ޕީއެސްއެމް ގެ މެނޭޖިން ޑިރެކްޓަރ މުހައްމަދު ސައީދު އިސްތިއުފާ ދެއްވުމުގައި އެއްވެސް ސިޔާސީ ޕްރެޝަރެއް ނެތް ކަމަށް އޭނާ ވިދާޅުވެއްޖެއެވެ.

ސައީދު، މަގާމާ ހަވާލުވެ ހަތަރު މަސް ފަހުން އިސްތިއުފާ ދެއްވީއެވެ. އޭނާ ތަކުރާރުކޮށް ވިދާޅުވީ އޭނާ އިސްތިއުފާ ދެއްވާފައިވަނީ ސިއްޙީ ސަބަބުތަކާ ހުރެ ކަމަށެވެ.
”އަޅުގަނޑު ކުރިއަށް އޮތް ތަނުގައި ވަރަށް ގިނަގިނައިން ރާއްޖެއިން ބޭރުގައި އުޅެން ޖެހޭނެ. އެއީ މިވަގުތު ސިއްހީ ހާލަތު ހުރި ގޮތުން ކުރަން ޖެހޭ ކަމެއް. އެހެންވެ، މަގާމުގައި ފުރަމުން އެ ގޮތަށް އުޅެވޭކަށް ނެތީ،“ ސައީދު ވިދާޅުވިއެވެ.
އޭނާ ވިދާޅުވީ ޕީއެސްއެމްގައި އޭނާގެ މަސައްކަތުގައި ރައީސް ޑރ. މުހައްމަދު މުއިއްޒުގެ އެހީތެރިކަމާއި އެއްބާރުލުން ލިބިވަޑައިގެންނެވި ކަމަށެވެ. ”ސިޔާސީ ގޮތުން އެއްވެސް މައްސަލައެއް ނެތް،“ ސައީދު ވިދާޅުވި އެވެ.
ސައީދަކީ އޭޕްރީލް 2019 އާ ހަމައަށް އެޑިއުކޭޝަން މިނިސްޓްރީގައި އެންމެ ދުވަސްވީ މުވައްޒަފުންގެ ތެރެއިން އެކެކެވެ. އޭނާ އެންމެ ފަހުން ހުންނެވީ އެ މިނިސްޓްރީގެ ސިވިލް ސާވިސްގެ އެންމެ އިސްވެރިޔާ ނުވަތަ ޕާމަނަންޓް ސެކްރެޓަރީގެ މަގާމުގަ އެވެ.
2017 ވަނަ އަހަރު ނޮވެމްބަރު މަހުގައި ކުރީގެ ރައީސް އަބްދުﷲ ޔާމީންގެ ވެރިކަމުގައި ސައީދު ޕާމަނަންޓް ސެކްރެޓަރީ ކަމުގެ މަގާމަށް އައްޔަންކުރެވުނެވެ. އަދި 2019 ވަނަ އަހަރުގެ ޖެނުއަރީ އިން އޭޕްރީލް މަހާ ހަމައަށް އޭނާ އެ މަގާމުން ސަސްޕެންޑު ކުރި، އޭޕްރީލް މަހުގައި މަގާމުން ވަކިކުރެވުނެވެ.
ސިވިލް ސާވިސް ކޮމިޝަނުން ސައީދާ މެދު ފިޔަވަޅު އެޅީ 2018 ވަނަ އަހަރުގެ ރިޔާސީ އިންތިޚާބާ ގުޅިގެން އެޑިއުކޭޝަން މިނިސްޓްރީގެ ސިވިލް ސާވިސް މުވައްޒަފުންނާ ދޭތެރޭ ގާނޫނާއި ގަވައިދާ ހިލާފަށް އަމަލުކުރި ކަމަށް ބުނެ އެވެ.