އިސްރާއީލުން ޙިޒްބުއްﷲގެ އިސްވެރިޔާއަށް އަމާޒުކޮށް ވަރުގަދަ ހަމަލާއެއްދީފިއެވެ. އިސްރާއީލުގެ ސިފައިން ބުނެފައިވަނީ ހުކުރު ދުވަހު ބައިރޫތުގައި ހުރި ޙިޒްބުއްލާގެ މައި މަރުކަޒަށް ޙަމަލާދިން ކަމަށެވެ. މި ޙަމަލާއަކީ އެ ޖަމާޢަތުގެ އިސްވެރިޔާއަށް އަމާޒުކޮށް ދިން ޙަމަލާއެއް ކަމަށާއި މި ޙަމަލާގައި ގިނަ އަދަދެއްގެ މީހުން ދިރިއުޅޭ އިމާރާތްތަކެއް ވަނީ ފުނޑުފުނޑުވެފައެވެ.

ލުބުނާނުގެ ޞިއްޙީ ވުޒާރާއިން ބުނެފައިވާ ގޮތުގައި މަދުވެގެން 6 މީހުން މަރުވެ 91 މީހުން ވަނީ ޒަޚަމްވެފައެވެ. މިއީ ވޭތުވެދިޔަ އަހަރު ތެރޭގައި ލުބުނާނުގެ ވެރިރަށް ބައިރޫތުގައި އިވިގެން ދިޔަ އެންމެ ބޮޑު ގޮވުމެވެ. އަދި މި ހާދިސާގެ ސަބަބުން، އިތުރަށް ވަރުގަދަވަމުން އަންނަ ހަނގުރާމައިގެ ހާލަތު ފުރިހަމަ ހަނގުރާމައަކަށް ބަދަލުވުމުގެ ފުރުސަތު އޮތްކަމަށް ފެނެއެވެ.

މި މައުލޫމާތުގެ އަސްލު ސިއްރު ހިފެހެއްޓުމަށް އެދިފައިވާ ދެ ފަރާތެއްގެ ތެރެއިން އެމެރިކާގެ އޮފިޝަލެއްވެސް ހިމެނޭގޮތަށް ބުނެފައިވަނީ ޙިޒްބުއްލާގެ އިސްވެރިޔާ ޙަސަން ނަސްރުއްލާ އަށް އަމާޒުކޮށް މި ޙަމަލާ ދިން ކަމަށެވެ. އިސްރާއީލުގެ ސިފައިން މި ޙަމަލާގެ އަމާޒާ ބެހޭގޮތުން އެއްވެސް އެއްޗެއް ބުނަން އިންކާރުކުރިއެވެ. އަދި ނަސްރުއްލާ އެތަނުގައި ހުރިކަން ނުވަތަ ނޫންކަން ސާފުނުވާ ކަމަށާއި ޙިޒްބުއްލާއިން މިކަމާ ގުޅޭގޮތުން އެއްވެސް އެއްޗެއް ބުނެފައިނުވާކަމަށް ވެސް ބުނެފައިވެއެވެ.

މަރުވި މީހުންގެ އަދަދު މިއަށްވުރެ ވަރަށް ބޮޑުތަން އިތުރުވާނެ ކަމަށް ލަފާކުރެވެއެވެ. އެއީ 6 އިމާރާތުގެ ސަރަޙައްދުން އަދިވެސް ހޯދާ ސަލާމަތްކުރުމުގެ މަސައްކަތް ކުރަމުންދާތީއެވެ. އިސްރާއީލުން ފުރަތަމަ އެ ޙަމަލާ ދިނުމަށްފަހު ދެކުނުގެ ބައެއް އެހެން ސަރަޙައްދުތަކަށްވެސް ޙަމަލާދީފައިވެއެވެ.

މި ޙަމަލާތަކަށް ފަހު، ވަޒީރުލްއުޒުމާ ބެންޖަމިން ނެތަންޔާހޫ އެމެރިކާއަށް ކުރަމުންދިޔަ ދަތުރު ކުއްލިއަކަށް ހުއްޓާލައި އެނބުރި ގެއަށް އައުމަށް ނިންމިއެވެ. އޭގެ ދެތިން ގަޑިއިރު ކުރިން އޭނާ ދެއްކި ވާހަކައެއްގައި ބުނެފައިވަނީ ވޭތުވެދިޔަ ދެ ހަފުތާގައި ޙިޒްބުއްލާގެ މައްޗަށް އިސްރާއީލުން ހަރުކަށިކޮށް ހިންގަމުންދާ ޙަމަލާތައް ކުރިއަށް ގެންދާނެ ކަމަށެވެ. މިއާއެކު ބައިނަލްއަޤްވާމީ ފަރާތްތަކުން ހުއްޓުވަން މަސައްކަތްކުރާ ހަނގުރާމަ ހުއްޓުމުގެ އުންމީދު އިތުރަށް ކުޑަވެގެން ދިޔައެވެ.

މި ގޮވުންތަކުގެ ޚަބަރު ލިބުނީ ނެތަންޔާހޫ އދ. ގައި ދެއްކި ވާހަކައަށްފަހު ނޫސްވެރިންނަށް މައުލޫމާތު ދެމުންދަނިކޮށެވެ. ސިފައިންގެ އެހީތެރިއަކު އޭނާގެ ކަންފަތުގައި މި ޚަބަރު ބުނުމުން ނެތަންޔާހޫ އަވަހަށް އެ ބްރީފިންގ ނިންމާލިއެވެ.

އިސްރާއީލު ސިފައިންގެ ތަރުޖަމާނު ރިއަރ އެޑްމިރަލް ޑެނިއަލް ހަގާރީ ބުނެފައިވަނީ މި ޙަމަލާތައް އަމާޒުކުރީ ޙިޒްބުއްލާގެ މައި މަރުކަޒަށް ކަމަށެވެ. އަދި އެ މަރުކަޒު ހުރީ ރިހާއިޝީ އިމާރާތްތަކުގެ ދަށުގައި ބިމުގެ އަޑީގައި ކަމަށް ވެސް އޭނާ ބުނެފައިވެއެވެ.

ރޭގަނޑުގެ ވަގުތެއްގައި ދިން މި ޙަމަލާގައި ބައިރޫތުގެ ޑަހިޔާ ސަރަޙައްދުގެ ޙާރަތު ޙުރައިކުގައި ހުރި 6 އެޕާޓްމަންޓް ޓަވަރު ވަނީ ފުނޑުފުނޑުވެފައެވެ. މިއީ ޝިޔާ މުސްލިމުން ގިނަ، މީހުން ދިރިއުޅޭ ބޮޑު ސަރަޙައްދެކެވެ. ލުބުނާނުގެ ނޭޝަނަލް ނިއުސް އޭޖެންސީން މި މައުލޫމާތު ދީފައިވެއެވެ. އަނދިރި އަދި ނަރަންޖީ ކުލައިގެ ދުމުގެ ފާރެއް އުޑަށް އުފުލުނެވެ. އަދި ބައިރޫތުގެ އުތުރުން 30 ކިލޯމީޓަރު (20 މޭލު) ދުރުގައިވެސް ކުޑަދޮރުތައް ތެޅި، ގެތައް ހެލުނެވެ.