އެއްބަޑު އެއްބަފާ ދެ އަންހެނަކު ޖާމިނުކޮށް ހައްޔަރުން ސަލާމަތްވެގެން އުޅުނު، މަކަރާއި ހީލަތުން ގިނަ އަދެއްގެ މީހުންގެ އަތުން ފައިސާ ހޯދި ކަމަށް ތުހުމަތުކުރެވޭ  ސީލައިފް ގްލޯބަލް އިންކް ޕްރައިވެޓް ލިމިޓެޑުގެ ވެރިޔާ އަހްމަދު މޫސާ (އައްމަޓީ)،އަންމަޓީ އަލުން ބަންދުކުރުމަށް ހައިކޯޓުން އަމުރުކޮށްފިއެވެ.

ހައިކޯޓުން އައްމަޓީ ހައްޔަރުކުރުމަށް އަމުރުކޮށްފައިވަނީ ކަފާލާތުގެ ދަށުން އޭނާގެ އެއްބަޑު އެއްބަފާ ދެ  އަންހެނަކު ޖާމިނުކޮށް ކްރިމިނަލް ކޯޓުން އޭނާ ދޫކޮށްލުމާއި ގުޅިގެން އެ މައްސަލަ ދައުލަތުން ހައިކޯޓުގައި އިސްތިއުނާފް ކުރުމާއި ގުޅިގެންނެވެ.

މިދިޔަ  މަހުގެ 20ވަނަ ދުވަހު ކްރިމިނަލް ކޯޓުން އައްމަޓީ ދޫކޮށްލީ އޭނާގެ ފަރާތުން ޖާމިނުވުމަށް ހުށަހަޅާފައިވާ އޭނާގެ އެއްބަނޑު އެއްބަފާ ދައްތަ މަރިޔަމް ނައީމާއާއި، ކޮއްކޮ އަފީފާ މޫސަ އަންމަޓީ ފިލައިގެން ނުދާނެކަމުގެ ޔަގީންކަން ދިނުމުން އެމީހުން ލައްވާ ޖާމިނުވުމަށް ހަދާފައިވާ އެއްބަސްވުމުގައި ސޮއިކޮށްފައެވެ.

ހައި ކޯޓަށް މި މައްސަލަ އިސްތިއުނާފް ކުރުމާއި ގުޅިގެން އެ ކޯޓުން ދަށުކޯޓުގެ ނިންމުން ބާތިލުކޮށް އައްމަޓީ އަލުން ބަންދުކުރަން އަމުރުކޮށް ނެރެފައިވާ ހުކުމުގައި ބުނެފައިވަނީ އައްމަޓީ ދޫކޮށްލައިފިނަމަ އޭނާ ފިލައިގެން ދިއުމުގެ ފުރުސަތު އޮންނާނެކަމަށެވެ. އަދި އޭނާއަކީ މީގެކުރިން ނުފެނިގެން އިންޓަޕޯލްގެ ރެޑް ނޯޓިސް ނެރެގެންވެސް، ނުހޯދި ގިނަ ދުވަސްތަކެއް ވަންދެން ރާއްޖެއިން ބޭރުގައި އުޅެފައިވާ މީހެއްކަމަށާ، އޭނާގެމައްޗަށް ތުހުމަތުކުރެވޭ މައްސަލައިގެ ބާވަތުން އޭނާ ދޫކޮށްނުލެވޭނެ ކަމަށެވެ.

އަދި  ޝަރީއަތް ނިމެންދެން އޭނާ ބަންދުގައި ބަހައްޓަން ކުރިން ނިންމާފައިވާ ނިންމުން ދެމިއޮންނާނެކަމަށް ހައި ކޯޓުން ވަނީ ކަނޑައަޅާފައެވެ.

ސީލައިފުން ހުޅުމާލޭގައި 3000 އެޕާޓްމަންޓު އެޅުމަށް ބޮޑު މަޝްރޫއެއް އިއުލާނު ކުރީ 2016 ވަނަ އަހަރު އިއުލާން ކުރުމަށްފަހު، ފްލެޓް ގަތުމަށް އެތައް ބަޔަކު ދެއްކި ފައިސާއަށް އެ ކުންފުނީގެ ވެރިން ހިޔާނަތްތެރިވެ އެ ފައިސާ އަނބުރާ ދީފައިނުވާތީ 200 އަށްވުރެ ގިނަ މީހުން ވަނީ އެ ކުންފުންޏާ ދެކޮޅަށް ސިވިލް ކޯޓްގައި ވަނީ ދައުވާކޮށްފައެވެ.

މި މައްސަލައިގެ ތެރެއަށް އެޗްޑީސީ ވަދެ ގެއްލުންވި ފަރާތްތަކަށް 45 މިލިއަން ރުފިޔާގެ ބަދަލެއް ކަނޑައަޅާ ބޯހިޔާވަހިކަމުގެ އެހެން މަޝްރޫއަކުން ފްލެޓް ގަތުމަށް ފުރުސަތު ދިނުމަށް އެއްބަސްވުމެއް އެކުލަވާލާ ކޯޓުން ބޭރުގައި އެ މައްސަލަ ވަނީ ހައްލުކޮށްފައެވެ.

މި މައްސަލައާ ގުޅިގެން ފިލައިގެން އުޅެނިކޮށް އެކުންފުނީގެ ވެރިޔާ އަހްމަދު މޫސާ (އައްމަޓީ)ސްރީލަންކާއިން ހައްޔަރުކޮށް ރާއްޖެ ގެނެސްފައިވަނީ މާޗްމަހުގެ 24ވަނަ ދުވަހުއެވެ.

އައްމަޓީ ހައްޔަރުކޮށްގެން މާލެ ގެނެސް މައްސަލަ ތަހުގީގުކުރުމަށްފަހު އޭނާގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ވަނީ ހިޔާނާތުގެ 42 ދައުވާއެއް އުފުލާފައެވެ. މީ އެނާ ހިޔާނާތްތެރިވި ކޮންމެ މީހެއްގެ ދައުވާ ވަކިވަކިންނެވެ. އޭނާގެ މައްޗަށް އުފުލާފައިވާ ދައުވާ ސާބިތުވެއްޖެނަމަ، 65 އަހަރުގެ ޖަލު ހުކުމެއް އަންނާނެވެ.