ގިނަ ފަތުރުވެރިން ޒިޔާރަތްކުރާ ރީތި މަންޒިލެއް އަދި އެތައް އަހަރުތަކެއްވާންދެން އިންވެސްޓަރުންގެ ޖީބު ދަމައިގަނެފައިވާ ނަން މަޝްހޫރު ތުރުކީއަށް ދަތުރުކުރުމަށް މިހާރު އަރަބީންނާއި މުސްލިމުންގެ ގިނަ ބަޔަކު ޖެހިލުންވެއެވެ. ބައެއް ސިޔާސީ ޕާޓީތަކުން އިސްނަގައިގެން ނޭޝަނަލިޒަމްގެ އައިނު ރައްޔިތުންގެ ލޮލުގައި އަޅުވަމުންދާ ދިޔުމާއެކު، ތުރުކީގެ ތެރޭގައި ނަސްލީ ތަފާތުކުރުމުގެ މާހައުލެއް އުފެދިފައިވާއިރު، އޭގެ ސަބަބުން، އަރަބި އަދި ޔޫރަޕު ނޫން ފަތުރުވެރީންނާއި އިންވެސްޓަރުން ތުރުކީއަށް ދަތުރުކުރުން މަދުކޮށްފައިވާކަން ވަނީ ފާހަގަކުރެވިފައެވެ. 

ފަހުގެ އަހަރުތަކުގައި ތުރުކީއަށް ދަތުރުކުރި ގިނަ ފަތުރުވެރިންތަކެއް ވަނީ ތުރުކީގައި ކުރިމަތލާން ޖެހުނު ހިތްނުތަނަވަސްކުރުވާ ބައެއް ތަޖުރިބާތައް ހިއްސާކޮށްފައެވެ. އެހެންނަމަވެސް، އިޤްތިޞާދީ ހީނަރުކަމާއި ގުޅިގެން ނުރުހުންވެފައި ތިބި ރައްޔިތުންގެ ސިޔާސީ ތާއީދު ގެއްލުމުގެ ބިރަށްޓަކައި ސަރުކާރުން މިމައްސަލައަށް ދޭންވާ ސަމާލުކަން ދީފައެއް ނުވެއެވެ. މިގޮތުން، ގައުމުވަންތަކަމާއި، ނަސްލީ ތަފާތުކުރުމުގެ އައްޑަނައިގެ ފަހަތުގައި ތިބެ ތުރުކީގެ އިދިކޮޅު ސިޔާސީ ލީޑަރުން ގިނަ މޮޅުތަކެއް ހޯދާފައިވާއިރު، ހަމަ ގައުމުވަންތަކަން އިސްކުރާ ސަރުކާރު ޕާޓީއިން ތުރުކީގައި ނަސްލީ ތަފާތުކުރުން އިތުރުވުމުގެ ނުރައްކާ އަންދާޒާކޮށް މިންކުރުމަށް ވަނީ ނުކުޅެދިފައެވެ.

ތުރުކީގައި ނަސްލީ ތަފާތުކުރުން އިތުރުވީ މިންވަރަކީ، އެތައް އަހަރުތަކެއްވާންދެން ތުރުކީގައި އިންވެސްޓްކޮށް، ތުރުކީގެ ރައްޔިތުކަންވެސް ހޯދާފައިވާ އަރަބީން އެމީހުންގެ އިންވެސްޓްމަންޓްތަކާއި، މުދާ ވިއްކާލައި، ތުރުކީ ދޫކޮށް ދިޔުމެވެ. މިކަން ތުރުކީގެ ސަރުކާރަށް ފާހަގކުރެވިފައިވަނީ ދާދި ފަހުންނެވެ. އެއީ އިސްތާންބުލްގެ ޓުއަރިސްޓް ހޮޓްސްޕޮޓްތަކުގައި ހަރަކާތްތެރިވާ އަރަބި އަދި އޭޝިއާ ފަތުރުވެރިންގެ އަދަދު މަދުވާކަމުގެ ޝަކުވާތައް ލިބެން ފެށުމުންނެވެ. ސަރުކާރަށް ރެއަކާލީ، ގައުމުވަންތަކަމުގެ ހިޔާގެ ދަށުގައި ނަސްލީ ބައިބައިވުން އުފެދި، ގައުމުގެ ފަތުރުވެރިކަމުގެ މުސްތަގުބަލަށް ދިގު ރާސްތާގައި ކުރާނެ ގެއްލުންތަކުގެ ލޮޅުން އިހުސާސްކުރެވެން ފެށުމުންނެވެ.

ތުރުކީއަށް އިންވެސްޓްކުރި، އަދި ޚިޖުރަކުރި ބިދޭސީންގެ އިތުބާރު ވެއްޔާ މޮޑެވިއްޖެއެވެ. އަދި ތުރުކީގެ ސަރުކާރުން ވެއްޓިފައިވާ އަނދަވަޅުން އަރައިގަނެވިދާނެ ކަމަށް ގަބޫލެއް ނުކުރެވެއެވެ. ބޭރުންގެ އިންވެސްޓަރުން ހޯދުމަށް އެހެން ގައުމުތަކުންވެސް އަތްކުރި އޮޅައި، ގަދަބާރުލައި ވާދަކުރަމުންދާއިރު، ނަސްލީ ހަމަހަމަކަންނެތް ހާއްޔަކަށް އިންވެސްޓަރުން އެމީހުންގެ ފައިސާ ދޫކުރަން ވީ ކީއްވެ ހެއްޔެވެ؟