ވައިގެމަގުން ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރަން އުޅެނިކޮށް ހައްޔަރުކުރި އިންޑިއާގެ އަންހެން މީހާ ވާހަކަ ދައްކާާ ބަސް ދަންނަ މީހަކު އަދިވެސް ނުލިބޭކަމަށް ފުލުހުން އިއްޔެ ކޯޓުގައި ބުނެފިއެވެ. 

ވައިގެ މަގުން އިތިއޯޕިއާއިން ރާއްޖެއައި އިންޑިއާގެ ރައްޔިތެއްކަމަށްވާ ލަލްތުލަންޕަރި (56 އ) ހައްޔަރުކުރީ މިދިޔަ އޭޕްރީލްމަހުގެ 12 ވަނަ ދުވަހުއެވެ. އެއީ އޭނާގެ ލަގެޖުން ޖުމްލަ 5.3 ކިލޯގެ މަސްތުވާތަކެތި ފެނުމާ ގުޅިގެންނެވެ.

މި މައްސަލައިގައި އޭނާ ހައްޔަރުކޮށް ބަންދާމެދު ގޮތެއް ނިންމަން ކޯޓަށް ހާޒިރުކުރުމުން ފުރަތަމަ ޖެހީ 3 ދުވަހެވެ. 

އޭގެފަހުން ދެ ފަހަރެއްގެ މަތިން ބަންދުގެ މުއްދަތު އިތުރުކުރިއެވެ.

އެ ދުވަހު ކޯޓުން ބުނީ އޭނާއަށް ދައުލަތުން ވަކީލަކު ހަމަޖައްސައިދީފައިވީ ނަމަވެސް އޭނާއަށް އިނގިރޭސި އަދި ހިންދީ ބަސް ވެސް ނޭނގޭ ކަމަށެވެ. އެހެންކަމުން ވަކީލާ މުއާމަލާތު ކުރުމުގައި ދަތިތަކެއް ވެސް ހުރި ކަމަށް ފާހަގަކުރި ކަމަށެވެ. 

”ތަރުޖަމާނު މެދުވެރިކޮށް ދައްކާ ވާހަކަތައް ވެސް ތުހުމަތުކުރެވޭ މީހާއަށް ފަހުމު ނުވާކަން ފާހަގަކުރެވޭ.”

އޭނާގެ ބަންދާމެދު ގޮތެއް ނިންމުމަށް އިއްޔެ ކޯޓަށް ހާޒިރު ކުރުމުން ވަނީ ބަންދަށް އިތުރު ފަސް ދުވަސް ޖަހައިފައެވެ.

ކޯޓު އަމުރުގައި ބުނެފައިވަނީ އިއްޔެގެ މަޖިލީހަށް އޭނާ ހާޒިރުކުރިއިރު ވެސް އޭނާގެ ބަހުން ތަރުޖަމާކުރެވޭނެ ވަކީލަކު ހަމަޖެހިފައިނުވާކަމަށް އައިއޯ ފާހަގަކުރެއްވި ކަމަށެވެ. އަދި ފުލުހުންގެ ފަރާތުންނާއި ވަކީލުންގެ ފަރާތުން ވެސް ތަރުޖަމާނެއް ހޯދުމަށް މަސައްކަތް ކުރާކަން ވެސް ފާހަގަ ކުރެއްވި ކަމަށެވެ.