މި އަހަރުގެ ރިޔާސީ އިންތިޚާބުގެ ވޯޓުލުން ފަށައިފިއެވެ.
ވޯޓުލުން ފެށީ މިއަދު ހެނދުނު 08:00 ގައެވެ. ވޯޓުލުން ކުރިއަށްދާނީ މިއަދު ހަވީރު 16:00 އާ ހަމައަށެވެ. ވޯޓުލުން ބަންދުކުރާނީ އެ ގަޑީގައި ކިއުގައި މީހަކު ނެތް ނަމައެވެ.
މިއަދުގެ އިންތިޚާބުގެ ވޯޓުލުން ފަށާފައިވާއިރު ވޯޓުލުމަށްޓަކައި ހެނދުނު 07:00 ނުޖަހަނީސް ވަނީ ކިއު ހަދަން ފަށާފައެވެ.
މި ފަހަރުގެ އިންތިޚާބުގައި 08 ކެންޑިޑޭޓުން ވާދަކުރައްވައެވެ.
އެ ކެންޑިޑޭޓުންނަކީ:
ކެންޑިޑޭޓް ނަންބަރު 01: އަމިއްލަ ގޮތުން ވާދަކުރައްވާ ކުރީގެ ހޯމް މިނިސްޓަރު ޢުމަރު ނަޞީރު
ކެންޑިޑޭޓް ނަންބަރު 02: އަމިއްލަ ގޮތުން ވާދަކުރައްވާ ޑިފެންސް މިނިސްޓްރީގެ ކުރީގެ ޑެޕިއުޓީ މިނިސްޓަރު ޙަސަން ޒަމީލް
ކެންޑިޑޭޓް ނަންބަރު 03: އެމްޑީޕީގެ ފަރާތުން ވާދަކުރައްވާ
ރައީސް އިބްރާހީމް މުޙައްމަދު ޞާލިޙް (އެމްޑީޕީ)
ކެންޑިޑޭޓް ނަންބަރު 04: ޕީއެންސީގެ ފަރާތުން ވާދަކުރައްވާ
މާލޭގެ މޭޔަރު ޑރ.މުޙައްމަދު މުޢިއްޒު
ކެންޑިޑޭޓް ނަންބަރު 05: ޖޭޕީގެ ފަރާތުން ވާދަކުރައްވާ
މާމިގިލީ ދާއިރާގެ މެންބަރު ޤާސިމް އިބްރާހިމް
ކެންޑިޑޭޓް ނަންބަރު 06: އަމިއްލަ ގޮތުން ވާދަކުރައްވާ އެމްއާރްއެމްގެ ރައީސް އަޙްމަދު ފާރިސް މައުމޫން
ކެންޑިޑޭޓް ނަންބަރު 07: ދަ ޑިމޮކްރެޓްސްގެ ފަރާތުން ވާދަކުރައްވާ ހުޅުދޫ ދާއިރާގެ މެންބަރު އިލްޔާސް ލަބީބް
ކެންޑިޑޭޓް ނަންބަރު 08: އެމްއެންޕީގެ ފަރާތުން ވާދަކުރައްވާ ދަނގެތީ ދާއިރާގެ މެންބަރު މުޙައްމަދު ނާޒިމް
މި އިންތިޚާބުގައި ވޯޓުލުމުގެ ހައްގު ލިބިގެންވަނީ 282395 މީހުންނަށެވެ. ވޯޓުލުމަށް ރާއްޖޭގައި ޖުމްލަ 574 ވޯޓު ފޮށި ބަހައްޓާފައިވާއިރު ރާއްޖެއިން ބޭރުގައި ވަނީ 8 ފޮށި ބަހައްޓާފައެވެ.
އެއްވެސް ކެންޑިޑޭޓަކަށް ސައްހަ ވޯޓުގެ %50 އަށްވުރެ ގިނައިން ނުލިބިއްޖެނަމަ ދެވަނަ ބުރެއްގެ ވޯޓުލުން އޮންނާނީ މި މަހުގެ 30 ވަނަ ދުވަހުއެވެ. ދެވަނަ ބުރެއްގައި ވާދަކުރައްވާނީ ފުރަތަމަ ބުރުގައި އެންމެ ގިނަ ވޯޓު ލިބިވަޑައިގަންނަވާ ދެ ކެންޑިޑޭޓުންނެވެ.
