އެމެރިކާގައި ހިފެހެއްޓިފައިހުރި އަފްޢާނިސްތާންގެ ހަތް ބިލިއަންޑޮލަރު ދޫކުރުން ހުއްދަ ކުރާ ޚާއްސަ އަމުރެއްގައި އެމެރިކާގެ ރައީސް ޖޯބައިޑަން ސޮއިކުރައްވައިފިއެވެ. އަދި ނިންމަވާފައިވަނީ މިފައިސާގެ އެއްބައިކަމަށްވާ 3.5 ބިލިއަން ޑޮލަރު އަފްޢާނިސްތާން އަށް ފޮނުވޭ އިންސާނީ އެހީތެރިކަމުގެ ސާމާނު ގަތުމަށް ބޭނުން ކުރުމަށެވެ. އަދި އަނެއްގައި ބޭނުން ކުރަން ނިންމާފައިވަނީ 2001 ވަނަ އަހަރުގެ ސެޕްޓެމްބަރ އެގާރަވަނަ ދުވަހު އެމެރިކާގެ ނިއުޔޯކްގެ ޓްވިންޓަވަރ ހިމެނޭ ގޮތުން އެކި ތަންތަނަށް ދިން ޓެރަރިސްޓް ހަމަލާތަކުގައި މަރުވި މީހުންގެ އާއިލާތަކަށް ބަދަލު ދިނުމަށެވެ. މަތިންދާބޯޓް ތަންތާ ޖައްސާ ގޮއްވާލައިގެން ދިންމިހަމަލާ ތަކުގައި ތިންހާހެއްހާ މީހުން ވަނީ މަރުވެފައެވެ.
2021 ވަނަ އަހަރުގެ އޮގަސްޓް މަހު އަފްޢާނިސްތާން އަނެއްކާވެސް ތާލިބާން ޖަމާއަތުގެ އަތްދަށަށް ދިއުމާއިއެކު ދުނިޔޭގެ އެކި ގައުމުތަކުގައި ހުރި އަފްޢާނިސްތާންގެ ފައިސާ ހިފެހެއްޓުމަށް އެގައުމުތަކުން އަވަސްވެ ގަތެވެ. މިގޮތުން އެކިގައުމުތަކުގަޔާ ބައިނަލްއަގްވާމީ މާލީ އިދާރާ ތަކުގައި ހުރި އެގައުމުގެ ދިހަ ބިލިއަން ޑޮލަރު ވަނީ ހިފެހެއްޓިފައެވެ. މީގެތެރއިން ހަތް ބިލިއަން ޑޮލަރުހުރީ އެމެރިކާގައެވެ.
ޚާއްސަ އަމުރުގައި ސޮއި ކުރެއްވުމަށްފަހު ރައީސް ޖޯބައިޑަން ވިދާޅުވެފައިވަނީ މިފައިސާ ދޫކުރުމުގެ އެންމެ ބޮޑުބޭނުމަކީ އަފްއާނިސްތާންގެ ރައްޔިތުންނަށް އެހީވުން ކަމުގައެވެ. އަދި ސެޕްޓެމްބަރ އެގާރަ ހަމަލާގައި ގެއްލުން ލިބުނު ފަރާތްތަކަށް އެހީވުމަށް ކަޑައެޅިބައި އަދިވެސް ހުންނާނީ އެމެރިކާގައި ކަމަށް ވިދާޅުވިއެވެ. މިފައިސާ ދޫކުރެވޭނީ އެހަމަލާގައި ގެއްލުން ވީ މިންވަރު ކޯޓު މެދުވެރިކޮށް ކަޑައެޅުމަށް ފަހުގަ ކަމަށެވެ.
އަފްއާނިސްތާންގެ ރައްޔިތުންނަށް ބޭނުންވާ ޒަރޫރީ އެހީ ކަމަށްވާ ކާނާއައި ބޭސްފަދަ ތަކެތި ތާލިބާން ޒައާމަތުގެ ދަށުން ފަސޭހައިން ލިބެމުން ނުދާކަމަށް ޚަބަރު ލިބެއެވެ.
————-
