ފަލަސްތީނާއި އެ ގައުމުގެ ރައްޔިތުންގެ ނަސްލު ނައްތާލުން ނިމުމަކަށް ގެނެވޭނީ އެއްވެސް ގައުމެއް އިސްތިސްނާ ނުވާ ގޮތަށް ބައިނަލްއަގުވާމީ ގާނޫނުތައް ތަންފީޒު ކޮށްގެން ކަމުގައި ރާއްޖޭގެ ފޮރިން މިނިސްޓަރު މޫސާ ޒަމީރު ގޮވާލައްވައިިފިއެވެ.

މިނިސްޓަރު މި ގޮތަށް ގޮވައިލެއްވީ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ އެގްޒެކެޓިވް ކޮމިޓީގެ އޯޕަން އެންޑޭޑް އެކްސްޓްރާ އޯޑިނަރީ މީޓިންގައި ދެއްވި ބަޔާނުގައެވެ.

ބަޔާން ދެއްވަމުން މިނިސްޓަރު ޒަމީރުގެ ވާހަކަފުޅުގައި ވަނީ ޣައްޒާގެ ޙާލަތު އިތުރަށް ގޯސްވަމުންދާކަން ފާހަގަކުރައްވައި ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ޖަރީމާތައް ކުށްވެރިކުރައްވައިފައެވެ.

އަދި ބައިނަލްއަގުވާމީ ގާނޫނާއި ބައިނަލްއަގުވާމީ އިންސާނީ ހައްގުތަކާބެހޭ ގާނޫނާކީ ވަކި ގައުމެއް ނުވަތަ ގައުމުތަކެއް އިސްތިސްނާ ވާހެން ތަންފީޒުކުރެވޭ ގާނޫނުތަކެއްކަމުގައި ވެގެން ނުވާނެކަމަށާއި އެ ކަން ކަށަވަރުކުރުމަށް އިތުރަށް މަސައްކަތްކުރުމަށް ބައިނަލްއަގުވާމީ މުޖުތަމައުއަށް ގޮވައިލެއްވިއެވެ.

ޒަމީރު ވަނީ އަވަސް އަދި ދެމެހެއްޓެނިވި ގޮތެއްގައި އިންސާނީ ހަނގުރާމަ ހުއްޓާލުމަށެވެ. އަދި ޣައްޒާއަށް ދޭ އެހީތެރިކަމުން މިހާރު ނުފުދޭކަން ފާހަގަކުރައްވައި، ޣައްޒާ ރައްޔިތުންގެ ޒަރޫރީ ބޭނުންތަކާއި އަސާސީ ކަންކަމަށް ބޭނުންވާ އެހީ ލިބެމުންދާކަން ކަށަވަރު ކުރުމަކީ މިހާރު ކުރަން ޖެހިފައިވާ އެންމެ މުހިންމު މަސައްކަތްކަން ފާހަގަކުރެއްވިއެވެ.

ޒަމީރު ވަނީ ދިވެހިރާއްޖެއިން ދެގޮތެއްނުވެ ފަލަސްތީނުގެ ހައްގުގައި ވަކާލާތުކުރަމުންދާނެކަމުގެ ޔަގީންކަން ވެސް އަރުވައިފައެވެ.

ޒަަމީރު ވިދާޅުވީ ދެމެހެއްޓެނިވި ހައްލެއް ހޯދޭނީ 1967 ވަނަ އަހަރުގެ ކުރިން އިރުމަތީ ގުދުސް އާއި އިރުމަތީ ގުދުސް އޮތް ބޯޑަރުތަކުގެ މައްޗަށް ބިނާކޮށް މިނިވަން އަދި ސިޔާދަތީ ދައުލަތެއްގެ ގޮތުގައި ފަލަސްތީނު ގާއިމުކުރެވިގެން ކަމަށެވެ.

މީގެއިތުރުން މިނިސްޓަރު ޒަމީރު ވަނީ ހަމާސްގެ ޗީފް އޮފް ޕޮލިޓިކަލް ބިއުރޯ އިސްމާއިލް ހަނިއްޔާ އަވަހާރަކޮށްލުން ކުށްވެރިކުރައްވާފައެވެ.

އިއްޔެ ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ އެގްޒެކްޓިވް ކޮމިޓީގެ އޯޕަން-އެންޑެޑް އެކްސްޓްރާއޯޑިނަރީ ބައްދަލުވުމުގައި ބައިވެރިވެވަޑައިގަތުމަށް މިނިސްޓަރު ޒަމީރު ސަޢުދީ އަރަބިއްޔާގެ ޖިއްދާއަށް ފުރާވަޑައިގަތީ މި މަހުގެ 6 ގައެވެ.

މި ބައްދަލުވުމަކީ އިސްރާއިލުން މެދުކެނޑުމެއްނެތި ފަލަސްތީނުގައި ހިންގަމުންދާ ’ޖެނޮސައިޑް‘ ނުވަތަ ނަސްލު ނައްތާލުމުގެ އަމަލުތަކާއި އިރާން ގައި ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ އަވަހާރަކޮށްލުމާ ގުޅިގެން ފަލަސްތީނާއި އިރާން ގެ ދަޢުވަތަކަށް އޯއައިސީގެ އެގްޒެކްޓިވް ކޮމިޓީ އިން އެ ޖަމުޢިއްޔާގެ ހުރިހާ މެމްބަރު ޤައުމުތަކުގެ ބައިވެރިވުން ހިމެނޭހެން ބޭއްވުމަށް ނިންމެވި ބައްދަލުވުމެކެވެ.

57 ގައުމުގެ މައްޗަށް އެކުލެވޭ މި ޖަމުޢިއްޔާގެ މެމްބަރަކަށް ދިވެހިރާއްޖެ ވެފައިވަނީ 1976 ވަނަ އަހަރުއެވެ.

އޯގަނައިޒޭޝަން އޮފް އިސްލާމިކް ކޯޕަރޭޝަނަކީ ފަލަސްތީނުގެ ރައްޔިތުންނާއި އެ މީހުންގެ ދައުލަތަށް އެދޭ ވަރަށް ބޮޑަށް ވަކާލާތުކުރާ ޖަމިއްޔާއެކެވެ. އޯއައިސީގެ މެމްބަރަކަށް ވީ ފަހުން ރާއްޖެ އަކީ އެ ޖަމިއްޔާގެ އެކްޓިވް މެމްބަރެކެވެ.