އެޑިއުކޭޝަން މިނިސްޓަރު ޑރ. އައިޝަތު އަލީ ސިވިލް ކޯޓަށް ހާޒިރު ވުމަށް އަންގައިފިއެވެ.
މިނިސްޓަރު އައިޝަތު އަލީ ކޯޓަށް ހާޒިރުކުރަނީ މަންދު ކޮލެޖު ހިންގާ ކުންފުނި، މާލޭހައި ޕްރައިވެޓް ލިމިޓެޑުން ކޮށްފައިވާ އިހުމާލުވުމުގެ ދައުވާއަކާ ގުޅިގެންނެވެ.
އެ ދައުވާ އާއި ގުޅިގެން މި އަދު 9:50އަށް ކޯޓަށް ހާޒިރުވާން އެކަމަނާއަށް ވަނީ އަންގާފައެވެ.
މިނިސްޓަރު އައިޝަތު އަލީއަށް ދައުވާ ކުރަނީ މަންދު ކޮލެޖަށް ބަދަލުގެ ގޮތުގައި ދައުލަތުން ދައްކަން ޖެހޭ 15 މިލިއަން ރުފިޔާ ދިނުމަށް ސިވިލް ކޯޓުން އެންގި މުއްދަތުތެރޭގައި އެ ފައިސާ ދީފައިނުވާތީއެވެ. އެފައިސާ ހަވާލުކޮށްފައިވަނީ ކޯޓުން ދިން މުއްދަތު ފަހަނައަޅާ ދިއުމަށްފަހު ކަމަށް ވެއެވެ.
އެއް މަސް ދުވަހުގެ ތެރޭގައި ބަދަލުގެ ގޮތުގައި 15 މިލިއަން ރުފިޔާ މަންދު ކޮލެޖަށް ދިނުމަށް އެޑިއުކޭޝަން މިނިސްޓްރީގެ މައްޗަށް ސިވިލް ކޯޓުން ހުކުމް ކުރީ މިދިޔަ އޭޕްރިލް މަހުގެ 19ވަނަ ދުވަހުއެވެ.
