ތައިވާނުގެ ދިފާއީ ވުޒާރާއިން ހާމަކުރާ ގޮތުގައި ޗައިނާއިން މިހާރު ކުރިއަށް ގެންދާ މިލިޓްރީ ތަމްރީނު ތަކުގައި އެ ގައުމުގެ ކަނޑުގެ ސަރަހައްދުގެ ތެރެއަށް ވަދެގެންފިއެވެ. ތައިވާނުގެ ދިފާއީ ވުޒާރާއިން ބުނާގޮތުގައި ޗައިނާއިން މިކުރީ ޔުނައިޓެޑް ނޭޝަންސްގެ ގަވައިދުތަކާ ޚިލާފް އަމަލެކެވެ.
ޗައިނާއިން ތައިވާނުގެ ސަރަހައްދުގެ ތެރެއަށް ވަންނަ ކޮންމެ ވަދެގަތުމަކަށް ރައްދުދޭނެ ކަމުގައި ތައިވާނުން ބުނެފިއެވެ. އަދި ކަނޑާއި ވައިގެ ސަރަހައްދު ހިމެނޭގޮތަށް ޗައިނާއިން މި ހިންގާ ތަމްރީނުތަކުގެ ސަބަބުން ބައިނަލް އަގްވާމީ ބޯޓުފަހަރު ދަތުރު ކުރުމަށް ނުރައްކާތައް މެދުވެރިކޮށް ތައިވާން ކަނޑުއޮޅީގެ ސަރަހައްދުވެސް ނުރައްކާތެރި ތަނަކަށް ބަދަލުވެއްޖެ ކަމަށެއެވެ. އަދި ޗައިނާގެ ތަމްރީނުތައް ކުރަމުންއެ ގެންދަނީ ބައިނަލް އަގްވާމީ ހަމަތަކަށްވެސް ގޮން ޖަހަމުން ކަމަށެވެ.
ޗައިނާގެ ކަނޑާއި ވައިގެ ސިފައިން ހިމެނޭގޮތަށް ކުރިއަށް މިގެންދާ ތަމްރީނު ތަކަކީ ވޭތުވެދިޔަ 25 އަހަރު ދުވަހުގެ ތެރޭގައި ތައިވާނަށް ވަޑައިގެންނެވި އެމެރިކާގެ އެންމެ އިސް ސިޔާސީ ބޭފުޅާކަމުގައިވާ މަޖިލީހުގެ ރައީސް ނޭންސީ ޕެލޯސީ ތައިވާނަށް ވަޑައިގަތުމާއި ގުޅިގެން ދިން ރައްދެއްކަމަށް ބެލެވެއެވެ. ޗައިނާއިން ގަބޫލުކުރާ ގޮތުގައި ތައިވާނަކީ ޗައިނާގެ ބައެކެވެ. ނޭންސީ ތައިވާނަށް ވަޑައިގަތީ މިދިޔަ އަންގާރަދުވަހުގެ ހަވީރުގެ ވަގުތެއްގައެވެ. ނޭންސީ ތައިވާނަށް ދާދިއުމަކީ އެމެރިކާއިން އަލިފާނާއި ކުޅުންކަމުގައި ޗައިނާއިން ވަނީ މީގެ ކުރީންވެސް އިންޒާރު ދީފައެވެ. ތައިވާނުން ދެކޭގޮތުގައި ޗައިނާއިން މިކުރިއަށްގެންދާތަމްރީނުތަކަކީ އިންސާނުންގެ ސިކުނޑިތަކަށް ހަނގުރާމައިގެ ބިރުވެރިކަން ވެއްދުމުގެ ހިންގާ ޙަރަކާތްތަކެކެވެ.
ޗައިނާގެ ނުރުހުން އިތުރުވެފައިވާ ނޭންސީގެ މިދަތުރުގައި ތައިވާނުގެ ޕާރލަމެންޓުގައި އޭނާ ވާހަކަދައްކަމުން ވިދާޅުވެފައިވަނީ އަމިއްލައަށް ވަކިވެގަނެގެން ވެރިކަންކުރާ ތައިވާނަކީ އިންސާނީ ހަމަހަމަ ކަމުގައި ދުނިޔޭގައި އޮތް އެން ތަހުޒީބު މުޖުތަމާ ކަމުގައެވެ. އަދި އެއީ ތައުރީފްކުރުން ޙައްގު ސިޔާސަތެއް ކަމަށެވެ. މިއަދުގެ ދުނިޔެއަށް ކުރިމަތިލާން ޖެހިފައި މިވަނީ ރައްޔިތުންގެ ވެރިކަމާއި ގަދަބާރުން ހިންގާ ވެރިކަމާއެވެ. ރައްޔިތުންގެ ވެރިކަން ދުނިޔޭގެ ހަތަރު ބިތުގައި ކަށަވަރުކުރަން އެމެރިކާގެ އަޒުމަކަށް ގުޑުމެއް ނުގެނެވޭނެއެވެ. އެއީ ދަގަނޑު ދަހަނާގެ ތެރޭގައި ރައްކާތެރި ކުރެވިފައިވާ ފަލްސަފާއެކެވެ ”. ތައިވާނުގެ ރައީސްވެސް އިންނެވި ޕާރލަމެންޓުގައި ނޭންސީ ދެއްކެވި ކުރު ވާހަކަފުޅުގައި ވިދާޅުވިއެވެ.
