ވިހި ވަނަ ރައްޔިތުންގެ މަޖިލީހަށް މެންބަރުން އިންތިޚާބު ކުރުމަށްޓަކައި މިއަދު ކުރިއަށް ގެންދާ އިންތިޚާބުގެ ވޯޓު ލުމަށް ހުރަސް އެޅުމާއި ގުޅިގެން 2 މީހަކު ހައްޔަރުކޮށްފިއެވެ.
ފުލުހުން ބުނީ މަޖިލިސް އިންތިޚާބާއި ގުޅިގެން ކުރިއަށް ގެންދާ އޮޕަރޭޝަން ބްލޫ ޓައިޑްގެ ތެރެއިން މިހާތަނަށް 3 މީހަކު ހައްޔަރު ކޮށްފައިވާ ކަމަށެވެ.
އެގޮތުން ވޯޓު ކަރުދާސް ދެއްކި މައްސަލައަކާ ގުޅިގެން މާލެ ސަރަހައްދުން އެކަކު ހައްޔަރު ކޮށްފައިވާ ކަމަށް ފުލުހުން ބުނެފައި ވެއެވެ. އަދި ވޯޓުލާ މަރުކަޒުގެ މަސްލަހަތު ނަގާލައި ވޯޓުލުމަށް ހުރަސްއެޅި މައްސަލައަކާ ގުޅިގެން ގދ. ފިޔޯރީއިން ދެ މީހަކު ހައްޔަރު ކޮށްފައިވާ ކަމަށް ފުލުހުން ބުނެފައި ވެއެވެ.
މަޖިލިސް އިންތިޚާބުގެ ވޯޓުގެ ކަންކަން ކުރިއަށް ދާއިރު ސަލާމަތާއި ރައްކާތެރިކަން ކަށަވަރުކޮށް އޮމާންކަމާއެކު ކުރިއަށްގެންދިއުމަށް ކުރާ މަސައްކަތްތަކުގައި މާލެއާއި ރަށްރަށުގައި ވޯޓުލާ މަރުކަޒު ތަކުގައި ފުލުހުން އަންނަނީ ހަރަކާތްތެރި ވަމުންނެވެ.
މީގެ އިތުރުން މި އިންތިޚާބާއި ގުޅިގެން ފުލުހުންގެ ޚިދުމަތުގެ އޮޕަރޭޝަނަލް ސްޓޭޓަސް އެންމެ މަތީ ދަރަޖަކަމަށްވާ ލެވަލް 3 އަށް ވަނީ މަތިކުރެވިފައެވެ.
