އޭޕްރީލް 7 ވަނަ ދުވަހު ލަކްޝްވަޑީޕްގެ ރަށްތަކުގެ ކައިރިން އެމެރިކާއަށް ނިސްބަތްވާ ބާރކް-ކްލާސް ޔޫއެސްއެސް ޖޯން ޕޯލް ޖޯންސް ނަމަކަށް ކިޔާ ނޭވީ އުޅަނދެއް ދަތުރު ކުރުމާ ގުޅިގެން އިންޑިއާގެ ޗައިނާއާދެކޮޅު ފިކުރުގެ މީހުންގެ ހިތްތަކުގައި ވަނީ ގިނަ ސުވާލުތަކެއް އުފެދިފައެވެ.

އިންޑިއާގެ މަޤްބޫލު ބައެއް ނޫސް ތަކުގައި ބުނެފައިވާ ގޮތުން މި ހާދިސާ އަކީ ”ކުއަޑް ގްރޫޕަށް ނިސްބަތްވާ ގައުމުތަކުން ދެ ގައުމެއްގެ މެދުގައި ދިމާވި މައްސަލައެކެވެ.“ ނަމަވެސް ޗައިނާއާ ދެކޮޅު ފިކުރުގެ އެނަލިސްޓުން ޓްވީޓްކޮށްފައިވާ ގޮތުގައި މި ހާދިސާއަކީ އެމެރިކާގެ ޕީއާރް އެކްސަސައިޒް ކުރިޔަށް ގެންދިޔުމުގައި ދިމާވި މައްސަލައަކާ ގުޅިގެން ދިމާވި ކަމެކެވެ. މި ހާދިސާއާ ގުޅިގެން އިންޑިއާގެ މިނިސްޓްރީ އޮފް ފޮރިން އެފެއާރސްއިން މާބޮޑު ފިޔަވަޅު ތަކެއް އަޅާފައެއް ނުވެއެވެ.

ޗައިނާ ކަނޑާއި އިންޑިއާ ކަނޑުގެ އަޑީގައި ގިނަ އަދަދެއްގެ އަގު ހުރި މިނެރަލް ތަކެއް ހުރުމާ ގުޅިގެން ގިނަ ބަޔަކު ދެކޭ ގޮތުގައި ޔޫއެސްއެސް ޖޯން ޕޯލް ޖޯންސް ލަކްޝްވަޑިޕް ރަށްތައް ކައިރިން ކުރި މިދަތުރަކީ އެމެރިކާއިން މި މިނެރަލްތަކަށް ފާރަލާ ކަމުގެ ނިޝާނެކެވެ. އެމެރިކާއިން މި މިނެރަލްތަކަށް ދަހިވެތިކަން ފާޅު ކޮށްފިނަމަ، ޗައިނާ އާއި ރަޝިއާގެ އިތުރުން ޔޫރަޕްގެ އެހެން ގައުމުތައްވެސް ހިމެނޭ ގޮތަށް މި މިނެރަލްތައް ހޯދުމަށް ވާދަވެރިކަން އުފެދިގެން ދާނެއެވެ.

މި ހާދިސާ އާއި ގުޅިގެން ބައެއް ފަރާތްތަކުންވަނީ އެމެރިކާގެ މަޝްހޫރު ސިޔާސީ އިލްމުވެރިއެއް ކަމަށްވާ ޖޯރޖް ކެންނާން ޕާރޝިއަން ގަލްފްގައި ހުރި ތެޔޮ ވަޅުތަކާއި ބެހޭގޮތުން ލިޔުއްވާފައިވާ ލިޔުމަށްނަޒަރު ހިންގާފައެވެ. އޭނާ ލިޔުއްވާފައިވާ ގޮތުގައި އެ ތެޔޮ ވަޅުތަކަކީ އެމެރިކާގެ ކުރިއެރުމަށް އެހީވާނެ އެއްޗަކަށްވުމުގެ ސަބަބުން އެ ވަޅުތައް ހިފުމަކީ އެމެރިކާއަށް މުހިންމު ކަމެކެވެ. އޭނާގެ ލިޔުމުގައި ވާފަދައިން އެމެރިކާއިންވަނީ މި ވަޅުތައް ހިފާފައެވެ.

