ދިވެހިރާއްޖޭގެ ޚާރިޖީ ސިޔާސަތާ ގުޅޭގޮތުން ފަހަކަށް އައިސް ދެކެވުނު ވާހަކަތަކާ ގުޅިގެން، ބައިނަލްއަޤްވާމީ މައްސަލަތަކުގައި ގެންގުޅޭ މެދުމިނުގެ ސިޔާސަތަށް ބަދަލު އައިސްފައިވާކަމަށް ދެކެވޭ ވާހަކަތައް ސަރުކާރުން ވަނީ ބަލައިނުގަނެ ދޫކޮށްލައްވާފައެވެ.
ޚާރިޖީ ވަޒީރު އަބްދުﷲ ޚަލީލް ދިވެހިރާއްޖޭގެ މައުގިފު ސާފުކޮށްދެއްވަމުން ވިދާޅުވީ، ޤައުމުގެ ޚާރިޖީ ސިޔާސަތު ކުރީގެ އުސޫލުތަކާ އެއްގޮތަށް ދެމެހެއްޓިފައިވާ ކަމަށެވެ.
އެމަނިކުފާނު އިތުރަށް ވިދާޅުވީ ދިވެހިރާއްޖޭގެ ޚާރިޖީ ސިޔާސަތުގައި ހުރިހާ ޤައުމުތަކަކާއެކު ހަމަހަމަ ގުޅުން ބޭއްވުމަށް އިސްކަންދޭ ކަމަށެވެ. ”އަޅުގަނޑުމެން ގެންގުޅެނީ ހުރިހާ ޤައުމުތަކަކާއެކު ގާތް އަދި އެކުވެރި ގުޅުމެއް ބިނާކޮށް، އަޅުގަނޑުމެންގެ މިނިވަންކަމާއި ސިޔާދަތު ރައްކާތެރިކުރުމަށް ބިނާވެފައިވާ ހަމަހަމަ ޚާރިޖީ ސިޔާސަތެކެވެ. މިއީ ދިވެހި ރައްޔިތުންގެ މަސްލަހަތު ޙިމާޔަތްކުރުމަށްޓަކައެވެ.“
މިނިސްޓަރ މިގޮތައް ބަޔާން ނެރުނީ ޔުކްރެއިން-ރަޝިޔާ ހަނގުރާމައިގައި ދިވެހިރާއްޖެއިން ވަކި ފަރާތަކަށް ޖެހިއްޖެ ކަމަށް ސޯޝަލް މީޑިއާގައި ދެކެވުނު ވާހަކަތަކާ ގުޅިގެންނެވެ. މިކަން ވަޒީރު ޚަލީލް ވަނީ ސީދާ ދޮގުކުރައްވާފައެވެ. “ ބައިނަލްއަޤްވާމީ މައިދާނުގައި ރާއްޖެއިން ގެންގުޅޭ ސިޔާސަތުތައް ބަދަލެއް ނުވޭ. އ.ދ. ގައި ރާއްޖެއިން ވޯޓު ދެމުންދާގޮތް ބައްލަވާލެއްވުމުން އެކަން ސާފުވާނެ.“
ދިވެހިރާއްޖޭގެ ޚާރިޖީ ސިޔާސަތު އަމާޒުކުރެވިފައިވަނީ ޤައުމުގެ މަސްލަހަތު ރައްކާތެރިކޮށް، ބައިނަލްއަޤްވާމީ ޤާނޫނުތަކަށް އިޙްތިރާމްކުރުމާއެކު، ދިވެހި ރައްޔިތުންނަށް ފައިދާވާނެ ގޮތަށް ހުރިހާ ޤައުމުތަކަކާއެކު ގާތް ގުޅުން ދެމެހެއްޓުން ކަމަށް ވަޒީރު އަލުން ވެސް ވަނީ ފާހަގަކުރައްވާފައެވެ.
މި ބަޔާނުން އަލިއަޅުވާލަނީ ދިވެހިރާއްޖޭގެ މެދުމިނުގެ ސިޔާސަތާއި އުސޫލީ ޑިޕްލޮމަސީއަށް ކުރާ އިލްތިޒާމު އަލުން ކަށަވަރުކޮށްދިނުމަށާއި، ސިޔާސަތު ބަދަލުވެއްޖެ ކަމަށް ދެކެވޭ ވާހަކަތައް ދޮގުކޮށް، ޤައުމުގެ ބައިނަލްއަޤްވާމީ މައުގިފުތަކަށް ގެންގުޅޭ އުސޫލުތައް ދަމަހައްޓާނެކަން ހާމަކޮށްދިނުމަށެވެ.
