އެކި ގައުނުތަކުން ޣައްޒާއަށް ފޮނުވާ އިންސާނީ އެހީ ވެއްދުމަށް ހުރަސް އަޅާނަމަ އިޒްރޭލާއި އެކުގައި އޮންނަ އެއްގަމު ވިޔަފާރީގެ ބަނދަރު ބަންދުކުރާނެ ކަމަށްބުނެ އެކުވެރި އަރަބި އިމާރާތުން އިޒްރޭލުގެ ބޮޑުވަޒީރު ބެންޖަމިން ނަަތަންޔާހޫއަށް އިންޒާރު ދީފިއެވެ.
މި އެއްގަމު ވިޔަފާރި ބްރިޖަކީ އިޒްރޭލަށް ބޭނުންވާ ކާނާއާއި އެހެންވެސް ޒަރޫރީ ސާމާނު ޓެލްއަވީވަށް އެތެރެ ކުރުމަށް ބޭނުންކުރާ މުހިންމު ބްރިޖެކެވެ.
އިޒްރޭލުގެ އައި 24 ނިއުސްއިން ގިނަ މަސްދަރުތަކަކާއި ހަވާލާދީ ރިޕޯޓުކޮށްފައިވާ ގޮތުގައި ޣައްޒާއަށް އިންސާނީ އެހީ ވެއްދުމަށް ހުރަސްއަޅާނީތޯ ނުވަތަ ޓެލްއަވީވްއަށް ޒަރޫރީ ސާމާނު ވައްދާ އެއްގަމު ބްރިޖް ބަންދުކުރާނީތޯ ޚިޔާރުކުރުމަށް ޔޫއޭއީއިން ނަތަންޔާހޫއަށް ވަނީ އަންގާފައެވެ.
މިގޮތުން، އެއްގަމު ވިޔަފާރީގެ މި ބްރިޖް އެކުލަވާލާފައިވަނީ ރަތްކަނޑުން ދަތުރުކުރާ އިޒްރޭލުގެ އުޅަނދުފަހަރާއި އިޒްރޭލާއި އިޒްރޭލުގެ ބައިވެރިންގެ މަސްލަހަތު އޮންނަ އުޅަނދުފަހަރަށް ޔަމަނުގެ ހޫތީ މުޖާހިދުން ހަމަލާ ދޭން ފެށުމާއެކު އިޒްރޭލަށް ބޭނުންވާ ތަކެތި އެތެރެކުރުމަށް ދަތިވުމާއި ގުޅިގެން އެކަން ފޫބެއްދުމަށްޓަކައި މިދިޔަ ޑިސެމްބަރު މަހުގެ ތެރޭގައެވެ.
އަދި ހޫތީންގެ ފަރާތުން އިޒްރޭލަށް ކުރިމަތިވާ މުދަލުގެ ދަތިކަން ފޫބެއްދުމަށް ޔޫއޭއީ އާއި، ސައުދީ އަރަބިއާއާއި، ޖޯޑަނުން ގެންދަނީ އިޒްރޭލަށް ވާގިވެރި ވަމުންނެވެ.
