ސުންނީ ޝިޔާޢީ  ވިޔަސް އިސްލާމްދީން ޤަބޫލުކުރާ މީހުން މާތް ﷲ ގެ އެއްކައުވަންތަކަމާއި މުޙައްމަދުގެ ފާނުގެ ރަސޫލުކަމާއި އިސްލާމްދީނުގެ ރުކުންތައް ޤަބޫލުކުރެއެވެ. ޝައްކެއްނެތި އެކަން އެނގެން ބޭނުން މީހަކަށް ބޭރުފުށުންވެސް އެނގޭވަރަށެވެ.

ގުރުއާނަށް  އީމާންވާ މީހުން ގުރުއާނަށް ބަރާބަރަށް އީމާން ވެއެވެ. އިންކާރެއް ނުކުރެއެވެ. ދެން ބައެއްގެ މެދުގައި ހުރި އާދަކާދައިގެ ތަފާތު ތަކަކީ ދީނުން ބޭރުވުންކަމުގައި ބެލުން ބުއްދި ގަބޫލުކުރާ ކަމެއްގެ ގޮތުގައި ނުބެލެވޭނެއެވެ.

އެއީ އިސްލާމް މާއްދާ ކިޔަވައިދޭ ސްކޫލްތަކުގެ ގުރޭޑް 10 ދަރިވަރުންވެސް ރަނގަޅަށް ދަންނަކަން ކަމެވެ.

ޙަރާމް ޙަލާލު އަކީ ބަދަލު ކުރެވޭނޭ އެއްޗެއް ނޫނެވެ. ޙަރާމް ޙަލާލު އެގޮތުގައި ދެމި އޮންނާނެއެވެ. ޙައްގާއި ބާތިލު ވަކިވާފަދައިންނެވެ.

ސުންނީ އަދި ޝިޔާޢީ ނުވަތަ ވައްހާބީންނަމަވެސް ނުވަތަ ޝާފީ ހަންބަލީ ނުވަތަ އެހެން މަޒަހަބެއް ނަމަވެސް، ދީނުގައި ނެތްކަމެއް ދީނުގެ ކަމެއްކަމަށް ބުނެ އެކަމެއް ކުރާނަމަ އެކަމެއް ރައްދުވާނީ އެކަމެއް ކުރި މީހަކަށެވެ. ﷲގެ ދީނަކަށް ރައްދެއް ނުވާނެއެވެ. 

ފިރުގަތަކާއި ބިދުޢަތަކަކީ އަދި ފިތުނައަކީ ވެސް އިންސާނުން އެކަކަށްވުރެ އަނެކާ މަމޮޅުކަމަށް ދެއްކުމަށްޓަކައި ފެށިގެންއައި ވާދަވެރިކަމަކާއި ސިޔާސީ ނުފޫޒުގެ ތެރެއިން ކުޅެގެން އުފެއްދިފައިވާ ވަރަށް ނުރަނގަޅު ޢަމަލުތަކެކެވެ.

ނުވަތަ ފަރަންޖީ ބަހުން ބުނާނަމަ “ ޑިވައިޑް އެންޑް ރޫލް “ ގެ ޢަމަލުގެ ތެރެއިން ނިކުމެފައިވާ ނުކިއްސަރު ޢަމަލެކެވެ.

ކޮންމެ މަޒަހަބެއްގެ ބަޔަކަށްވެސް ނުވަތަ ކޮންމެ އިންސާނަކަށް ވެސް އިންސާނިއްޔަތުކަން އޮންނަންވާނެއެވެ. އިޙްސާންތެރިކަން ދަމަހައްޓަން ވާނެއެވެ. ހުރިހާ މައްސަލަ ތަކެއްގެ އަޞްލަކީ ވެސް އަނިޔާވެރިކަމެވެ.

އަނިޔާވެރިކަމަށް ތާޢީދުކުރުމާ އެހީތެރިވުމެވެ. އެއީ އިސްލާމް ދީން ދަންނަ ކަމެއްނޫނެވެ. އެހެނީ ޝަހާދަތުގެ ދެކަލިމަ ކިޔައި ގަބޫލުކޮށްފި ކޮންމެ މީހަކީ މުސްލިމެކެވެ. އޭނާގެ ގަބޫލުކުރުމާއި މެދު ޝައްކު އުފައްދަން މަސައްކަތް ކުރުމުގެ ޙައްގެއް އަނެކާއަށް އިސްލާމްދީނުގައި ލިބިދީފައެއެ ނެތެވެ.

އެހެނީ އިސްލާމް ދީނަކީ ޞުލްޙައިގެ ދީނެވެ. މާތްﷲ ގެ ޙަޟްރަތުގައި ދީނަކީ ހަމައެކަނި އިސްލާމް ދީނެވެ . ދީނަށް ވެއްދުމުގައި މަޖުބޫރު ކުރުމެއްވެސް ނެތެވެ. އޮތީ ހެޔޮ ގޮތުގައި ބަޔާންކޮށްދީ ވިސްނައި ދިނުމެވެ.

