މަހިންދަ ރާޖަޕަކްސަ ޓްރޮފީ މުބާރާތުގައި ރާއްޖެ އާއި ސްރީ ލަންކާ ކުޅޭ މެޗު މާދާމާ ރެއަށް ފަސް ކުރުމަށް ފަހު އަނެއްކާ މާދަމާ ހަވީރަށް ބަދަލުކޮށްފި އެވެ.
ރޭ ކުޅޭ ގޮތަށް އޮތް މެޗު މާދާމާ ހަވީރަށް ފަސްކުރީ ކޮލަމްބޯ އަށް ބޯކޮށް ވާރޭ ވެހި މޫސުން ގޯސް ވުމުގެ ސަބަބުންނެވެ. ލަންކާއަށް މިހާރު ކުރަމުންދާ ވިއްސާރައިގެ ސަބަބުން އެ ޤައުމުގެ ބޮޑު ސަރަހައްދަކަށް ރެޑް އެލާޓް ވަނީ ނެރެފައެވެ.
ސްރީލަންކާގެ މީޓިއޮރޮލޮޖީ ޑިޕާޓްމަންޓުން ރެޑް އެލާޓް ނެރުނީ ކޮލޮމްބޯ ހިމެނޭ ހުޅަނގު ޕްރޮވިންސާއި، ހުޅަނގު އުތުރު، ސަބަރަގަމުވާ އަދި އުތުރު ޕްރޮވިންސް ހިމެނޭ ސަރަހައްދުތަކަށެވެ.
ފޯ ނޭޝަންސް ކަޕްގައި ކުޅެނީ ރާއްޖެ އާއި ލަންކާގެ އިތުރުން ސީޝެލްސް އާއި ބަންގްލަދޭޝް އެވެެ.
މެޗު މާދަމާ ރެއަށް ފަސްކުރިކަން އިއުލާންކޮށް، ފުޓްބޯލް ސްރީ ލަންކާ އިން މިއަދު ހަވީރު އާންމުކުރި ޕޯސްޓުގައިވާ ގޮތުން ރާއްޖެ-ލަންކާގެ މެޗު އޮންނާނީ ލަންކާގެ ގަޑިން މާދަމާ ރޭގެ 9 ޖަހާއިރު އަދި ރާއްޖޭގެ ގަޑިން 8:30 ގަ އެވެ.
އެކަމަކު، ރާއްޖޭގެ ފުޓުބޯޅަ އިދާރާގެ ރައީސް ބައްސާމް އަދީލް ޖަލީލް ފަހުން ކުރެއްވި ޓްވީޓެއްގައި ވިދާޅުވީ، މިރޭ ކުޅެން ހަމަޖެއްސި ރާއްޖެ-ލަންކާގެ މެޗު މާދަމާ ހަވީރަށް ބަދަލު ކޮށްފައިވާ ކަމަށެވެ. އޭނާގެ ޓްވީޓްގައިވާ ގޮތުން މެޗު ފަށާނީ ރާއްޖޭގެ ގަޑިން ހަވީރު 3:30 ގަ އެވެ. އެއީ ލަންކާގެ ގަޑިން 4 ޖަހާއިރެވެ.
ރާއްޖޭން ވަނީ 2012 ވަނަ އަހަރު ލަންކާގައި ބޭއްވި މަހިންދުރަ ރާޖަޕަކްސަ މުބާރާތް ކާމިޔާބު ކޮށްފަ އެވެ. އެ ފަހަރުގެ މުބާރާތް ބޭއްވީ 23 އަހަރުން ދަށަށް ހާއްސަ ކޮށްގެންނެވެ. އެ ފަހަރު ފައިނަލުގައި ރާއްޖެ މޮޅުވީ ޕާކިސްތާނާ ވާދަކޮށް 2-1 އިންނެވެ.
