މި އަހަރުގެ އަޟްހާ އީދު ފާހަގަކުރުމަށް ޝައުގުވެރިވާ ރަށްތަކުން އެކަމަށް އެދި ޕްރޮޕޯސަލް ހުށަހެޅުމުގެ ފުރުސަތު ހުޅުވާލައިފި އެވެ.
ކަލަންޑަރުގައިވާ ގޮތުން މި އަހަރުގެ އަޟްހާ އީދު ދުވަހަކީ ޖޫން މަހުގެ 17 ވަނަ ދުވަހެވެ.
ދިވެހި ބަހާއި ތާރީހާއި ސަގާފަތާ ބެހޭ މިނިސްޓްރީން ކުރި އިއުލާނެއްގައި ބުނީ އެ މިނިސްޓްރީއާ ގުޅިގެން މި އަހަރުގެ ބޮޑު އީދު ފާހަގަ ކުރުމަށް ޝައުގުވެރިވާ ރަށްތަކުން އެކަމަށް އެދި ޕްރޮޕޯސަލް ހުށަހެޅުމުގެ ފުރުސަތު ހުޅުވާލާ ކަމަށެވެ.
މި އަހަރުގެ ބޮޑު އީދުގެ ހަރަކާތްތައް ތިން ރަށެއްގައި ފާހަގަކުރުމަށް ނިންމާފައިވާ ކަމަށް އެ މިނިސްޓްރީން ބުނެފައި ވެއެވެ.
އެގޮތުން އީދު ފާހަގަ ކުރުމަށް ރަށްތައް ކަނޑަ އަޅާނީ އެންމެ ރަނގަޅު ތިން ޕްރޮޕޯސަލް ހުށަހަޅާ ރަށްތައް ބެލުމަށް ފަހު ކަމަށާއި ބޮޑު އީދު ފާހަގަ ކުރާނެ ރަށެއް ކަނޑައެޅުމުގައި ބަލާނީ އެ ރަށަކުން އީދުގައި ކުޅޭނެ ކުޅިވަރުތަކުގެ މައްޗަށް ކަމަށް އެ މިނިސްޓްރީން ބުނެފައި ވެއެވެ.
ހަމަ އެހެންމެ ކައުންސިލުން އެކަމަށް ކުރާނެ ހަރަދުތަކާއި އަގަކާ ނުލައި އެ ރަށަކުން ކުރާނެ ކަންތައްތަކަށް ކަމަށް އެ މިނިސްޓްރީން ބުނެފައި ވެއެވެ.
އަދި އެކަމަށް ބޭނުން ވާނެ ފައިސާގެ އަދަދު ވެސް ޕްރޮޕޯސަލްގައި ހިމަނަންޖެހޭނެ ކަމަށް މިނިސްޓްރީން ބުނެފައިވެއެވެ.
އެހެން ކަމުން އެކަމަށް ޝައުގުވެރިވާ ފަރާތްތަކުން، އަންނަ މަހުގެ 9 ވަނަ ދުވަހުގެ މެންދުރު 1:00 ގެ ކުރިން އެ މިނިސްޓްރީއަށް ޕްރޮޕޯސަލް މެއިލް ކުރުމަށް ވަނީ އެދިފަ އެވެ. [email protected]
މީގެ އިތުރުން ދިވެހި ބަހާއި ތާރީހާއި ސަގާފަތާ ބެހޭ މިނިސްޓްރީން ވަނީ ޕްރޮޕޯސަލްތަަކަށް މާކްސް ދޭނެ ގޮތުގެ ލިޔުން ވެސް އާންމުކޮށްފަ އެވެ. އެ މިނިސްޓްރީން ބުނީ އިސްރަށްވެހިންނަށް ބައިވެރިވެވޭނެ ކުޅިވަރުތައް ހިމެނުމާއި ދިވެހި ސަގާފަތް ދައްކުވައިދޭ ކުޅިވަރު ހިމަނާފައިވާނަމަ މާކްސް ލިބޭނެ ކަމަށެވެ.
