ކެފޭއަކަށް ވަދެ އެ ތަނުގެ މުވައްޒަފެއްގެ އަތުން ފައިސާ ފޭރެން އުޅުނު މައްސަލައެއްގައި މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ 26 އަހަރުގެ ދިވެހި ފިރިހެނެކެވެ.
އޭނާގެ ބަންދާމެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން ވަނީ 10 ދުވަހަށް އޭނާ ބަންދުކުރަން އަމުރުކޮށްފައެވެ.
ކޯޓުން ނެރުނު އަމުރުގައިވާ ގޮތުން ހުއްދައެއް ނެތި އޭނާ ވަނީ ބަންދުކޮށްފައި ހުރި ކެފޭއެއްގެ ތެރެއަށެވެ. އެގޮތުން އެތަނަށް ވަދެ އެ ތަނުގައި ހުރި މުވައްޒަފަކަށް ބިރުދައްކައި ފައިސާ ފޭރެން އުޅުނުކަމަށް ފުލުހުންނާ ހަވާލާދީ ކޯޓު އަމުރުގައި ބުނެފައިވެއެވެ.
އޭނާއަކީ މަސްތުވާތަކެއްޗާއި ވައްކަމާއި ފޭރުމުގެ ކުށުގެ ރެކޯޑް ގިނަ މީހެކެވެ.
