އިސްރާއީލުން ޣައްޒާގައި އިންސާނީ އެހީތެރިކަން ފޯރުކޮށްދެމުންދިޔަ 4 މީހަކު މަރާލައިފިއެވެ.
މީޑިއާ ރިޕޯޓުތައް ބުނާގޮތުން ފާއިތުވި 24 ގަޑިއިރުތެރޭގައި އިސްރާއީލުން ޣައްޒާއަށް ދިން ހަމަލާތަކުގައި އިންސާނީ އެހީދޭ ޖަމިއްޔާތަކެއް ކަމަށްވާ ސޭވް ދަ ޗިލްޑްރަންސް އާއި ވޯލްޑް ސެންޓްރަލް ކިޗަންގެ މުވައްޒަފަން ވަނީ މަރުވެފައެވެ.
އިއްޔެ ޣައްޒާގައި ހަރަކާތްތެރިވަމުން އަންނަ އިންސާނީ އެހީދޭ ހަތަރު މަސައްކަތްތެރިން މަރުވެފައި ވަނީ އިސްރާއީލުގެ ވައިގެ ހަމަލާތަކުގައެވެ. ވޯލްޑް ސެންޓްރަލް ކިޗަންގެ ތިން މުވައްޒަފަކު މަރުވެފައި ވަނީ އެމީހުންގެ އުޅަނދު ޚާން ޔޫނިސްގައި ދަތުރުކުރަމުން ދަނިކޮށެވެ. އަދި ހަތަރު ވަނަ މީހާ، ސޭވް ދަ ޗިލްޑްރަންގެ ސްޓާފް މެމްބަރަކު މަރާލާފައި ވަނީ ދެކުނު ޚާން ޔޫނިސްއަށް ދިން ވައިގެ ހަމަލާއެއްގައެވެ.
ފަލަސްތީނުގެ ޣައްޒާގައި އިންސާނީ އެހީދޭ ފަރާތްތައް މަސައްކަތް ކުރަނީ ތަސައްވަރު ނުކުރެވޭ ހާލަތްތައް ތަހައްމަލު ކުރަމުންދާ ދެ މިލިއަނަށް ވުރެ ގިނަ ފަލަސްތީނުގެ ރައްޔިތުންނަށް އެކަށީގެންވާ ކާނާ، ފެން، ސާފުތާހިރުކަން، ބޯހިޔާވަހިކަން، ސިއްހީ ފަރުވާ، ނުވަތަ ތައުލީމު ނުލިބި، ދާއިމީ ނުރައްކަލުގެ ދަށުގައި އުޅޭ ފަލަސްތީނު ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށެވެ.
އިންސާނީ އެހީފޯރުކޮށްދެމުންދާ ފަރާތްތައް މެރުމަކީ ބައިނަލްއަގްވާމީ ގާނޫނުތަކާ ހިލާފުކަމެކެވެ.