ނޭންސީގެ ވާހަކަފުޅާއި ގުޅިގެން ތައިވާނާދޭތެރޭ އެކަމަނާ ގެންގުޅުއްވާޚިދުމަތްތެރި އުސޫލުތަކަށާއި ކުރައްވާ ތާއީދަށް ތައިވާނުގެ ރައީސް ޝުކުރު އަދާކުރެއްވިއެވެ. އަދި މިލިޓްރީގޮތުން އެއްވެސް ފަރާތަކުން ދައްކަމުންގެންދާ ބިރަކަށް ތައިވާނު ޖެހިލުން ނުވާނެ ކަމުގައި ވިދާޅުވިއެވެ.އަދި އެކަމަނާއަކީ ތައިވާނުގެ އެންމެ ގާތް ރަޙުމަތްތެރިޔާ ކަމަށާއި އެމެރިކާއަކީ އަބަދުވެސް ތައިވާނުގެ ކުރިއެރުމަށާއި ރައްކާތެރިކަން ކަށަވަރުކުރުމުގައި އެންމެ އިތުބާރުކުރެވޭ ބައިވެރިޔާ ކަންވެސް ހާމަކުރެއްވިއެވެ. އަދި ތައިވާން އަބަދުވެސް އޮންނާނީ އެމެރިކާއާއި އެކުގައި ކަމަށްވެސް ވިދާޅުވިއެވެ.
އެމެރިކާގެ މަޖިލީހުގެ ރައީސް ވިދާޅުވީ އެކަމަނާ ދަތުރުފުޅާ ގުޅިގެން ޗައިނާގެ ފާޑުކިއުންތަކާ ވަރަށްބޮޑަށް ކުރިމަތިލައްވަން ޖެހިވަޑައިގެން ކަމަށާއި އަދި ޗައިނާގައި ހުންނަވާ އެމެރިކާގެ ސަފީރު އެގައުމުގެ ޚާރިޖިއްޔާއަށް ހާޒިރު ކުރެއްވި ކަންވެސް އެނގިވަޑައި ގަންނަވާ ކަމަށެވެ.އެކަމަނާގެ ވާހަކަފުޅުގައި ޗައިނާގެ ޗިޕް އިންޑަސްޓްރީއާއި ފައިހަމަކުރަން އެމެރިކާއިން މިހާރު ތަޢާރުފް ކުރަން މަސައްކަތް ކުރަމުން ގެންދާ ގާނޫނީ އޮނިގަނޑުގެ ސަބަބުން ތައިވާނުގެ އިގްތިސާދަށްވެސް ހެޔޮ ބަދަލުތަކެއް އަންނާނެއެވެ.
ނޭންސީއަކީ ޗައިނާގެ އިންސާނީ ޙައްގުތަކަށް ވަރަށް ފާޅުކަން ބޮޑުގޮތެއްގައި ފާޑުކިޔަމުން ގެންދާ ބޭފުޅެކެވެ. މި ދަތުރުފުޅުގައި ޓިއަނަމަން ސްކްވޭރގެ އެކްޓިވިސްޓެއްގެ ގޮތުގައި ޗައިނާއިން ހައްޔަރުކުރުމަށްފަހު މިހާރު މިނިވަން ކޮށްފައިވާ ހޮންގކޮންގ ގެ ފޮތްވިއްކާމީހާ އާއި ބައްދަލު ކުރައްވަންވެސް އޮތީ ހަމަޖެހިފައެވެ.
ޙަގީގަތުގައި ނޭންސީ ޕެލޯސީ އަކީ ތައިވާނަށް ވަޑައިގެންނެވި އެމެރިކާގެ ފުރަތަކަ މަޖިލީހުގެ ރައީސެއްނޫނެވެ. 1997 ގައި އޭރުގެ މަޖިލީހުގެ ރައީސް ނެވްޓް ގިންގްރިޗް ވަޑައިގަތުމުންވެސް ދެ ގައުމުގެ މަސްރަޙް ވަރަށް ގޯސްވިއެވެ. އެދުވަސްވަރާ އަޅާކިޔާއިރު މިހާރު ޗައިނާއަކީ ބާރުގަދަ އިގްތިސޯދެއްގެ އިތުރުން ސިޔާސީ އަދި މިލިޓްރީ ގޮތުންވެސް މާބޮޑަށް ކުރިއަރާފާއޮތް ގައުމެކެވެ. އަދި ތައިވާނަކީ ޗައިނާގެ ބައެއްކަމަށް ބުނުމާއި ބޭރުގައުމަކާއެކު ތައިވާނުން ސީދާ މުޢާމަލާތުކުރުން ޗައިނާއިން މަނާކޮށްފައި އޮތުމާއެކުވެސް މިހާތަނަށް ތައިވާނުގެ މައްސަލާގައި ޗައިނާއިން ބާރުގެ ބޭނުން ކޮށްފައެއް ނުވެއެވެ.
