއްވީ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް އެވެ.
އެގޮތުން 92 މެމްބަރުންގެ ބައިވެރިވުމާއިއެކު ކުރިއަށްދިޔަ ވޯޓުގައި މަޖިލީހުގެ ރައީސްކަމަށް އަބްދުއްރަހީމް އަށް 71 މެމްބަރުންގެ ވޯޓުދީފައި ވާއިރު، ރައީސް ކަމަށް ނާޒިލް އިންތިހާބު ކުރަން 14 މެމްބަރުން ވޯޓު ދީފައި ވާއިރު، ބާތިލު 7 ވޯޓުވެސް ހިމެނެއެވެ.
މީގެ އިތުރުން މަޖިލީހުގެ ނައިބު ރައީސްގެ މަޤާމު 80 މެންބަރުންގެ ވޯޓާއެކު ދިއްގަރު ދާއިރާގެ މެންބަރު ނާޒިމްއަށް ލިބިވަޑައިގެންނެވި އިރު، އޭނާއާ ވާދަކުރެއްވީ މަރަދޫ ދާއިރާގެ އެމްޑީޕީގެ މެމްބަރު އަހުމަދު ދީދީ އަށް ލިބިވަޑައިގެންނެވީ 12 ވޯޓެވެ.
ވިހި ވަނަ މަޖިލީހަށް 93 މެންބަރުން އިންތިހާބުކޮށްފައިވާއިރު، އެ މަޖިލީހުގެ ސުޕަ މެޖޯރިޓީ ހޯދާފައި ވަނީ ސަރުކާރު ހިންގާ މައި ޕާޓީ ޕީއެންސީންނެވެ.
