ޢަސްކަރީ ކަންކަމާ ގުޅޭގޮތުން ތަޙުލީލުތައް ކުރައްވާ ބޭފުޅެއްކަމުގައިވާ ރިޓަޔަރޑް މޭޖަރ ޖެނެރަލް ފާއިޒް އައްދުވައިރީ ވިދާޅުވާގޮތުގައި، މިދިޔަ ހޯމަ ދުވަހު އިޒްރޭލުގެ ވެރިރަށް ޓެލަވީވްއަށް ލެބަނާންގެ ހިޒްބުﷲ ޖަމާޢަތުން ފޮނުވާލީ މަލާކު ކިޔާ މަރުކާގެ މިސައިލެކެވެ. އެ މިސައިލަކީ ތަންތައް ފުނޑުފުނޑުކޮށްލުމުގައި ބާރުގަދަ މިސައިލެކެވެ. މި މިސައިލުން ދިފާޢުވުމަށް އިޒްރޭލުގެ ޢަސްކަރިއްޔާއިން ފެއިލްވި ސަބަބުތަކާ ގުޅޭގޮތުންވެސް ދުވައިރީ އަލްޖަޒީރާއަށް ވާހަކަދައްކާފައިވެއެވެ.

މި މައްސަލައިގެ ޢަސްކަރީ ތަޙުލީލެއް ދެއްވަމުން އަލްޖަޒީރާއަށް ދުވައިރީ ވިދާޅުވެފައިވަނީ މިއީ މީގެ ވޯހެޑްގައި 250 ކިލޯގެ ބަރުދަން ހުންނަ 250 ކިލޯ މީޓަރުގެ ދުރަށް ދަތުރުކުރުމުގެ ޤާބިލުކަން ލިބިފައިވާ މިސައިލެއް ކަމަށެވެ. ހަމައެއާއެކު [ނަޞްރު] އާއި [ފާދީ] ނަމަކަށް ކިޔާ ދެ މިސައިލަށްވުރެ ވެސް މި މިސައިލު ޓާގެޓަށް ވާޞިލުވުމުގައި ކުޅަދާނަކަން ބޮޑުވާނެ ކަމަށް އޭނާ ހާމަކުރެއެވެ.

މި މިސައިލު ޓާގެޓު އަތުލުމުގައި ގޯސް ހެދުނަސް ހެދޭނީ ފަސްވަރަކަށް މީޓަރުގެ ރޭންޖުގެ ގޯހެކެވެ. އެހެންކަމުން ހިޒްބުﷲ ޖަމާޢަތުން މި ފޮނުވާލި މިސައިލު އަރާ ބިނާއެއް ފުނޑުފުނޑުކޮށްލާނެއެވެ.

ނަމަވެސް ހިޒްބުﷲގެ ފަރާތްތަކާ ޙަވާލާދީ ލެބަނަންގެ މީޑިޔާތަކުން ބުނެފައިވާ ގޮތުގައި ޓެލްއަވީވްއަށް ވައްޓާލި މި މިސައިލަކީ [ފާތިޙު 110] ނަމަކަށް ކިޔާ މިސައިލެކެވެ.

އިޒްރޭލުގެ ޕޮލިހުންނާ ޙަވަލާދީ އެގައުމުގެ ޓީވީ ޗެނެލް 12 އިން ބުނެފައިވާ ގޮތުގައި ޓެލެވީވްގެ ބަނީ ބަރާކު އަވަށަށް ވައްޓާލި މި މިސައިލަކީ ސައިޒުގެ ގޮތުން ބޮޑު މިސައިލެކެވެ. ސީދާގޮތެއްގައި ގެއްލުންތަކެއް ދިން މި މިސައިލު ވެއްޓެންޖެހުނީ އިޒްރޭލުގެ ޢަސްކަރިއްޔާގެ ސިސްޓަމްތަކުން މި މިސައިލަށް ހުރަސްއަޅަން ފޭލްވުމުގެ ސަބަބުންނެވެ.

ޓެލަވީވްގެ ރަމަޓް ގޭން ސަރަޙައްދަށް ފޮނުވާލި މި މިސައިލުގެ ސަބަބުން ބިލްޑިންގެއް ވެއްޓިދާނެކަމުގެ ބިރުއޮތްކަމަށް ޕޮލިހުން ބުނެއެވެ. މި މިސައިލު ވައްޓާލުމުގެ ސަބަބުން ހަ މީހަކަށް އެކި ވަރުގެ އަނިޔާ ލިބިފައިވާކަމަށްވެސް ޕޮލިހުން ބުނެއެވެ.

