ޣައްޒާ ހަނގުރާމަ ފެށުނުފަހުން ލުބުނާނުގެ ހިޒްބުﷲ އިން އިޒްރޭލަށް ދޭ އެންމެ ބޮޑު ހަމަލާ ފަށާދައިވާކަމަށް އެ މުޖާހިދުންގެ ޖަމިއްޔާއިން ހާމަކޮށްފިއެވެ.
ހިޒްބުﷲ އިން އިޒްރޭލަށް ދޭންފަށާފައިވާ އެންމެ ބޮޑު ހަމަލާގެ މައުލޫމާތު އެ ޖަމާއަތުން ހާމަކޮށްފައިވާއިރު، އިޒްރޭލު ސިފައިން ދިން ހަމަލާއެއްގައި ދެކުނު ލުބުނާނުގައި ހުރި ހިޒްބުﷲ ޖަމާއަތަށް ނިސްބަތްވާ މުޖާހިދަކު ޝަހީދުކޮށްލާފައިވާކަމަށް އެ ޖަމިއްޔާއިން ބުނިތާ މާގިނަ ދުވަސްތަކެއް ނުވެއެވެ.
މިގޮތުން، އެ ޖަމާއަތުން ބުނެފައިވަނީ ޝަހީދުކޮށްލެވުނު މުޖާހިދުގެ މަރުގެ ބަދަލުގައި، އިޒްރޭލުގެ އޭކަރ ސިޓީގެ އުތުރުން އޮންނަ އަސްކަރީ ބޭސްތަކަށް ޑްރޯން ހަމަލާތައް ދޭން ފަށާފައިވާކަމަށެވެ.
މީގެއިތުރުން، އޭކަރ އާއި ނަހާރިއްޔާ އާއި ދެމެދުގައި އޮންނަ ދެ ބޭސް އަކަށްވެސް ޑީކޮއީ އަދި އެކްސްޕްލޯސިވް ޑްރޯން ބޭނުންކޮށްގެން ހަމަލާ ދޭންފަށާފައިވާނެކަމަށް ވެސް އެ ޖަމާއަތުން އަންގާރަ ދުވަހު ނެރުނު ބަޔާނެއްގައި ބުނެފައިވެއެވެ.