އަދި ހަމައެފަދައިން ނޭންސީގެ ދަތުރަކީ ސަބަބަކަށް ހަދައިގެން ތައިވާނުގެމައްޗަށް މިލިޓްރީގޮތުން އަރައިނުގަތުމަށް އެމެރިކާއިން ވަނީ އިންޒާރު ދީފައެވެ. މިކަމާގުޅިގެން ޗައިނާގެ ޚާރިޖިއްޔާގެ ތަރުޖަމާނު ހުއާ ޗުންޔިންގ ވިދާޅުވީ ޗައިނާގެ މިލިޓްރީ ތަމްރީނުތަކަކީ ޗައިނާއަށް އިޚްތިޔާރު ލިބިފައިވާ ކަމެއް ކަމަށާއި އަދި އެއީ ތައިވާނުން އެމީހުންގެ ހައްދުގައި ތިބުމަށް ދެމުންގެންދާ ހޫނު އިންޒާރެއް ކަމުގައެވެ. އަދި ތައިވާނުގެ މޭވާއާއި މަހުގެ ބާވަތްތައް މިހާރު ޗައިނާއަށް އެތެރެކުރުން ވަގުތީގޮތުން މަނާކޮށްފައިވާ ކަމަށް ޗައިނާގެ ކަސްޓަމުން މައުލޫމާތު ދެއެވެ.
ޗައިނާގެ އެންމެ ސީނައަރ ޑިޕްލޯމެޓުންގެ ތެރޭގައި ހިމެނިވަޑައިގަންނަވާއެގައުމުން އިނގިރޭސިވިލާތަށް ކަނޑައަޅުއްވާފައި ހުންނަ ސަފީރު އެމެރިކާއަށް އިންޒާރު ދެއްވަމުން ވިދާޅުވެފައިވަނީ “ ތައިވާނުގެ މައްސަލާގައި އެމެރިކާގެ ޢަމަލުތައް ވަރަށް މަކަރުވެރިވެފައި ނުރައްކާތެރިކަން އެނގޭކަމަށާއި އެމެރިކާއިން ތައިވާނަކީ މިނިވަން ދައުލަތެއް ކަމުގައި ނުބެލުމަށާއި އަލިފާނާ ކުޅެންޏާ އަދައިގެން ދާނެކަމަށެވެ ”. ޒެންގްޒެގުއަންގް މިހެން ވިދާޅުވެފައިވަނީ ނޭންސީގެ ދަތުރާއި ބެހޭގޮތުން ބޭއްވި ނިއުސް ކޮންފަރެންސެއް ގައެވެ. ހަމަމިމޭރުމުން އެމެރިކާގެ މިއުޒިކަށް ނުނެށުމަށް އިނގިރޭސިވިލާތަށްވެސް އޭނާ އިންޒާރުދެއްވިއެވެ.
އެމެރިކާ އަބަދުވެސް ބުނަމުންގެ ގެންދަނީ ޗާއިނާ ވަންޕޮލިސީއަށް ތާއިދުކުރާކަމަށެވެ. ނަމަވެސް ފެނިގެންދަނީ ތައިވާނު ޗައިނާގެ ބައެއްގެ ގޮތުގައި އޮތުމަށްވުރެ، ތައިވާނަކީ މިނިވަން، އެމެރިކާގެ ޙިމާޔަތްލިފައިވާ ރަޙުމަތްތެރި ގައުމެއްގެ ގޮތުގައި އެސަރަހައްދުގައި ބޭއްވުމަށް ޢަމަލީ މަސައްކަތް ކުރާތަނެވެ.
https://m.facebook.com/watch/?v=689606931646753&_rdr
One Response
ދުނިޔޭގެ ބިންތައް ބައިބައިކޮށްލުމުގައި ހުޅަނގު ވަރަށް ކާމިޔާބު ކަމަށް ބުނަން ޖެހެއެވެ. ދުނިޔޭގެ ހަތަރު ބިތަށް ޑިމޮކްރެސީ ތަޢާރުފް ކުރުމުގެ ބޭނުމަކީ އެއީއެވެ. ކުދިކުދި ތަންތަންކޮޅަށް ބަހާލީމާ ދެއްކޭން ގަދައެއް ނޯންނާނެއެވެ. އެފްރިކާއާއި އޭޝިޔާ ފޮތިފޮތިކޮށްލައިފިއެވެ. އަރަބިކަރަ ބައިބައިކޮށްލައިފިއެވެ. ރަޝިޔާ ބަހާލައިފިއެވެ. މިހާރު އަތްނުލެވި އޮތީ ޗައިނާއާއި އީރާނެވެ. މިހާރު ކުރިއަށް އެގެންދަނީ އެ ދެގައުމު ފޮތިފޮތި ކޮށްލުމުގެ މަޝްރޫއެވެ. ދިރިތިބި ބަޔަކަށް ވާގޮތެއް ދައްކަވާނެތެވެ.