މާލޭ ގެއަކުން ވައްކަން ކުރި ކަމަށް ތުހުމަތު ކުރެވޭ ދެ މީހަކު ހޯދަން އެ މީހުންގެ ވީޑިއޯ ފުލުހުން އާންމުކޮށްފި އެވެ.
ފުލުހުން އާންމު ކުރި ވީޑިއޯއިން ފެންނަނީ ދެ ފިރިހެނަކު މާލޭ މަގުތަމަތިން ހިނގާފައިދާ މަންޒަރެވެ.
ފުލުހުން ބުނީ ވީޑިއޯއިން ފެންނަ ދެ މީހުންނަކީ މިދިޔަ މަހު 18 ވަނަ ދުވަހުގެ ވަގުތެއްގައި މާފަންނު ގެއަކުން ވައްކަންކޮށްފައިވާކަމަށް ތުހުމަތުކުރެވޭ މައްސަލައަކާ ގުޅިގެން މާފަންނު ޕޮލިހުން ކުރަމުންދާ ތަހުގީގަށް ހޯދަން ބޭނުންވެ، ފުލުހުން މިހާތަނަށް ކުރި މަސައްކަތުން ކާކުކަން ދެނެގަނެވިފައިނުވާތީ ނުހޯދިފައިވާ މީހުން ކަމަށެވެ.
ވީމާ ވީޑިއޯއިން ފެންނަ މީހުންނާ ބެހޭ އެއްވެސް މައުލޫމާތެއް ލިބިފައިވާނަމަ މާފަންނު ޕޮލިސްގެ ނަންބަރު 9660183 އަށް ގުޅުއްވައި ހިއްސާކުރުމަށް ވެސް ފުލުހުން އެދެމެވެ.
