ނަމާދުގައި ޚުޝޫޢަތްތެރިވާން އެދޭ ކޮންމެ މީހަކުވެސް މިލިޔުން ކިޔައިލާށެވެ. އަދި އެކުވެރިންނާ ހިއްޞާވެސް ކޮށްލާށެވެ.

ވަރަށް ރަނގަޅަށް މިކަމާއިމެދު ވިސްނަވައި ޢަމަލުކުރަން ޖެހޭނެއެވެ. ތިބާ ހުއްޓިހުރީ ﷲ ތަޢާލާގެ ކުރިފުޅުމަތީގައިކަން ހިތުގައި އޮންނަން ޖެހޭނެއެވެ. މާތްﷲ ތިބާއަށް ބައްލަވައިވޮޑިގެންވެއެވެ. ގިނަފަހަރަށް އަހަރެމެެނަށް ރަސްކަލެއްގާތު މާ ޚުޝޫރަތްތެރި ކަމާއިއެކު ގިނަބަޔަކު ތިބޭތަން އެބަފެނެވެ. 

އެހެންވުމުން ތިބާގެ ކިބައިގައި އެއްވެސް ސަމާލުކަމެއްނެތިތިބާގެ ވިސްނުމަށް ﷲ ނުގެނެވެނެއެވެ. ސިކުނޑީގައި ދައުރުކުރަމުން ގެންދާނީ މުޅިން ތަފާތު ފިކުރުތަކެކެވެ. ދުނިޔެއިން ތިބާ އެދޭ ކަންތައްތަކެކެވެ! ނޫންތޯއެވެ؟

ނިކަން ބުނެބަލާށެވެ! އެ ޙާލަތުގައި ތިބާގެ ދަރަޖައަކީ ކޮބައިހެއްޔެވެ؟ ތިބާގެ ހިތުގައި ﷲ ތަޢާލާއަށް ދެވިފައިވަނީ ކޮން ދަރަޖައެއް ހެއްޔެވެ؟ ﷲ ތަޢާލާއަށް ލޯބިކުރެވޭ ހެއްޔެވެ؟ މަޙުޝަރުދުވަހުގައި ހިސާބު ބައްލަވާވޮޑިގެންވާނެކަން ހަނދުމަ ކުރެވޭހެއްޔެވެ؟ ސިކުނޑިއަށް ތިއަ ގެންނަ ކަންކަންވެސް ޙާޞިލުކުރެވޭނީ ﷲ ތަޢާލާ މިންވަރު ކުރެއްވެވުމުންކަން ހިތައް އަރާހެއްޔެވެ؟ 

އަދަކީ ހުކުރު ދުވަހެވެ. ޚުތުބާ ހަމަ ވަރަށް ރަނގަޅެވެ. ރިޝްވަތު ދިނުމާއި ހިފުމުގެ ވާހަކަވެސް ޚުތުބާގައި ވަރަށް ރަނގަޅެވެ. އިމާމް މީހާ ކިޔާލެއްވެސް ރަނގަޅެވެ. އަޑުއިއްވޭ މީހުންގެ ތެރެއިން ގައުމު ހިންގުމަށް އިސްކޮށްފާތިބި ޚާދިމުންތަކަށް އަޑުއިއްވުން ވަރަށްވެސް ބޭނުމެވެ.ނަމަވެސް ޙާލަތާއިމެދު ވިސްނަވާށެވެ. މަތިންފެށިގެން ތިރިއަށް ވިސްނަވާށެވެ. މާތްﷲގެ ރަސްކަންފުޅަށް އަޑުނީވޭ ނުފެންނަ އެއްވެސް ކަމެއްނެތެވެ. ކޮޓަރިތައް ކިތެންމެ ސައުންޑްޕްރޫފް ކޮށްފާހުއްޓަސް ހެވެވެ.

