ރާއްޖޭގައި އާޓްސް ސްކޫލެއް ތަރައްޤީ ކުރުމަށް ޝައުގުވެރިކަން ފާޅު ކުރުމުގެ ފުރުސަތު ހުޅުވާލައިފިއެވެ.
އިކޮނޮމިކް މިނިސްޓްރީން ގެޒެޓުގައި އާންމުކުރި އިޢުލާނުގައި ބުނީ ރާއްޖޭގައި އިންޓަނޭޝަނަލް އާޓް ސްކޫލެއް ތަރައްޤީ ކުރަން ބޭނުންވާ ކަމަށެވެ.
އަދި އެ ސްކޫލު ތަރައްޤީ ކުރާނީ މައިގަނޑު ތިން ކަމެއް ފޯކަސްކޮށްގެން ކަމަށް ބުނެފައި ވެއެވެ.
އެގޮތުން އިކޮނޮމިކް މިނިސްޓްރީން ބުނީ އާޓްސް ދާއިރާގައި މަސައްކަތް ކުރުމަށް އިތުރު މީހުން އުފައްދާ ހިތްވަރު ދިނުމާއި، ތަމްރީނާއި ޕްރޮފެޝަނަލް ޑިވެލޮޕްމަންޓް ތަމްރީނު ދިނުމާއި، އާންމުންނަށް ހުޅުވާލެވިފައިވާ އިންޓަގްރޭޓެޑް ގެލެރީތަކާއި މިއުޒިއަމްތައް ގާއިމް ކުރުން ހިމެނޭ ކަމަށެވެ.
އިކޮނޮމިކް މިނިސްޓްރީން ބުނީ ވިޝުއަލް އާޓްސް އެންޑް ކްރާފްޓްސް، އޯޑިއޯ ވިޝުއަލް އަދި އިންޓަރެކްޓިވް މީޑިއާ، ޓެކްނޮލޮޖީ އަދި ޑިޒައިންގެ ދާއިރާތަކުގެ ކޯސްތައް އެ ސްކޫލްގައި ހިންގާނެ ކަމަށެވެ. އަދި މި ސްކޫލްގައި ހޮސްޓެލް އެކޮމޮޑޭޝަންތައް ޤާއިމުކުރާނެ ކަމަށް އެ މިނިސްޓްރީން ބުނެފައި ވެއެވެ.
އިކޮނޮމިކް މިނިސްޓްރީން ވަނީ މި މަޝްރޫއު ހިންގަން ޝައުގުވެރިވާ ހުރިހާ ފަރާތްތަކުން މި ފެށޭ ޖޫން މަހުގެ 30 ވަނަ ދުވަހުގެ ކުރިން އީމެއިލް މެދުވެރިކޮށް އެ މިނިސްޓްރީއަށް ހުށަހެޅުމަށް އެދިފައެވެ.