މިއަދު ފެންނަމުން މިދަނީ ހައްދެއްނެތި މުސްލިމުންގެ ލޭ އޮހޮރުވަމުން ގެންދާ މަންޒަރެވެ. ގަތުލު ޢާންމު ތައް ދީނުގެ ނަމުގައިވެސް ހުއްދަ ކޮށްފިއޭ ބުނާ މިންވަރަށެވެ. ވަކި ޖަމާޢަތަކުން ދީނުގެ ނަމުގައި ދޭ ފަތުވާ ގަބޫލު ކުރުވުމަކީ ގޮށްމުށުގެ ބާރަކަށްވެސް އިސްލާމްދީނުގެ އަސާސަކަށް މިހާރު މިވަނީ ހަދައިފައެވެ.

ދުނިޔޭގެ އެތަން މިތަނުގައި މުސްލިމެއް ކާފަރެއްނެތި ހުރިހާ ޖަމާޢަތުން ފަލަސްތީނުގެ ބިމުގައި ޝުމާރެއް ނެތި އިންސާނުން މަރަމުންދާތީ ތިމަތިމާމެންގެ ކިބައިހުރި އާރަކާއި ބާރެއް ބޭނުންކޮށްގެން ދުނިޔޭގެ ކަންކޮޅު ތަކުގައި އެކަން ކުށްވެރިކޮށް ދެކޮޅު ހަދަމުންދާއިރު ޔަހޫދީނަށް މަދަދުދިނުމުގައި ދެލޯކަނު ބީރުބައެއްގެ ގޮތުގައި އިސްލާމުންގެ ތެރެއިން ބަޔަކުތިބެ އަދިވެސް ސުންނީ ޝިޢާއިންގެ ވާހަކަޔާއި މަޒްހަބީ ފިތުނަ އުފައްދަން ބާރުއަޅައި ތަފާތު ވާހަކަތައް ލިއުމަށްވުރެން ވަކިން ގޯސްކަމެއް އޮންނާނެ ބާވައެވެ!

އިންސާނަކަށް ނުވެވޭތަނުގައި ސުންނީ ޝިޔާޢީ އަކަށް ވެވިދާނެތޯއެވެ. އެޒުވާބު މިވަގު ޖެއްސުމުގެ ބޭނުމަކީ ފިތުނަ ނޫން އެހެން ކޯއްޗެއްތޯއެވެ. އެހެނީ ރަސޫލާގެ ވަދާޢީ ޚުތުބާގައިވެސް ސުންނީ ޝިޢާ ވައްހާބީ މާލިކީ ވާހަކަ ވިދާޅުވެފައެއް ނެތެވެ. ތަކުރާރުކޮށް ރަސޫލާގެ ވަދާޢީ ޚުތުބާ އަޑުއައްސަވާ ލަމާތޯއެވެ.

ވިސްނަންވީ އެކަކަށްވުރެ އަނެކާ މޮޅުވާން ނުހައްދާ މިދީން (އިސްލާމް ދީން) ގަބޫލުކުރާ 1.4 ބިލިއަން މީހުން މިދުނިޔޭގައި ތިބިއިރު މަޒްހަބީ ތަފާތުތައް ގެނަސް ތިމާނޫން މީހުންނަކީ ކާފަރުން ކަމުގައި ބުނާހިސާބަށް ދުއްވާނުލުމެވެ. އެހެނީ މިއަދުގެ ގިނަ މުސްލިމުންނަށް ވުރެ ގަޒާގެ ޖަރީމާއާއި ދެކޮޅުހަދާ “ ކާފަރުން“ މަދެއްނޫނެވެ. ވީއިރު ތިބާގެ ޙާލާމެދު ވިސްނާލަމާ ތޯއެވެ.

  އަހަރެމެންގެ މިއުއްމަތަކީ އުއްމަތްތަކުގެ ތެރެއިން އެންމެ މާތް ހެޔޮ އުއްމަތެވެ. ޤުރުއާނާއި ސުންނަތުން މައްސަލަތަކާ އަރާރުންވުންތަކާއި ދެބަސްވުންތަކަށް ޙައްލު ހޯދެން އެބައޮތެވެ. ކޮންމެ މީހަކުވެސް ތިމާގެ ފުރާނަ އާ މުދަލާ އަބުރަށް ރައްކާތެރިވާ ފަދައިން އަދި އެހެން މީހުންގެ ފުރާނަ އާ މުދަލާ އަބުރަށް ރައްކާތެރި ވާށެވެ. އޭނޫން ގޮތަކުން ދުނިޔެ އަށް އަމާންކަމެއް ނެތެވެ. ﴿ قَالُوا سُبْحَانَكَ لَا عِلْمَ لَنَا إِلَّا مَا عَلَّمْتَنَا ۖ إِنَّكَ أَنتَ الْعَلِيمُ الْحَكِيمُ﴾

[ البقرة: 32]

މިވެސް އަޑުއަހާލާ: