އެމެރިކާގެ ޓެނެސީ ގައި މަރުގެ ހުކުމް އިއްވާފައި ހުރި އަންހެނެއްގެ ގަޔަށް،މެރުމަށް ޖަހާ އިންޖެކްޝަން ދެފަހަރު ޖެހުމުންވެސް މަރުވެފައި ނުވާތީ މިހާރު ހޮސްޕިޓަލަށް ގެންގޮސް ފަރުވާ ދެމުން ދާކަމަށް ޚަބަރު ލިބެއެވެ.

ދެބުރަށް އިންޖެކްޝަން ޖެހުމުންވެސް އޭނާގެ ހިތް ހިނގަމުންދާކަމަށާ އަދި ގުގުރި ދަމާ އަޑުވެސް އިވެމުން ދާކަމަށް ބުނެ މެރުމުގެ ކަންތައް މަޑުޖައްސާލުމަށް އޭނާގެ ގާނޫނީ ޓީމުން އެދުނެވެ.އެއަށްފަހު މަރުގެ އަދަބުދޭ ކޮޓަރިން ނެރެގެން ހޮސްޕިޓަލަށް ގެންގޮސް ފަރުވާ ދެމުން ދާކަމަށް ޚަބަރުތައް ބުނެއެވެ.
މިހާރު އުމުރުން 50 އަހަރުވެފައިވާ ކްރިސްޓާ ޕައިކް ގެ މައްޗަށް މަރުގެ ހުކުމް އިއްވުނީ 1996 ވަނަ އަހަރު ވަޒީފާ ތަމްރީނު ކޭމްޕަކުން އޭނާ އާއި ބައްދަލްވި ކޯލީން ސްލެމަރ ކިޔާ އުމުރުން 19 އަހަރުގެ އަންހެނެއްގެ ގައިގައި ތަޅާ މަރާލުމާއި ގުޅިގެންނެވެ. ޕައިކް ، ސްލެމަރ މަރާލީ އޭނާގެ އޭރުގެ ލޯބިވެރިޔާ އަތުލަން އުޅޭ ކަމަށް ބުނެކަމަށް ވެއެވެ.މިމައްސަލައިގައި ޕައިކްގެ ލޯބިވެރިޔާގެ މައްޗަށްވެސް ވަނީ އުމުރު ދުވަހުގެ ޖަލު ހުކުމެއް އިއްވާފައެވެ.
ޕައިކް ގެ މަރުގެ ހުކުމް ތަންފީޒު ކުރުމަށް ބުދަދުވަހުގެ ރޭ 8ޖެހިއިރު ބޭއްވި ސެޝަންގައި ވާނުވާ ނޭނގި އެތައް އިރެއް ދިޔަ ކަމަށް ވެއެވެ. އެތައް ފަހަރަކު ފަރުދާ ވައްޓާފަ ނަގާ އަދި ބަލަން ތިބި މީހުން ވެސް ދެފަހަރު ނެރުނު ކަމަށް ވެއެވެ. އަދި ވަކި ހަމައަކުން މީޑިޔާވެސް ނެރުނު ކަމަށް ޚަބަރުތައް ބުނެއެވެ.
ޓެނެސީގައި މަރުގެ ހުކުމް ތަންފީޒު ކުރުމަށް އޮންނަ ޕްރޮޓޮކޯލްގައި އެއްފަހަރު އިންޖެކްޝަން ޖަހައިގެން މަރު ނުވެއްޖެ ނަމަ ދެވަނަ ފަހަރު އިންޖެކްޝަން ޖެހުމަށް ހުއްދަ ދެއެވެ. ނަމަވެސް ދެފަހަރު ޖައިގެން މަރު ނުވެއްޖެ ނަމަ ދެން ހަދަން ޖެހޭ ގޮތެއް އަދި ކަންޑައަޅާފައި ނުވާ ކަމަށް ވެއެވެ.