އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުގެ އަބުރު ކަތިލުމަށް ވީޑިޔޯ ހެދުމަކީ ބަލައި ގަނެވޭނެ ކަމެއް ނޫން ކަމަށް އަދާލަތު ޕާޓީގެ ރައީސް އައްޝައިޚު އިމްރާން ވިދާޅުވެއްޖެއެވެ.
އިމްރާން މިހެން ވިދާޅުވެފައި މިވަނީ އިސްލާމީ ކަންތައްތަކާބެހޭ ވަޒީރު ޑރ. ޝަހީމް އަންހެނަކާއެކު ބަދުއަޚުލާގީ އަމަލު ހިންގި ކަމަށް ބުނެ, “ހަސަން ކުރުސީ“ ގެ ނަމުގައި ހަދާފައިވާ އެކްސް އެކައުންޓަކުން ވީޑިއޯތަކެއް އާންމުކޮށްފައިވަނިކޮށެވެ.
އެގޮތުން އިމްރާން ވިދާޅުވީ ސިޔާސީ ގޮތުން ޚިޔާލު ތަފާތު ވުމަކީ އަބުރު ކަތިލައި އަގުވައްޓާލުމަށް ހުޅުވާލެވޭ ދޮރަކަށް ވެގެން ނުވާނެ ކަމަށެވެ.
“ޑރ. ޝަހީމްގެ އަބުރު ކަތިލުމަށް ވީޑިޔޯ ހެދުމަކީ ބަލައި ގަނެވޭނެ ކަމެއް ނޫން.“
މީގެ 12 އަހަރު ކުރީގައި މެލޭޝިޔާގައި ހިނގި ކަމެއް ކަމަށް ބުނެ “ހަސަން ކުރުސީ“ އާންމުކުރި ވީޑިއޯއިން ފެންނަނީ ޑރ. ޝަހީމެއް ނޫންކަން ސާފުކޮށް އެނގެއެވެ.
އެ ވީޑިއޯއިން ފެންނަނީ ޕާކިސްތާނުގެ ފިރިހެނަކާއި އަންހެނަކު ބަދުއަޚުލާގީ އަމަލު ހިންގާ މަންޒަރެވެ.
މި ވީޑިއޯ އާންމުކުރި ކުރުސީގެ އެކައުންޓުން ވަނީ އެއީ ފޭކު ވީޑިއޯއެއް ކަމަށާއި އެކަން ކުރެވުމުން ޑރ. ޝަހީމްގެ އިތުރުން އޭނާގެ އާއިލާގެ ކިބައިން މާފަށް އެދޭކަމަށް ބުނެފައެވެ. ކުރުސީ ވަނީ މިކަމުން ޝަހީމް އަށާއި އޭނާގެ އާއިލާއަށް ކުރިމަތިވެދާނެ ގެއްލުމަކަށް ހިތާމަކުރާކަމަށާއި، ނުކުރާ ކަމެއްގެ އިލްޒާމު އެއްވެސް މީހެއްގެ ބޮލުގައި އެޅުވިގެން ނުވާނެ ކަމަށްވެސް ބުނެފައެވެ.
