ފެންމަތީގަ ނުވަތަ މޫދުގަ ގެ އެޅުން ފުޅާވަމުން އަންނަ ނެދަރލަންޑްގެ މިފަދަ ގެތަކުގައި ދިރި އުޅޭ ފަރާތްތަކުން ބުނާ ގޮތުގައި ގަދަ ތޫފާނެއްއައިސް ފެންބޮޑުވުން ފަދަ ހާދިސާތައް ކުރިމަތިވާއިރު، އެމީހުންގެ ގެދޮރޮރާ މުދަލާއެކު ސަލާމަތް ވާނެކަމާމެދު މިހާރު މާބޮޑަކަށް ވިސްނާކަށް ނުޖެހެއެވެ. އެހެނީ ފްލޯޓިންގް ވިލެޖް ނުވަތަ ފެންވަތީގަ ހުންނަ ގޮތަށް އަޅާ ގެތައް ފަރުމާ ކޮށްފަ ހުންނަ ގޮތުން ދިޔަވަރުބޮޑުވާއިރު ގެތައް މައްޗަށް ހިއްލި އަދި ފެން ނުވަތަ ދިޔަވަރު ހިދުމުން ގޭގެ އޮރިޖިނަލް މަގާމަށް ތިރިވާ ގޮތަށް ހަދާފައި ހުންނާތީ އެވެ. އެމީހުން ބުނާ ގޮތުގައި ގެދޮރު އެޅުމަށް ބިމުގެ ދަތިކަން އޮން ގައުމުތަކުގަޔާ ފެންބޮޑު ވުމުގެ ނުރައްކާ އޮންނަ ހިސާބުތަކުގައި މި ޓެކްނޮލޮޖީ ބޭނުންކޮށްގެން ގެތައް އެޅުން މިހާރަށް ވުރެ ފުޅާ ނުވެ އޮންނަކަން މީ އަޖާބު ވާން ޖެހޭ ކަމެކެވެ.
ނެދަރލަންޑް ގައި މި ޓެކްނޮލޮޖީ މިހާރު ވަރަށް ބޮޑަށް އާންމުވާން ފަށާފައި ވުމާއެކު ސަރުކާރުން ގެންދަނީ ގާނޫނަށް ގެންނަންޖެހޭ ބަދަލްތައް ގެނެސް މިއީ އަތްފޯރާ ފަށުގައިވާ ކަމަކަށް ހެދުމަށް މަސައްކަތް ކުރަމުންނެވެ.
މިފަދަ ފްލޯޓިންގ ވިލެޖް ތަކުގެ ފާޚާނާ ނިޒާމް އާއި ފެނުގެ ނިޒާމް ހުންނަނީ އެއަވަށެއްގެ އެއްގަމުގެ މިފަދަ ނިޒާމްތަކާ ގުޅާފައެވެ. ފްލޯޓިންވިލެޖްގެ ގެތަކުގައި އާންމުކޮން ސްޓީލް ފައުންޑޭޝަން ޕިލަރ ތަކެއްބޭނުން ކުރާއިރު އަލަނީ ޕްރީފެބްރިކޭޓަޑް،ނުވަތަ ގެނެސް ރާވާލާގޮތަށް ކުރިން ތައްޔާރުކޮށްފައިވާ ފިލާ، ނުވަތަ ހަދާފަ ހުން ލަކުޑިންނާ ބިއްލޫރިން ތައްޔާރު ކޮށްފަ ހުންނަ ގެތަކެކެވެ. މިގޮތަށް ފެންމަތީ ނުވަތަ މޫދުގަ ގެ އެޅުމަކީ ބިންދަތި ތަންތަނުގައި މޫދުގެ ބޭނުން ހެޔޮގޮތުގައި ކުރެވޭނެ ފައިދާހުރި ގޮތެއްކަމަށްވެސް މިކަމުގަ އުޅޭ މާހިރުން ވިދާޅުވެއެވެ.
ފްލޯޓިންގ ގެއެއް ގޮޑުދޮށާކައިރިން މޫދުގެ ކޮންމެ ހިސާބެއްގަވެސް އެޅިދާނެއެވެ. ހައުސް ބޯޓް ނުވަތަ ގެއެއްގޮތަށް ބޭނުންކުރާ ފުރާދުއްވާ އުޅަނދުތަކާ ޚިލާފަށް މިގެތައް ހުންނާނީ އެއްގަމުގެ ކޮންމެވެސް ތަނަކާ ގުޅުވާފައެވެ. އަދި މިގެތަކަށް ކަރަންޓާ ފެނާ އަދި ފާޚާނާގެ ޚިދުމަތް ލިބިދެވޭނީ އެއްގަމުގެ މިފަދަ ނިޒާމުތަކުތެރޭންނެވެ. އެއްގަމުގަ އަޅާ ގެތަކުގައި ބޭސްމަންޓް ހިމެނޭ ގޮތަށް މިގެތަކުގައި ބޭނުންކުރާނީ ޚާއްސަ ބުޑެކެވެ. މިއީ ނުތަޅުވާ ފެންމަތީ ގަ ގެތައް ބެހެއްޓުމަށް އެހީތެރިވާނެ ބުޑެކެވެ. އެހެން ނަމަވެސް ގެތައް ހުންނާނީ ފެންބޮޑުވުމުން ނުވަތަ ދިޔަވަރު ބޮޑުވުމުން ހިއްލިފަ ތިރިވާ ގޮތަށެވެ.
ފްލޯޓިންގ ވިލެޖްއެއް އެޅުމުގެ ޚާއްސަ މަޝްރޫއު އެއް ދިވެހިރާއްޖޭގަވެސް ވަނީ އިއުލާން ކޮށްފައެވެ.
