ދިހަ އަހަރު ވަންދެން ބަންދުކޮށްފައި އޮތް ގަލޮޅު ސިޓީ ޕާކު އަލުން ތަރައްގީކުރުމަށްފަހު އިއްޔެ ހުޅުވައިފިއެވެ.
މާލޭ ސިޓީގެ މޭޔަރު އާދަމް އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ 10 އަހަރު ވަންދެން ޓިނު ޖަހައިގެން ބަންދުކޮށްފައި އޮތް އެތަން އަލުން ތަރައްގީކުރުމުގެ ބޭނުމުގައި ސިޓީ ކައުންސިލުންވަނީ 2024 ވަނަ އަހަރު އެތަން ޑިޒައިންކޮށްފައި ކަމަށެވެ.
އަދި އަލުން ޑިޒައިން ކޮށް ވަރަށް ފުރިހަމައަށް ހަދައި، އެ ޕާކު ހުޅުވިގެން ދިއުމަކީ، ލިބޭ ވަރަށް ބޮޑު އުފަލެއް ކަމަށެވެ.
”ސިޓީ ޕާކު އަލުން ހަދައި ހުޅުވުނީ، ބެޑްމިންޓަން ކޯޓަކާއި، ތްރީއޮންތްރީ ބާސްކެޓް ބޯޅަ ކޯޓަކާއި އެކި ޢުމުރުފުރައިގެ މީހުން ކަސްރަތު ކުރާނެ ތަނަކާއި، ހިތްހަމަ ޖައްސާލުމަށް މަޑުކޮށްލާނެ ޖާގައާއި، ކުޑަކުދިން ކުޅުމަށް ޚާއްޞަ ސަރަޙައްދަކާއި އަދި އެކި ކަހަލަ އިވެންޓްތައް ބާއްވާނެ ތަނަކާއެކު، ވަރަށް ގިނަ ގޮތްގޮތަށް، ރައްޔިތުންނަށް ބޭނުންހިފޭނެ ގޮތަކަށް ޑިޒައިންކޮށްގެން.“ މޭޔަރު އާޒިމް ވިދާޅުވިއެވެ.
މާލެ ސިޓީގެ މޭޔަރުކަމުގައި ހޭދަކުރި މުއްދަތުގައި، މަސައްކަތުގެ މައިގަނޑު އެއް އަމާޒަކީ، ޖާގަ ލިބެން އޮތް އެންމެ މަތީ މިންވަރަކަށް، މި ފަދަ ހިތް ފަސޭހަ މައިޒާންތައް މާލެ ސިޓީގައި ގާއިމްކޮށް، ރައްޔިތުންނަށް އުފާވެރިކަން ގެނެސް ދިނުން ކަމަށް މޭޔަރު ވިދާޅުވިއެވެ.
މޭޔަރު އާޒިމް ވަނީ އެ ޕާކު ބޭނުންކުރާ ހުރިހައި ފަރާތްތަކުން ޕާކު ރީތިކޮށް ބޭއްވުމަށް މަސައްކަތްކޮށް ދެއްވުމަށް، އެދިވަޑައިގެންފައެވެ.
One Response
އަދި ނުދެކެން ތިވަރުގެ މޭޔަރެއް މާލެ މާލެއެއްގެ ސިފަ ގެންނަން މަސައްކަތް ކުރާ މޭޔަރެއް އަދި އެއްދައުރު ދޭން އެބަޖެހޭ.