ޔަމަނުގެ ހޫތީ މުޖާހިދުން އިޒުރޭލުގެ ވައިގެ މިސައިލްގެ ޑިފެންސް ފޫއަޅުވާލާފައިވާކަން އިޒްރޭލް ޑިފެންސް ފޯސް (އައިޑީއެފް) އިން އަންގާރަ ދުވަހު ކަށަވަރުކޮށްދީފިއެވެ.
އައިޑިއެފް އިން ބުނެފައިވަނީ، ގޮތްނޭނގޭ އެއްޗެއް އެއިލަތު ގެ އުތުރުން ފެނިފައިވާކަމުގެ ރިޕޯޓުތައް އާދީއްތަ ދުވަހު ލިބިފައިވާ ކަމަށާއި، އެއީ ރަތް ކަނޑާއި ދިމާއިން އައި ކްރޫޒް މިސައިލެއްކަން އެނގިފައިވާކަމަށެވެ.
މީގެ ކުރީން ހޫތީން ފޮނުވާފައިވާ މިފަދަ ހުރިހާ މިސައިލެއްވެސް އެރޯ އެކެއް ނުވަތަ ތިނެއް މިސައިލް ޑިފެންސް ނިޒާމުގެ އެހީގައި ގޮއްވާލާފައިވާއިރު، ސީރިއާއިން ފޮނުވާލި ކުޑަ މިސައިލެއް އެއިލަތަށް ވަދެ ކޮންމެވެސް ވަރެއްގެ ގެއްލުންތަކެއް ވެފައިވާކަން އައިޑީއެފް އިން ހާމަކޮށްފައިވެއެވެ.
އެހެންނަމަވެސް، މި ކްރޫޒް މިސައިލް ވެއްޓިފައިވަނީ ހުސް ބިމަކަށް ކަމުން، އެއްވެސް އިމާރާތަކަށް ގެއްލުންވެފައިނުވާކަން ފާހަގަކޮށް އައިޑިއެފް އިން ބުނީ، އެ މިސައިލުން ބޮޑެތި ގެއްލުންތަކެއް ވުމުގެ ފުރުސަތު އޮތްކަމަށެވެ.
