ޒަމާނީ “ސްމާޓް” ވަސީލަތްތަކުގެ އެހީގައި ތުރުކީގެ ދަތުރުފަތުރުކުރުމުގެ ނިޒާމު އިތުރަށް ފުރިހަމަކޮށް، އެއްތަނުން އަނެއްތަނަށް ކުރާ ދަތުރުތައް ފަސޭހަކުރުމަށްޓަކައި މަސައްކަތްތަކެއް ކުރަމުން ގެންދާކަން އެގައުމުގެ ޖެނެރަލް ޑިރެކްޓަރޭޓް އޮފް ހައިވޭސް އިން ހާމަކޮށްފިއެވެ. 

ކުރިއަށް އޮތް އަހަރުތަކަށް އެ ވުޒާރާއިން ހަމަޖައްސާފައިވާ ތަދުބީރީ ޕްލޭންތަކުގެ މައުލޫމާތު ހިއްސާކުރަމުން ޖެނެރަލް ޑިރެކްޓަރޭޓުން ބުނީ މި ސިޔާސަތުތަކުގެ ދަށުން ދަތުރުތަކަށް ހޭދަކުރަާ ވަގުތު ބޮޑުތަނުން މަދުކުރެވިގެން ދާނެކަމަށާއި، ޓްރެފިކްގެ ރައްކާތެރިކަން އިތުރުކޮށް، މަގުތަކުގެ ހާލަތު ރަނގަޅުކުރުމުގެ އިތުރުން، ފެހި ހަކަތަ ބޭނުންކުރެވޭ މިންވަރު ވެސް އިތުރުކުރެވޭނެ ކަމަށެވެ. 

އަނަޑޮލޫ އޭޖެންސީ (އޭއޭ) އަށް ދިން ބަޔާނެއްގައި ޓްރާންސްޕޯޓް އެންޑް އިންފްރާސްޓްރަކްޗަރ އާއި ބެހޭ ވަޒީރު އްބްދުލްޤާދިރް އުރަލޮގްލު ބުނެފައިވަނީ ދަތުރުފަތުރުގެ ނިޒާމަށް އައިސްފައިވާ އީޖާދީ ހެޔޮބަދަލުތަކާއި ޓެކްނޮލޮޖިކަލް ވަސީލަތްތައް ބޭނުންކޮށްގެން މިޕްލޭންގެ ދަށުން ދަތުރުފަތުރުކުރުމުގެ ކަންކަން އިތުރަށް ފުރާފުރިހަމަކުރެވިގެން ދާނެކަމަށް ގަބޫލުކުރާކަމަށެވެ. 

މިގޮތުން، ދަތުރުގެ އަވަސްކަމާއި، ލުއިފަސޭހަކަމާއި، ތިމާވެށްޓާއި ރަހުމަތްތެރިކަމަށް ރިއާޔަތްކޮށް ކުރެވޭ އީޖާދުތަކާއެކު ދަތުރުކުރުން ފަސޭހަ ވެފައިވާކަން ފާހަގަކޮށް އުރަލޮގްލޫ ބުނީ “ފާއިތުވެދިޔަ 21 އަހަރުދުވަހުގެ ތެރޭގައި ދަތުރުފަތުރުގެ ނިޒާމު ފުރިހަމަކުރުމަށްޓަކައި ކުރެވުނު ރަނގަޅު އިންވެސްޓްމަންޓްތަކާއެކު އަހަރެމެންގެ ގައުމަކީ މިކަމުގައި ސަރަހައްދީ ލީޑަރެއް” ކަމަށެވެ.