އެމެރިކާގެ މި އުޅަނދު އިންޑިއާގެ ކަނޑުގެ ސަރަހައްދު ތެރެއިން ދަތުރު ކުރިތާ މާގިނަ ދުވަސްތަކެއް ނުވެ ބްރިޓަންގެ އެންމެ ފަހުގެ އެއާކްރާފްޓް ކެރިއަރު ކަމުގައިވާ އެޗްއެމްއެސް ކުއީން އެލިޒަބަތުގެ ފުރަތަމަ ދަތުރުގައި އިންޑިއާ ކަނޑަށް ދަތުރުކުރަން ވަނީ ނިންމާފައެވެ. އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ނެރެފައިވާ 116 ސަފުހާގެ ޑޮކިއުމެންޓްގެ ސުރުހީއިން އެކަނިވެސް އެޗްއެމްއެސް ކުއީން އެލިޒަބަތުގެ ފުރަތަމަ ދަތުރު އިންޑިއާ ކަނޑަށް ކުރަން ނިންމި ސަބަބާ ބެހޭ ގިނަ ސުވާލުތަކަކަށް ޖަވާބު ލިބިގެން ދެއެވެ. މި ޑޮކިއުމެންޓްގެ ސުރުހީ އަކީ ”ވާދަވެރި ބައިންއަގްވާމީ ދުނިޔެއެއްގައި އިނގިރޭސިވިލާތް: ދިފާޢީ، ޢަސްކަރީ، ޑިވޮލޮޕްމެންޓް އަދި ފޮރިން ޕޮލިސީތަކާ ބެހޭ ރިވިއު“ އެވެ.

އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ނެރެފައިވާ މި ޑޮކިއުމެންޓްގެ 66-69 ސަފުހާގައި ބައިނަލްއަގުވާމީ ދުނިޔޭގައި އިންޑޯ-ޕެސިފިކް ސަރަހައްދުގެ މުހިންމުކަންވަނީ ތަފްސީލު ކޮށްފައެވެ. އަދި މިޑޮކިއުމެންޓް ނިންމުމުގެ ގޮތުން ބޮރިސް ލިޔުއްވާފައިވަނީ ”އަންނަން އޮތް ދުވަސްތަކުގައި ކުރިމަތިވާނެ ބައިނަލްއަގުވާމީ މައްސަލަތައް ހައްލުކުރުމަށްޓަކައި އަހަރުމެން (ބްރިޓަން)ގެ ފަރާތުންވެސް އިންޑޯ-ޕެސިފިކް ސަރަހައްދަށް ކުރިން ދެމުންއައި ވަރަށްވުރެބޮޑު އަހައްމިއްޔަތުކަމެއް ދެވިގެން ދާނެއެވެ“.

ފްރާންސްގެ ޚާރިޖީ ވަޒީރު ޖީން ޑްރިއަން ވެސް އިންޑިއާއަށް ޑިޕްލޮމެޓިކް ދަތުރުފުޅެއް ކުރައްވަންވަނީ ނިންމާފައެވެ. އަދި ފްރާންސް ނޭވީއަށް ނިސްބަތްވާ 42،500 ޓަނުގެ ޗާރލްސް ޑެގަލް އެއާ ކްރާފްޓް ކެރިއަރެއް ވެސް އަންނަނީ އިންޑިއާގެ އައިއެންއެސް ވިކްރަމަދިތްޔާއާ އެކު ތަމްރީނުތަކެއް ކުރިޔަށް ގެންދިޔުމަށް އިންޑިއާއަށް ދަތުރު ކުރަމުންނެވެ.

މިހެން ކަންތައް އޮތުމާ ގުޅިގެން ބެލެވެނީ، އިންޑިއާއިން ބޮޑު މަންޒަރަށް ބެލުމެއްނެތް ކަމަށެވެ. މިހާރު ކުރިމަތިވެފައިވާ މި މައްސަލައިގެ އެންމެ އަޑީގައިވާ އަސްލަކީ ޗައިނާގެ ކުރިއެރުމާ ގުޅިގެން ދުނިޔޭގެ ބޮޑެތި ބާރުތަކުގެ ވާދަވެރިކަން ބޮޑުވުމެވެ. އިންޑިއާ ފިޔަވަޅު ނާޅައިފި ނަމަ މި ވާދަވެރިކަމުގެ ތެރޭގައި އިންޑިއާއަށް ބޮޑެތި ގެއްލުންތަކެއްވުމަކީ ނާދިރުކަމެއް ނޫނެވެ. އަދި އިންޑިއާ ކަނޑުގެ މައްޗަށް އިންޑިއާގެ ބާރެއްނެތްކަން ހާމަވެގެންދާނެއެވެ.