މި މިސައިލަށް ހުރަސްއެޅުމަށް އިޒްރޭލު ޢަސްކަރިއްޔާއިން ފެއިލްވި ސަބަބެއްގެ ގޮތުގައި ޢަސްކަރީ އެކްސްޕާޓް ފާއިޒް އައްދުވައިރީ ވިދާޅުވަނީ އިޒްރޭލުގެ އަޔަން ޑޯމް (ދަގަނޑު ގުއްބުން ނަންދީފައިވާ ދިފާޢީ ނިޒާމު) ބިނާކޮށްފައި ވަނީ ތިން ނިޒާމެއްގެ މައްޗަށެވެ. އެއީ ރާޑަރާއި، ޓްރެކްކުރާ ޔުނިޓާއި، މިސައިލް ލޯންޖުކުރާ ޔުނިޓެވެ.

ދުވައިރީ ބަޔާންކުރައްވާގޮތުގައި ޓްރެކްކުރާ ޔުނިޓްގެ ވަޒީފާއަކީ މިސައިލް ނުވަތަ ރޮކެޓް ވެއްޓޭނެކަމަށް ލަފާކުރާ ޕޮއިންޓު ހޯދުމެވެ. ވެއްޓެނީ ހުސްބިމެއް ފަދަ ތަނަކަށް ނަމަ އެއްވެސް އިންޒާރެއް ނުދޭނެއެވެ.

މިސައިލަށް ހުރަސް އެޅުމަށް ފޭލްވި ސަބަބަކީ އަޔަން ޑޯމްގެ ޓްރެކް ކުރުމުގެ މައްސަލައަކަށް ވެދާނެއެވެ. އެއީ ގެއްލުން ލިބިދާނެ ތަނަކަށް މިސައިލް އަރާފާނެކަމަށް އެވަގުތު ދެނެގަނެވިފައި ނެތީކަމުގައި ޢަސްކަރީ އެކްސްޕާރޓް ބުނެއެވެ.

އޭނާ ވިދާޅުވާގޮތުގައި އަޔަން ޑޯމް މަސައްކަތް ކުރަނީ އޮޓޮމެޓިކް ސިސްޓަމަކުންނެވެ. އެއީ މިސައިލެއް އަންނަނަމަ އޭގެ ވޯހެޑް އިންނަބަޔަށް އަޔަން ޑޯމްއިން ފޮނުވާލާ މިސައިލެއް ޙަމަލާދޭނެއެވެ. އެގޮތުން ޖައްވުތެރޭގައި އެ މިސައިލް ގޮއްވާލުމުން އެތިކޮޅުތައް ބުރައިގެން ދާނެއެވެ. ގޮއްވާލެވޭއިރު މަތީގައި އޮތް މިންވަރަކުން ލިބޭ ގެއްލުން ކުޑަވާނެއެވެ.
މިސައިލް ފުޑުކޮށްލުމަށް އަޔަން ޑޯމްއިން ފޮނުވާލާ މިސައިލް އެޓޭކްކުރާ މިސައިލްގެ ފަހަތު ބަޔަށް އަރައިފިނަމަ އޭގެ މާނައަކީ ގޮވާބައި ފުނޑުކޮށް ނުލެވިއްޖެނަމަ ބިމަށް ވެއްޓި ޖެހޭތަނެއް ގޮއްވާލުމުގެ ފުރުޞަތު އޮންނާނެކަމުގައި ދުވައިރީ ވިދާޅުވެއެވެ.

ޚުލާޞާގޮތެއްގައި ދުވައިރީ ވިދާޅުވެފައިވަނީ އަޔަން ޑޯމްއިން މުޢާމަލާތްކުރާ ރޮކެޓާއި މިސައިލްގެ ޖޯގްރަފިކަލް ރޭންޖަކީ ހަތަރު ކިލޯ މީޓަރުން ފެށިގެން ހަތްދިހަ ކިލޯމީޓަރާ ދެމެދުގެ ވަރެކެވެ. އެއިން ސަތޭކައިން ސަތޭކަ ދިފާޢީ ނިޒާމެއް ގެރެންޓީއެއް ނުކޮށްދެވޭނެއެވެ.