ސިވިލް ސާވިސް މުވައްޒަފުންގެ މަސައްކަތުގެ ވަގުތު އިތުރު ކުރުމާމެދު ވިސްނާ، އެކަމާ މަޝްވަރާކުރާނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެ އެވެ.
މިނިމަމް ވޭޖް އިއުލާނު ކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސިވިލް ސާވިސް މުވައްޒަފުން މިހާރު މަސައްކަތް ކުރަނީ ހަ ގަޑިއިރަށް ކަން ފާހަގަކުރައްވަމުން މިނިސްޓަރު ފައްޔާޒު ވިދާޅުވީ ޕަބްލިކް ސެކްޓާގައި ހިމެނޭ ސިވިލް ސާވިސް މުވައްޒަފުންގެ މަސައްކަތުގެ ވަގުތު ދުވާލަކު އަށް ގަޑިއިރަށް އިތުރު ކުރުމަށް މިނިމަމް ވޭޖު ބޯޑުން ލަފާ ދީފައިވާ ކަމަށާ އެކަމާ މަޝްވަރާ ކުރާނެ ކަމަށެވެ.
”މިކަމާ ގުޅޭގޮތުން އަޅުގަނޑުމެން ކުރިއަށް އޮތް ތަނުގައި ވިސްނާ، އެކަމާ ގުޅިގެން މަޝްވަރާ ކުރާނެ ކަމެއް،“ ފައްޔާޒު ވިދާޅުވި އެވެ.
މިނިސްޓަރު ވިދާޅުވީ ސިވިލް ސާވިސް ހިމެނޭ ޕަބްލިކް ސެކްޓަރަށް ކަނޑައަޅާފައިވަނީ މިނިމް ވޭޖަކީ ހަ ގަޑިއިރު މަސައްކަތް ކުރާ ދާއިމީ މުވައްޒަފުންނަށް މަހަކު 7،000 ރުފިޔާ ކަމަށެވެ. އަދި އެއަށް ވުރެ މަދުން މަސައްކަތް ކުރާ މީހުންނަށް ގަޑިއިރަކަށް 33.65 ރުފިޔާ ކަމަށެވެ.
މިނިސްޓަރު ވިދާޅުވީ މުވައްޒަފުންނަށް ދޭނެ އެންމެ ކުޑަ އުޖޫރަ ކަނޑައެޅިގެން ދިއުމާއެކު ވަޒީފާ އަދާ ކުރާ މީހުންނަށް ހެޔޮ ބަދަލުތަކެއް އަންނާނެކަމަށެވެ. އަދި މިނިމަމް ވޭޖުގެ އަސަރު ސިވިލް ސާވިސްގައި ވަޒީފާ އަދާކުރާ މީހުންގެ ތެރެއިން 15،000 މުވައްޒަފުންނަށް، ނުވަތަ ގާތްގަނޑަކަށް ދެ ބައިކުޅަ އެއްބައި މުވައްޒަފުންނަށް ހެޔޮ ގޮތަކަށް ކުރާނެ ކަމަށް ވެސް މިނިސްޓަރު ވިދާޅުވިއެވެ.