މީސްތަކުންނޭވެ! ތިބާ ނަމާދުކުރަން ޤިބުލައަށް ކުރިމަތިލައި ހުއްޓޭ ވަގުތުން ފެށިގެން ތިބާއަށް އެހުރެވެނީ ﷲ ތަޢާލާގެ ކުރިފުޅުމަތީގައެވެ. 

ތިބާއަށް ﷲ ތަޢާލާ ބައްލަވައި ވޮޑިގެންވެއެވެ. ނަމަވެސް ތިބާގެ ސަމާލުކަން ﷲ ތަޢާލާއަށް ނުދެވޭނަމަ ތިބާއަކީ ﷲ ތަޢާލާ ދެކެ ލޯބިވާ ކިޔަމަންތެރިއަކު ކަމުގައިވާނެ ހެއްޔެވެ؟ނުވާނެކަން ޔަގީނެވެ. 

މީސްތަކުންނޭވެ! ނަމާދާއިމެދު މިމޭރުމުން ވިސްނަވާށެވެ.ނަމާދުކުރާ ވަގުތުކޮޅު ﷲ ތަޢާލާއަށް ސަމާލުކަން އިތުރުކުރާށެވެ. ޚުޝޫޢަތްތެރިވާން ގަދައަޅައި މަސައްކަތްކުރާށެވެ. ހުށްޓި ތިހުރީ މާތްﷲގެ ކުރިފުޅުމަތީގައިކަން އަބަދުމެ ހިތުގައި ކަށަވަރު ކުރާށެވެ.

އާނއެކެވެ! ޚުޝޫޢަތްތެރި ވެވޭނީ ﷲ ތަޢާލާ އެކަން މިންވަރުކުރެއްވވުމުންވެސް މެއެވެެ. ﷲ ތަޢާލާ އެކަން މިންވަރުކުރައްވަވާނީ އެކަމަށް އެދިގެން މަސައްކަތްކުރުމުންކަން ހަދާން ކުރާށެވެ.

ވީމާ ވިސްނާށެވެ! ބިރުވެތިވާށެވެ! ﷲ ތަޢާލާގެ ޙަޟްރަތުގައި ތިބާއަށް ހުއްޓި ހުންނަން ޖެހޭނެ ދުވަހަށެވެ. އެއީ މާދަމަޔަށްވެސް ވެދާނެއެވެ. ނަމާދުގައި ޚުޝޫޢަތްތެރި ވުމަށް އެންމެ ބޮޑަށް ބޭނުންވާ އެއްކަމަކީ އެވަގުތާއިމެދު ބިރުވެތިވުމެވެ.

ދުޢާއަކީ އަހަރެމެން އެންމެންނަކީ ހެއްދެވި ފަރާތަށް ބިރުވެތިވާ އަދި ޚުޝޫޢަތްތެރި ކަމާއިއެކު ނަމާދުކުރެވޭ ބައަކު ކަމުގައި ލެއްވެވުމެވެ. ކުރާ ނަމާދުތަކާއި އެންމެފާ ހެޔޮކަންތައް ﷲ ތަޢާލާ ޤަބޫލުފުޅު ކުރެއްވެވުމެވެ.

– އެންމެންވެސް އާމީން ކިޔާށެވެ! އަދި ހުރިހާ އެކުވެރިންނަށް މި މެސެޖް ހިއްޞާކޮށްލާށެވެ. އެކަމުގެ ސަބަބުން އެންމެ މީހަކު ނަމަވެސް ނަމާދުގައި ޚުޝޫޢަތްތެރިވާން މަސައްކަތް ކޮށްފިނަމަ އަދި ނުކުރި ނަމަވެސް ތިބާކުރި މަސައްކަތުގެ ޘަވާބު ތިބާއަށް ދެއްވަވާނެތެވެ. އިން ޝާ ﷲ. އާމީން!

– އިސްލާމީ ތިލަފަތުގެ ދަރުސަކުން