ރާއްޖޭގެ އެންމެ ގިނަ ދީނީ އިލްމުވެރިން ނިސްބަތްވެވަޑައިގަންނަވާ “އިލްމުވެރިންގެ ގުޅުން“ ޖަމްއިއްޔާގައި ތިއްބަވާ އިލްމުވެރިންނަށް ފެނިވަޑައިގަންނަވާ އެންމެ ރަނގަޅު ރިޔާސީ ކެންޑިޑޭޓަކު ކަނޑައެޅުމަށް ވޯޓެއް ނަގައިފިއެވެ.

“އިލްމުވެރިންގެ ގުޅުން“ ޖަމްއިއްޔާއަކީ ރާއްޖޭގެ އެންމެ ގިނަ ދީނީ އިލްމުވެރިން ނިސްބަތްވެވަޑައިގަންނަވާ ޖަމްއިއްޔާއެވެ. މި ޖަމްއިއްޔާގައި 150 އަށްވުރެ ގިނަ އިލްމުވެރިން ތިއްބަވައެވެ.

އެ ޖަމްއިއްޔާއިން ވަނީ ރިޔާސީ އިންތިޚާބުގައި ވާދަކުރައްވާ ރިޔާސީ ކެންޑިޑޭޓުންނާ ގުޅޭ ދިރާސީ ރިޕޯޓެއް ހަދާފައެވެ. އެ ދިރާސާގެ ހޯދުންތަކާބެހޭ މައުލޫމާތު އެ ޖަމްއިއްޔާގައި ހިމެނިވަޑައިގަންނަވާ އިލްމުވެރިންނަށް ހުށަހެޅުމުގެ ކަންކަން މިދިޔަ އާދީއްތަ ދުވަހުގެ ރޭ ވަނީ ކުރިއަށް ގެންގޮސްފައެވެ.

އަދި ރިޔާސީ ކެންޑިޑޭޓުންގެ ތެރެއިން އެ އިލްމުވެރިއަކަށް ފެނިވަޑައިގަންނަވާ އެންމެ ރަނގަޅު ކެންޑިޑޭޓަކަށް ވޯޓުލުމުގެ ކަންކަން 24 ގަޑިއިރަށް ކުރިއަށް ގެންގޮސްފައިވާއިރު, ވޯޓުގައި ބައިވެރިވެވަޑައިގަތީ 105 އިލްމުވެރިއެކެވެ.

އޭގެތެރެއިން އެންމެ ގިނަ ބޭފުޅުންނަށް އެންމެ ރަނގަޅު ކެންޑިޑޭޓެއް ކަމަށް ފެނިވަޑައިގެންނެވި ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒަށް ލިބިވަޑައިގަތީ 87 (%82) ވޯޓެވެ. ޢުމަރު ނަޞީރު 9 (%8) ވޯޓު ލިބިވަޑައިގެންނެވިއިރު, ރައީސް އިބްރާހީމް މުޙައްމަދު ޞާލިޙަށް ލިބިވަޑައިގަތީ 5 (%4) ވޯޓެވެ.

ޤާސިމް އިބްރާހިމާއި އަޙްމަދު ފާރިސް މައުމޫނާއި އިލްޔާސް ލަބީބާއި މުޙައްމަދު ނާޒިމް މި ހަތަރު ބޭފުޅުންގެ ތެރެއިން ކޮންމެ ބޭފުޅަކަށް ވެސް ލިބިވަޑައިގަތީ 1 ވޯޓެވެ. ޙަސަން ޒަމީލަށް އެއްވެސް ބޭފުޅަކު ވޯޓެއް ނުދެއްވައެވެ.