ރައީސް ޔާމީނުގެ އައްޑޫދަތުރުފުޅުގެ ތާއިދު ފެނުމުން މިހާރު އައްޑޫ ސިޓީ އެމްޑީޕީގެ އަތުން ބީވެގެން ގޮސްފައިވާކަން އެ ޕާޓީ އަށް ވަރަށް ރަނގަޅަށް އެނގިގެން ގޮއްސި ކަމަށް އިދިކޮޅު ޕީޕީއެމް އިން ބުނެފިއެވެ.

މާލެ ފިޔަވާ އެމްޑީޕީ އަށް އެންމެ ތާއީދު ބޮޑު ތާއިދު އޮތް ތަނަކީ އައްޑޫ ސިޓީ ކަމަށްވާއިރު އިދިކޮޅު ލީޑަރ ކުރީގެ ރައީސް ޔާމީން މިއަދު މެންދުރު އައްޑޫ އަށް ވަޑައިގެންނެވުމުން އެމަނިކުފާނަށް ވަނީ ވަރަށް ހޫނު މަރުޙަބާއެއް އައްޑޫގެ ރައްޔަތުން ދަންނަވާފައެވެ. ޔާމީން އައްޑޫ އަށް ކުރައްވާ މި ދަތުރުފުޅަކީ ހަތަރު ދުވަހުގެ ދަތުރުފުޅެއް ކަމަށް އެޕާޓީން ބުނެއެވެ. 

މިއަދު ހަވީރު ފޭދޫގައި ޕީޕީއެމުން ބޭއްވި ޖަލްސާގައި ވާހަކަފުޅު ދައްކަވަމުން ޔާމީން ވިދާޅުވީ އެމަނިކުފާނުގެ މި ދަތުރުފުޅާ ދިމާކޮށް ހުރިހާ ސްކޫލަކަށް އޮތީ ގޮނޑިއެއްހާ މިންވަރު ވެސް ނުދިނުމަށް އަންގާފައި ކަމަށާއި އެއްވެސް ގޮތަކަށް ދަތުރުފަތުރު ކުރުމަށް ފަސޭހަވިޔަ ނުދިނުމަށްޓަކާ ބަހެއްނަމަވެސް ނުދިނުމަށް ސަރުކާރުގެ ބައިވެރީން އަންގާފައިވާ ކަމަށެވެ.

ނަމަވެސް މި ހުރިހާ ހިފެހެއްޓުމާ އެކީ ވެސް އައްޑޫން އެމަނިކުފާނަށް މަރުޙަބާ ކިޔުމަށް މީހުން ނިކުތް އަދަދު އެމްޑީޕީ އަށް ފެންނާނެ ކަމަށާއި އެއާއެކު އައްޑު އަތޮޅު އެމްޑީޕީގެ އަތުން ބީވެގެން ގޮސްފައިވާކަން މިހާރު އެ ޕާޓީ އަށް އެނގިގެން ގޮސްފައިވާ ކަމަށް ޔާމީން ވިދާޅުވި އެވެ.

”އެ ބޭފުޅުންނަށް މި އަދަތުތައް ފެނިއްޖެ. އަދި އެ ބޭފުޅުންނަށް ފެނޭ އެ ބޭފުޅުންގެ ރައީސް ވަޑައިގަތީމަ މެހެމާންދާރީ ކިޔާގޮތް ވެސް. މި ހުރިހާ ހިފެހެއްޓުމަކާ އެކުވެސް އައްޑޫ ސިޓީގެ ލޮބުވެތި ރައްޔިތުން އަޅުގަނޑާއި، އަޅުގަނޑުގެ ޓީމަށް ތި ކިއުއްވި ހޫނު މަރުޙަބާ އިން އެބޭފުޅުންނަށް (އެމްޑީޕީ) ބޮޑުތަނުން އެނގިވަޑައި ގަންނަވާނެ ކަންނޭނގޭ އައްޑު ސިޓީ އެ ބޭފުޅުންގެ އަތުން ބީވެގެން ހިނގައްޖެކަން.“ ޔާމީން ވިދާޅުވި އެވެ.

ރައީސް ޔާމީން އަތޮޅުތަކަށްް ފަށްޓަވާފައިވާ ކެމްޕެއިން ދަތުރުތަކުގައި ރާއްޖޭގެ ހުރިހާ ރަށަކަށްވެސް ޒިޔާރަތް ކުރަށްވާނެ ކަމަށް ވަނީ ވިދާޅުވެފައެވެ.