އައްޑޫ އިކުއެޓޯރިއަލް ހޮސްޕިޓަލް (އޭއީއެޗް) އަށް މޯލްޑިވްސް ޕޯޓްސް ލިމިޓެޑުން ދެ ސްޓޯރޭޖް ކޮންޓޭނަރު ހަދިޔާ ކޮށްފިއެވެ.
މިކަން ހާމަކޮށް އެމްޕީއެލްއިން ކުރި ޕޯސްޓެއްގައި ބުނީ އައްޑޫ އޭއީއެޗް އަށް ދިމާވެފައިވާ ސްޓޯރޭޖްގެ ދަތިކަން ހައްލުކުރުމަށް އެހީތެރިވުމުގެ ގޮތުން އެ ކުންފުނީގެ ސީއެސްއާރްގެ ދަށުން އެ ހޮސްޕިޓަލަށް ދެ ސްޓޯރޭޖް ކޮންޓޭނަރު ހަދިޔާކޮށްފައިވާ ކަމަށެވެ.
އެ ކުންފުނިން އޭއީއެޗް އަށް ހަދިޔާ ކޮށްފައި ވަނީ 40 ފޫޓުގެ ދެ ސްޓޯރޭޖް ކޮންޓޭނަރެވެ.
މިގޮތުން އެ ސްޓޯރޭޖް ކޮންޓޭނަރުތައް އައްޑޫ އީކުއެޓޯރިއަލް ހޮސްޕިޓަލަށް ރަސްމީކޮށް ހަދިޔާކުރެއްވުމަށް އެމްޕީއެލްގެ ސީއީއޯ މުހައްމަދު ވަޖީހް އާއި އެ ކުންފުނީގެ ބައެއް އިސްވެރިން ވަނީ އައްޑޫ އީކުއެޓޯރިއަލް ހޮސްޕިޓަލްގެ ސީއީއޯ ޑރ. އިބްރާހިމް ޔާސިރު އަހްމަދު އަދި އެ ހޮސްޕިޓަލްގެ އިސްވެރިންނާ ވަނީ ބައްދަލު ކުރައްވާފައެވެ.
ޓާޝަރީ ފެންވަރަށް ތަރައްޤީކޮށްފައިވާ އައްޑޫ އެކުއެޓޯރިއަލް ހޮސްޕިޓަލަކީ އެ ސަރަހައްދުގެ ގިނަ ރައްޔިތުން ޚިދުމަތް ހޯދަމުން އަންނަ ހޮސްޕިޓަލެކެވެ.
