ސީލައިފް ގްލޯބަލް އިންކް ޕްރައިވެޓް ލިމިޓެޑްގެެ މެނޭޖިންގ ޑިރެކްޓަރު އަޙްމަދު މޫސާ މުޙައްމަދު (އަންމަޓީ) ގެ ޕާސްޕޯޓު ދޫކުރަން ކްރިމިނަލް ކޯޓުން ނިންމި މައްސަލާގައި ހައިކޯޓުގައި އިސްތިއުނާފުކޮށްފައިވާ މައްސަލާގައި ގޮތެއް ނިމެންދެން އައްމަޓީ ފުރުން މަނާކުރަން އެ ކޯޓުން ވަގުތީ އަމުރެއް ނެރެފިއެވެ.
ގދ.ތިނަދޫ/ރެޑްހައުސް, އަޙްމަދު މޫސާގެ މައްޗަށް ވަނީ ޚިޔާނާތްތެރިވުމުގެ ކުށުގެ 42 ދައުވާ އުފުލައިފައެވެ. އެގޮތުން ކްރިމިނަލް ކޯޓުން 2021 ގައި ޝަރީއަތް ނިމެންދެން އައްމަޓީ ފުރުން މަނާކޮށް އޭނާގެ ޕާސްޕޯޓު ނުވަތަ ޓްރެވަލް ޑޮކިއުމަންޓް ހިފެހެއްޓުމަށް މޯލްޑިވްސް އިމިގްރޭޝަންގެ މައްޗަށް އަމުރުކުރިއެވެ.
މި އަމުރު މުރާޖައާކުރުމަށް އެދި އޭނާގެ ފަރާތުން ކްރިމިނަލް ކޯޓުގައި އެދުމުން އަމުރު މުރާޖައާކޮށް މި މަހުގެ ހަވަނަ ދުވަހު ވަނީ ޕާސްޕޯޓު ދޫކުރުމަށް އަމުރެއް ނެރެފައެވެ.
މި އަމުރު ދިވެހިރާއްޖޭގެ ހައިކޯޓުގައި އިސްތިއުނާފުކޮށް އައްމަޓީގެ ޕާސްޕޯޓް ނުވަތަ ޓްރެވަލް ޑޮކިއުމަންޓް ހިފެހެއްޓުމުގެ ވަގުތީ އަމުރެއް ނެރެދިނުމަށް ހައި ކޯޓުގައި ޕީޖީ އޮފީހުން އެދުމުން އެ ކޯޓުން އިއްޔެ ނެރުނު ވަގުތީ އަމުރުގައި ބުނީ އިސްތިއުނާފު
މައްސަަލަ އެ ކޯޓުން ނުނިމެނީސް އޭނާ ރާއްޖެއިން ފުރައިފިނަމަ މައްސަލައިގެ މަގުސަދު ހާސިލުނުވެދާނެ ކަމަށެވެ.
އެހެންވެ އެ މައްސަލާގައި އެ ކޯޓުން ގޮތެއް ނިމެންދެން އޭނާ ފުރުން މަނާކުރަން އިމިގުރޭޝަނަށް އަމުރުކޮށްފައިވެއެވެ.
