ޒަކާތުގެ މަޢުލޫޢުއަށް ރާއްޖޭގެ އެކި ކަންކޮޅުތަކުގައި މިއަދު ދަރުސް ބާއްވަން ނިންމައިފިއެވެ.
އިސްލާމިކް މިނިސްޓްރީން ބުނީ މިއަދުގެ ހުކުރު ޚުތުބާ ޒަކާތުގެ މައުޟޫއަށް ޚާއްސަ ކުރުމުގެ އިތުރުން މަޣުރިބު ނަމާދަށްފަހު މުދަލު ޒަކާތުގެ އުސޫލުތަކާއި މުހިއްމުކަމާ ބެހޭ ގޮތުން ދީނީ ދަރުސްތައް ބާއްވަން ހަމަޖެހިފައިވާ ކަމަށެވެ.
އެގޮތުން މާލޭގެ މިސްކިތްތަކުގެ އިތުރުން ރާއްޖޭގެ އެކި ކަންކޮޅުތަކުގައިވެސް މުދަލު ޒަކާތާއި ގުޅޭ ދަރުސް މިއަދު މަޣުރިބު ނަމާދަށްފަހު އޮންނާނެ ކަމަށް މިނިސްޓްރީން ބުނެފައި ވެއެވެ.
އިސްލާމިކް މިނިސްޓްރީން ބުނީ މި ދަރުސްތަކުގެ މަޤްޞަދަކީ، މުޖުތަމަޢުގެ ތެރޭގައި އިޖްތިމާޢީ ރައްކާތެރިކަމާއި ހަމަހަމަކަން ކުރިއެރުވުމުގައި އިސްލާމީ އުސޫލްތަކަށް ބާރުއަޅައި، މުދަލު ޒަކާތުގެ މުހިންމުކަމަށް ހޭލުންތެރި ކުރުވުން ކަމަށެވެ.
އިސްލާމިކް މިނިސްޓްރީން ވަނީ މިއަދު ބާއްވާ ދަރުސްތަކުގައި ވީހާވެސް ގިނަ ފަރާތްތަކުން ބައިވެރިވުމަށް އިލްތިމާސް ކޮށްފައެވެ.
މި ދަރުސްތަކުގައި ބައިވެރިވުމަށް ބާރުއަޅަނީ މީގެ ސަބަބުން ޒަކާތާއި ގުޅޭ ޢިލްމު އިތުރުކޮށް، ޒަކާތުގެ ވާޖިބު އަދާކުރުމަށް ބާރުއެޅުމަށް ކަމަށް އެ މިނިސްޓްރީން ހާމަކުރެއެވެ.
One Response
موضوع ތާނައަކުރުން ލިޔާނަމަ ލިޔާނީ، “ މަޥްޟޫޢު.“ މިގޮތަށް.