ބޭންކް އޮފް މޯލްޑިވްސް (ބީއެމްއެލް)ގެ ޑެޕިއުޓީ ސީއީއޯ އައިޝަތު ނޫރައްދީން އެ ބޭންކުގެ ޚިދުމަތުން ވަކިވެ ވަޑައިގަންނަވަން ނިންމަވައިފިއެވެ.
މިކަން ހާމަކޮށް ބީއެމްއެލްގެ މުވައްޒަފުންނަށް މިއަދު ފޮނުއްވި އީމެއިލެއްގައި އޭނާ ވިދާޅުވީ ބީއެމްއެލްގެ ޒިންމާތަކުން ފެންނާނެ އެންމެ ފަހު ދުވަހަކީ އަންނަ ނޮވެމްބަރު 7 ކަމަށެވެ.
އައިޝަތު ވިދާޅުވީ ބީއެމްއެލްގައި ހޭދަކުރެއްވި މުއްދަތުގައި ކުރިއެރުންތައް ލިބި އަދި ގޮންޖެހުންތަކާ ވެސް ކުރިމަތިލެއްވި ކަމަށެވެ.
މީގެ އިތުރުން ބީއެމްއެލްގެ އާ ސީއީއޯ އަދި އެމްޑީ މުހައްމަދު ޝަރީފު އެ ބޭންކުގެ މުވައްޒަފުންނަށް މިއަދު ކުރި މެއިލްއެއްގައި ވިދާޅުވީ އައިޝަތު ވަނީ ބޯޑާއި މެނޭޖްމަންޓްގައި ނުހަނު ބުރަ މަސައްކަތްތަކެއް ކުރައްވާފައި ކަމަށާއި އެ ބޭންކަށް އެވޯޑު ލިބިފައިވާ އިންޓަނޭޝަނަލް ބޭންކިންގެ ވިޔަފާރީގެ ފަހަތުގައިވާ ބާނީ އަކީ ވެސް އައިޝަތު ނޫރައްދީން ކަމަށެވެ.
އައިޝަތު ނޫރައްދީން ބީއެމްއެލްއާ ގުޅިވަޑައިގަތީ 1982 ގަ އެވެ.
