ސިޔާސީ ވާދަވެރިކަން ދޫކޮށްލުމަށްފަހު، ދިވެހި ޤައުމުގެ ކުރިއެރުމަށް މަސައްކަތް ކޮށްދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެދިވަޑައިގެންފިއެވެ.
ރައީސް މިގޮތަށް އެދިވަޑައިގެންނެވީ މަޖިލިސް އިންތިޚާބުގައި ސަރުކާރަށް ތާއީދުކުރައްވާ ކެންޑިޑޭޓުންނަށް ލިބުނު ބޮޑު ކާމިޔާބީއާ ގުޅިގެން އާޓިފިޝަލް ބީޗްގައި މިރޭ ބޭއްވި ޚާއްސަ ހަފްލާގައި ވާހަކަފުޅުދައްކަވަމުންނެވެ.
އެގޮތުން ސިޔާސީ ވާދަވެރިކަން ދޫކޮށްލުމަށްފަހު، ޤައުމުގެ ތަރައްޤީއަށް ކުރާ މަސައްކަތުގައި ބައިވެރިވުމަށް ރައީސް ވަނީ ސިޔާސީ ލީޑަރުންނަށް ދައުވަތު އަރުވާފައެވެ.
ހަމަ އެހެންމެ ސިޔާސީ ކުލައަށް ބަލައިގެން އެއްވެސް ރައްޔިތަކާމެދު ތަފާތު ކުރުން ނުގެންގުޅުއްވާނެ ކަމަށް ވެސް ރައީސް ވަނީ ވިދާޅުވެފައެވެ.
ރައްޔިތުން ކުރި އިތުބާރާއެކު އިހްލާސްތެރިކަމާ އެކުގައި މަސައްކަތް ކުރާނެ ކަން ފާހަގަކުރައްވާ ރައީސް ވިދާޅުވީ ނަތީޖާ ނެރުމަށް ކުރާ މަސައްކަތުގެ ސްޕީޑް ދެން ފެންނާނީ ކުރިއަށް ވުރެ ބާރު ސްޕީޑެއްގައި ކަމަށެވެ.
”ދެން އޮތީ މަސައްކަތްކުރުން، ވޭތުވެދިޔަ 5 މަސް ދުވަހުގެ ތެރޭގައި ވަރަށް ދަތި އުނދަގުލުގެ ތެރޭގައި ނަމަވެސް އަޅުގަނޑުމެންނަށް ކޮންމެވެސް ވަރަކަށް ނަތީޖާ ނެރެވުނު“ ރައީސް ވިދާޅުވިއެވެ.
ރާއްޖޭގެ އިޤްތިޞާދު ކޮޅަށްޖެހުމަށް ފާއިތުވި ފަސް މަހު ކުރެވުނު މަސައްކަތް ގިނަކަން ފާހަގަކުރައްވާ ރައީސް ވިދާޅުވީ ކުރިއަށް ދެން އޮތީ ރައްޔިތުންގެ މަޖިލީހުގެ ތެރެއިން އެކަމަށް ބޭނުންވާ ހުރިހާ މަގެއް ފަހި ކުރުން ކަމަށެވެ.
އިއްޔެ ބޭއްވި މަޖިލިސް އިންތިޚާބުގެ ވަގުތީ ނަތީޖާ ދައްކާގޮތުން ސަރުކާރު ހިންގާ މައި ޕާޓީ ޕީއެންސީގެ ކެންޑިޑޭޓުން ވަނީ 20 ވަނަ ރައްޔިތުންގެ މަޖިލީހުން 66 ގޮނޑި ކާމިޔާބު ކޮށް ސަރުކާރަށް މަޖިލީހުގެ ސުޕަ މެޖޯރިޓީ ކަށަވަރުކޮށްދީފައެވެ.
