ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުން ހުއްޓުވުމަށް އެންޓި ޑިފެކްޝަން ގާނޫނު އެކުލަވައިލުމުގެ މަސައްކަތް އެމްޑީޕީން ފަށައިފިއެވެ.
އެމްޑީޕީގެ ޕާލަމެންޓްރީ ގުރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ހުޅުމާލެ ދާއިރާގެ މެންބަރު ޢަލީ ނިޔާޒް ވިދާޅުވީ ސަރުކާރުތައް ބަދަލުވާއިރު ރައްޔިތުންގެ މަޖިލީހުން ވެސް އެކަން ފެންނަ ކަމަށާއި މަޖިލީހަށް އިންތިޚާބުވާ އަދަދަށް އެއްވެސް އިރެއްގައި މެންބަރުން ހިފެހެއްޓިފައިނުވާ ކަމަށެވެ.
އެގޮތުން މުސްތަގުބަލުގައި މަޖިލިސް އިސްލާހުކުރުމަށް ކުރާ މަސައްކަތެއްގެ ގޮތުން އެމްޑީޕީއާ ރަހުމަތްތެރި ޕާޓީތަކާއެކު އެންޓި ޑިފެކްޝަން ގާނޫނެއް އެކުލަވައިލަން މަޝްވަރާކުރަމުންދާ ކަމަށް ނިޔާޒް ވިދާޅުވިއެވެ.
މީގެ ދެރެއެއް ކުރިން އެމްޑީޕީގެ 12 މެންބަރަކާއި އަދި ކުރިން އެ ޕާޓީގައި ހުންނެވުމަށްފަހު ދުވަސްކޮޅެއް ކުރިން އެ ޕާޓީން ވަކިވެވަޑައިގެންނެވި މެންބަރަކު ވަނީ ޕީއެންސީއަށް ސޮއިކުރައްވައިފައެވެ.
ނިޔާޒް ވިދާޅުވީ ގާނޫނު އެކުލަވައިލަން މަސައްކަތް ފެށީ އެެ މެންބަރުން ވަކިވެވަޑައިގަތުމުން ނޫން ކަމަށެވެ.
