އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ބިރުން މި މަހު ބާއްވަން ހަމަޖެހިފައިވާ ދަރިފުޅުގެ ކައިވެނި ފަސްކޮށް ”އަންޑަގްރައުންޑް ސޭފްރޫމް“ އަށް ވަދެއްޖެ ކަމަށް މީޑިއާ ރިޕޯޓުތައް ބުނެފިއެވެ.
ނަތަންޔާހޫ ބިންގަރާހަށް ވަދެފައި ވަނީ ސަރަހައްދީ ރެސިސްޓެންސް މޫވްމަންޓްތަކުން ބަދަލުހިފުމުގެ ޑްރޯން ހަމަލާތަކެއް ދީފާނެ ކަމުގެ ބިރަށެވެ. މިކަމާއި ގުޅިގެން ނަތަންޔާހޫ ވަނީ ނޮވެމްބަރު 26 ވަނަ ދުވަހު ޓެލް އަވީވްގެ އުތުރުގެ ސަރަހައްދެއްގައި ބާއްވަން ހަމަޖެހިފައިވާ އޭނާގެ ދަރިފުޅު އަވްނަރުގެ ކައިވެނިވެސް ފަސްކޮށްފައެވެ.
ރައްކާތެރިކަމުގެ ފިޔަވަޅުތައް ވަރުގަދަކޮށްފައި ވަނިކޮށް، ނަތަންޔާހޫ ގެންދަވަނީ އޭނާގެ އޮފީހުގެ ބޭސްމަންޓްގައި ހުންނަ ބިންގަރާހުގައި“ސަލާމަތީ ބައްދަލުވުންތައް“ ބާއްވަމުންނެވެ.
މީޑިއާތަކުން ރިޕޯޓުކޮށްފައިވާ ގޮތުގައި މިދިޔަ އޮކްޓޫބަރު މަހުން ފެށިގެން އޭނާ އެތަން ބޭނުން ކުރަމުން އަންނަނީ ސީޒަރިއާ ސިޓީގައި ހުންނަ އޭނާގެ ގެއަށް ޑްރޯން ހަމަލާއެއް ދިނުމާ ގުޅިގެންނެވެ.
މިދިޔަ އޮގަސްޓް މަހުވެސް ހިޒްބުއްލާގެ ރިކޮނިސެންސް ޑްރޯނެއް ވަނީ ނަތަންޔާހޫގެ ގެއަށް ވަދެ، އެ ގެ ވީޑިއޯކޮށްފަ އެވެ.
މިދިޔަ ސެޕްޓެމްބަރު މަހުގެ ފަހުކޮޅުވެސް ނިއުޔޯކްގެ ދަތުރަށްފަހު ނަތަންޔާހޫ ބެން ގުރިއަން އެއާޕޯޓަށް ވަޑައިގަތުމާއެކު އެ އެއާޕޯޓަށް އަމާޒުކޮށް ހަމަލާދޭން ވަނީ މަސައްކަތް ކޮށްފައެވެ.
ނަތަންޔާހޫއަށް ސަރުކާރުގެ އޮފިޝަލުން ގެންދަވަނީ އިތުރު މުއްދަތަކަށް ވަކި ތަންތަނަށް ވަޑައިނުގަތުމަށް އިންޒާރު ދެއްވަމުންނެވެ.
