ހޮރްމުޒް ކަނޑުއޮޅިން ނުކުންނަން އުޅުމުގެ ތެރޭގައި، ކަނޑުއަޑީގެ މައިނެއްގައި ޖެހި ސާފުނުކުރާ ތެޔޮ އުފުލަމުންދިޔައި ބޮޑު ސުޕަޓޭންކަރެއް ގޮވައި، އަލިފާން ރޯވެއްޖެއެވެ. އީރާނުގެ މީޑިއާތަކުން ސިފަކޮށްފައިވާ ގޮތުގައި އެ އުޅަނދު ދަތުރުކުރަމުން ދިޔައީ ހުއްދަނެތް އަދި ނުރައްކާތެރި މަގަކުންނެވެ.

އީރާނުގެ ޕްރެސް ޓީވީން އޮކްޓޫބަރު 11 ގައި ރިޕޯޓްކޮށްފައިވާ ގޮތުގައި، މި ހާދިސާ ހިނގާފައިވަނީ ސްޓްރެޓީޖިކް ގޮތުން މުހިންމު އެ ކަނޑުއޮޅިން އެ އުޅަނދު ނުކުންނަން މަސައްކަތް ކުރަމުން ދަނިކޮށެވެ. އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނި ގޮތުގައި، މައިނުގައި ޖެހުމުގެ ކުރިން އެ ޓޭންކަރުގެ ނެވިގޭޝަނާއި ޖީޕީއެސް ހުރީ ނިއްވާލާފައެވެ.

ހާދިސާ ހިނގި ސަރަޙައްދާއި ވަރަށް ދުރުގައި، އައްސޭރިފަށުގައި ދިރިއުޅޭ މީހުންނަށްވެސް ފެންނަ ވަރަށް އެ އަލިފާންގަނޑު ބޮޑުވެގެން ދިޔަ ކަމަށް ރިޕޯޓްތައް ބުނެއެވެ.

އައިއާރްޖީސީން ވަނީ ސަލާމަތީ ގަވާއިދުތަކަށް ބޯނުލަބައި، ހުއްދަނެތް މަގުތަކުން ދަތުރުކުރާ އުޅަނދުފަހަރަށް ހަރުކަށި ފިޔަވަޅުތަކާ ކުރިމަތިލާންޖެހޭނެ ކަމުގެ އިންޒާރު ދީފައެވެ. އަދި އެފަދަ އުޅަނދުފަހަރާ ދެކޮޅަށް އަޅާ ފިޔަވަޅުތައް ހޮރްމުޒް ކަނޑުއޮޅިން ބޭރުން މުޅި ސަރަޙައްދަށް ފުޅާކުރެވޭނެ ކަމަށްވެސް ބުނެފައިވެއެވެ.

އީރާނުން ސިފަކުރާ ގޮތުގައި އެމެރިކާ-އިސްރާއީލުގެ އުދުވާނު ފެށުނީއްސުރެ، އެ ގައުމުގެ އަސްކަރިއްޔާއިން އެ ކަނޑުއޮޅީގެ ފުރިހަމަ ކޮންޓްރޯލް ނަގާފައިވާ ކަމަށް އީރާނުން ދަނީ ބުނަމުންނެވެ. ހިނގަމުންދާ ހަމަނުޖެހުންތަކާ ގުޅިގެން އެ ކަނޑުއޮޅި ހުރަސްކޮށް ކުރާ ވިޔަފާރި ދަތުރުފަތުރު ވަރަށް ބޮޑަށް ދަށަށް ގޮސްފައިވާއިރު، ދަތުރުކުރާ އުޅަނދުފަހަރުގެ އަދަދު ވަނީ ދިހައަކަށް ވުރެ ދަށަށް ވެއްޓިފައެވެ. އަދި އެމެރިކާއިން އީރާނުގެ ޝަރުތުތައް ފުރިހަމަކޮށް، އީރާނުގެ އިތުބާރު އަލުން ހޯދުމަށް ފިޔަވަޅުތައް އަޅަންދެން އެ ކަނޑުއޮޅި އަލުން ހުޅުވައިނުލާނެ ކަމަށް ތެހެރާނުން ވަނީ ބުނެފައެވެ.

މި ނުތަނަވަސްކަން އޮތް ނަމަވެސް، ވޮޝިންޓަނާއެކު މަޝްވަރާތައް ކުރިއަށް ގެންދިއުމުގެ ޝައުގުވެރިކަން އީރާނުން އަދިވެސް ގެންގުޅޭ ކަމަށް އީރާނުގެ ރައީސް މަސްއޫދު ޕެޒެޝްކިއާން ވަނީ ވިދާޅުވެފައެވެ.