2023 ޖޫން 11 ވަނަ ދުވަހު ބީ ބީ ސީ އިން ޚަބަރު ދީފައިވާގޮތުގައި މަސްވެރިކަމަށް ނިކުމެ އުޅެނިކޮށް ހާލުގައި ޖެހުނު މަސްބޯޓެއްގެ މަސްވެރިން ސަލާމަތްކޮށްގެން ފޯޅަވައްސަށް ގެންދެވުނީ 2021 ވަނަ އަހަރުގެ އޮކްޓޯބަރު މަހުގެ 3 ވަނަ ދުވަހުއެވެ. 

އެހެންނަމަވެސް މިއަދު އެމީހުން ތަޖްރިބާ ކުރަމުން ގެންދަނީ މާސިންގާ ކަނޑުގެ ބިޔަ ރާޅުތަކުގެ ތެރެއަށް ޣަރަގުވެ މަރުވެގެން ދިއުމަށްވުރެންވެސް މާބޮޑު ބިރުވެރިކަމެކެވެ. 

ސަލާމަތުން އެނބުރި ގައުމަށް ދެވިދާނެ ކަމުގެ އެއްވެސް އުންމީދެއްނެތި ކޮންމެ ދުވަހަކު އަނިޔާވެރިކަމުގައި އެތައްފަހަރަކު މަރުވަމުންދާ ކަމުގެ ހިތްދަތި އިޙްސާސްތަކެކެވެ. 

އެމީހުންގެ ކުށަކީ އެ ޖަޒީރާތައް ހިމެނޭ ސަރަހައްދުގެ އެތައް މޭލަކަށް އެބައެއްގެއާރާއިބާރު ފެތުރިފައިވާ އެރަށްތަކުގެ މިހާރުގެ ވެރިންގެ އަމުރުނެތި އެސަރަހައްދަށްވަދެ ހާލުގައި ޖެހުމެވެ.                                            

އެ މަސްބޯޓުގައި ތިބިމީހުންނަކީ ހަގީގަތުގައި މަސްވެރިންނޫން ކަމާއި ސްރީލަންކާގެ ހާލަތުން ސަލާމަތްވެވޭނެ ގޮތެއް ހޯދުމުގެ ބޭނުމުގައި ކަނޑުވިޔަސް ހެޔޮކަށް ފުރައިގެން އުޅޭ ސްރީލަންކާގެ ތަމަޅަ ނަސްލަށް ނިސްބަތް ކުރެވޭ ބައެކެވެ. އެހެންނަމަވެސް އެމީހުންނަކީވެސް އިންސާނުންކަމުގައި ވީތީ ލިބުމަށް އުންމީދުކުރެވޭ ހައްގުތަކަކާއި ރައްކާތެރިކަމެއް އޮންނާނެކަމަށް އެމީހުންވެސް ގަބޫލުކުރާތީ އެމީހުންގެ އަމާޒަކަށް ވެފައިއޮތް ކަމުގައިވަނީ ކޮންމެވެސް ގޮތަކުން ކެނެޑާއަށް ދިއުން ކަމުގައި ފަހުން އެނގިފައިވެއެވެ.

ވިއްސާރަވެ ކަނޑުގަދަވި ވަގުތު އިންޖީނުވެސް ހަލާކުވެގެން ބެހިގެން ދާން ފެށުމުގެ ކުރިން އެބޯޓު ދަތުރުކުރަމުންގެންދިޔަ މިސްރާބާއި ޖީ ޕީ އެސް އިން އެނގުނު މައުލޫމާތުތަކުގެ އެހީގައި އެކަން ދެނެގަނެވުނީ ކަމަށްވެސް އެ މައުލޫމާތު ތަކުގައި ހާމަކޮށްފައިވެއެވެ.  

އަދި ބީ ބީ ސީ އަށް މައުލޫމާތު ދިން ފަޅުވެރިއަކު ބުނިގޮތުގައި މަސްބޯޓަށް މެދުވެރިވި ނިކަމެތި ހާލަތުގައި ކޮންމެވެސް ހިކިފަސްތަނެއް އަތުޖެހޭތޯ ބަލަމުން ގެންދިއުމުގެ ތެރޭގައި މާދުރުން އަލިތަކެއް ފެނުނީމާ އެދިމާލަށް މަޑުމަޑުން ދުއްވާފައި ދިޔައީއެވެ.

ކަންދިމާވިގޮތުން އެއީ އިނގިރސި ވިލާތުގެ މަނަވަރެކެވެ. އެމަނަވަރުގައި ގެންގޮސް ހިކިފަސްތަނަކުން ވަގުތީ ބޯހިޔާވަހިކަމެއް ދިނީއެވެ. އޭގެ ފަހުން މިހާރު ވިއްސަކަށް މަސްދުވަސް ފާއިތުވެގެން ދިޔައީއެވެ.

އެރަށްތަކުގެ މިހާރުގެ ބާރުގަދަ ވެރިންނާއި އިނގިރޭސި ވިލާތާއި ދެމެދު ކުރެވެމުންދާ މުވާސަލާތުގެ މައްޗަށް ތުންތުންމަތިން ބިނާކޮށް ލިބެމުންދާ މައުލޫމާތުގައި އެކިގޮތްގޮތުން އެ ރަށްތަކަށް ދެވިފައިތިބި މީހުންގެ ތެރޭން ބަޔަކުމީހުން ސަލާމަތްވެވޭނެ ގޮތެއް ނެތިގެން އަމިއްލައަށް މަރުވާން މަސައްކަތްކުރަމުން ގެންދާކަންވެސް ވަނީ އެނގިފައެވެ.

ސްރީލަންކާގެ މަސްބޯޓު އެ ރަށަށް ގެންދެވުނު ފަހުން މައުލޫމާތު ލިބިގަތުމުގެ ޙައްގު ބޭނުންކޮށްގެން އިނގިރޭސި ވިލާތުގެ ޚާރިޖިއްޔާއިން އެމީހުންނާ ބެހޭގޮތުން މައުލޫތުމާތު ހޯދުމުން ބީ ބީ ސީ އަށް އެނގިގެންދިޔައީ އެބައިމީހުންގެ ބޯޓުގެ އިންޖީނު މަރާމާތު ކޮށްދިނުމާއި ބެހޭގޮތުން މުއާސަލާތު ކުރެވިފައިވާ ކަމަށެވެ. އެހެންނަމަވެސް އެމީހުން ފޯޅަވަހިން ސިޔާސީ ހިމާޔަތަށް އެދިފާނެކަމުގެ ބިރުވެސް އެބަ އޮތަކަމަށެވެ.