މާލޭ މިސްކިތްތަކުގައި ކެމެރާހަރުކުރާނެ ބަޔަކު ހޯދުމަށް މާލޭ ސިޓީ ކައުންސިލުން އިއުލާންކޮށްފި އެވެ.
މާލޭ ސިޓީ ކައުންސިލްން ބުނީ މިސްކިތްތަކުގައި ކެމެރާ ހަރުކުރަނީ އެ ކައުންސިލުގެ ފަރާތުން، މާލޭގެ މިސްކިތްތައް މަރާމާތުކޮށް އާބާތުރަ ފިލުވުމަށް ކުރިއަށްގެންދާ މަޝްރޫއުގެ ދަށުންކަމަށެވެ.
ސިޓީ ކައުންސިލުން ބުނީ މިކަމަށް ޝައުޤުވެރިވެލައްވާ ފަރާތްތަކުން މިމަހުގެ 17 ވަނަ ދުވަހުގެ 09:00 ގައި ބީލަން ރަޖިސްޓްރީ ކުރުމާއި މައުލުމާތު ސާފްކުރުން އެއިދާރާގައި އޮންނާނެ ކަމަށެވެ. އަދި އަގުހުށަހެޅުން މިމަހު 23 ގައި އޮންނާނެ ކަމަށް ވެސް ސިޓީކައުްސިލުން ބުނެއެވެ.
ސިޓީ ކައުންސިލުން ބުނީ ބީލަމުގައި ރަޖިސްޓްރީ ވެވޭނެ އެންމެ ފަހު ވަގުތަކީ މިމަހު 17 ވާ ބުދަ ދުވަހުގެ 09:00 ކަމަށާ، ބީލަމަށް ރަޖިސްޓްރީ ކުރަން ދެވިފައިވާ ގަޑީގެ ފަހުން ލިބޭ އެއްވެސް ފޯމެއް ބަލައި ނުގަނެވޭނެ ކަމަށެވެ.
މާލޭ ސިޓީކައުންސިލުން މިސްކިތްތަކުގައި ކެމެރާ ހަރުކރުމަށް ނިންމާފައި މިވަނީ މިސްކިތްތަކުގައި ނޭދެވޭ ގިނަ އަމަލުތައް ގިނަވަމުން އަންނަ ދަނޑިވަޅެއްގައެވެ. އެގޮތުން ބައެއް މިސްކިތްތަކަށް ޑްރަގް ބޭނުންކުރާ ކަމަށް ތުހުމަތު ކުރވޭ މީހުންވަދެ މިސްކިތުގެ ކަރާމާތަށް އުނިކަންނަ ގޮތަށް އަމަލު ބަހައްޓާކަން ފާހަގަކޮށްލެވެއެެވެ.
