އިރާގުގެ އިސްލާމިކް ރެސިސްޓެންސް އިން އިސްރާއީލަށް ހަތަރު ހަމަލާއެއް ދީފިއެވެ.
އިރާގުގެ އިސްލާމިކް ރެސިސްޓެންސް އިން އިސްރާއީލުން ހިފާފައިވާ ފަލަސްތީނުގެ ސަރަހައްދުތަކުގެ ތެރެއިން ”މުހިންމު އަމާޒުތަކަށް“ ހަތަރު ޑްރޯން ހަމަލާއެއް ދީފި އެވެ.
މީޑިއާ ރިޕޯޓުތައް ބުނާ ގޮތުން އިރާގުގައި ހުންނަ ރެސިސްޓެންސް ގްރޫޕުން މިއަދު ދިން މި ހަމަލާތަކުގެ ތެރެއިން ތިން ހަމަލާ ދީފައި ވަނީ ހިފާފައިވާ ފަލަސްތީނުގެ ދެކުނަށެވެ. އަދި އަނެއް ހަމަލާ ދީފައި ވަނީ ގޯލާން ހެއިޓްސްގައި ކަމަށް އަލްޖަޒީރާއިން ރިޕޯޓުކޮށްފައި ވެއެވެ.
މީގެ އިތުރުން ޣައްޒާގައި ޒަޔަނިސްޓު އިސްރާއީލުން ނަސްލު ނައްތާލުމަށް ހިންގަމުން އަންނަ ޖަރީމާތަކަށް ވޮޝިންޓަނުން ދިން ތާއީދުގެ ބަދަލު ހިފުމުގެ ގޮތުން އިރާގާއި އަވަށްޓެރި ސީރިއާގައި ހުންނަ އެމެރިކާގެ އަސްކަރީ މަރުކަޒުތަކަށް ވެސް ރެސިސްޓެންސް އިން އަންނަނީ ހަމަލާދެމުންނެވެ.
އިސްރާއީލުން ފަލަސްތީނުގެ ޣައްޒާއަށް އަރައިގަނެ ނަސްލު ނައްތާލުމަށް ދެމުން އަންނަ ލާއިންސާނީ ހަމަލާތަކުގައި 40،000 ވުރެ ގިނަ އާންމު ރައްޔިތުން ވަނީ ޝަހީދުކޮށްލާފައެވެ. އަދި އެތައް ހާސް ބައެއްގެ ގެދޮރު ވަނީ ސުންނާފަތިކޮށްލާފައެވެ.
