އިސްލާމޯފޯބިއާ ނުވަތަ މުސްލިމުންނަށް ބިރުވެތިވެ، ނަފްރަތުކުރުމުގެ ސަބަބުން ހަމަނުޖެހުން އުފެދި، ޒުވާބުކުރުމާއި، އަނިޔާވެރިކަމާއި، ބިރުވެރިކަމުގެ މާހައުލެއް، އޮންލައިންކޮށް އަދި އަސްލު ދުނިޔޭގައިވެސް އުފެއްދުމުގެ އަމަލުތަކަކީ މުސްލިމަކަށް ވީތީ ތަފާތުކުރުމުގެ ގޮތުން ފަތުރާ ސިޔާސީ، ދީނީ އަދި ފިކުރީ ހަނގުރާމައެއްގެ ހަތިޔާރެކެވެ.
އިސްލާމޯފޯބިއާ ހަގީގަތުގައި މާނަކުރަނީ މުސްލިމެއްކަން އެނގޭ ހިސާބުން ފެށިގެން މީހަކާއި ދޭތެރޭގައި އަމަލުކުރާ އުސޫލު ބަަދަލުކޮށް، ނަސްލީ ތަފާތުކުރުން އުފައްދައި، މުސްލިމުންގެ ދީނާއި، ޘަގާފަތާއި އާދަކާދައަކީ ހުޅަނގުގެ ވަށްޓަފާޅިއަށް ހުރި ނުރައްކަލެއްކަމަށް ދެއްކުމެވެ.
މާޗް 15 ވަނަ ދުވަހު އެކުވެެ ދައުލަތުން އިސްލާމޯފޯބިއާއާއި ހަނގުރާމަކުރުމުގެ ބައިނަލްއަޤްވާމީ ދުވަހެއް ފާހަގަކުރިއިރު، ޔުނައިޓެޑް ނޭޝަންސްގެ ސެކްރެޓަރީ ޖެނެރަލް އެންޓޯނިއީ ގުޓެރެސް ވަނީ މުސްލިމުންނާއި ދެކޮޅަށް ދުނިޔޭގައި ފަތުރާ ނަފުރަތާއި ދެކޮޅަށް ތަކުރާރުކޮށް އަޑު އުފުލާފައެވެ. އޭނާ ބުނެފައިވަނީ، މިފަދަ އަމަލުތަކުގެ ސަބަބުން ޔަހޫދީންނާއި ކްރިސްޓިއަން މުޖުތަމައުތަކަށް ވެސް އޭގެ އަސަރު ކުރާނެކަމަށެވެ.
“އޮންލައިން ވިއުގަ ތަކުގައި ދައްކާ ނަފްރަތުގެ ވާހަކަތަކުގެ ސަބަބުން އަނިޔާވެެިކަމުގެ ވެއްޓެއް އުފެދިގެން އެބަދޭ.” މުނާސަބަތާއި ގުޅިގެން އޭނާ ބުނެފައިވެއެވެ.
މިގޮތުން، އިސްލާމޯފޯބިއާއާއި ދެކޮޅަށް އެކުވެރި ދައުލަތުން ކުރާ މަސައްކަތުގެ ދަށުން “ޔޫއެން ސްޕެޝަލް އެންވޯއީ ޓު ކޮމްބެޓް އިސްލާމޯފޯބިއާ” ގެ މަގާމު އުފެއްދުމަށްޓަކައި ޚާއްސަ ރިޒޮލިއުޝަނެއް އެކުލަވާލުމަށް ވަނީ ތައްޔާރުވެފައެވެ.
ގިނަ ގައުމުތަކެއްގެ ސަރުކާރުން މުސްލިމަކަށް ވީތީ ތަފާތުކުރުމާއި ނަފްރަތުވުމުގެ އަމަލުތައް ހުއްޓުވުމަށްޓަކައި ގަވާއިދުތައް ހަދައި ފިޔަވަޅުތައް އަޅާފައިވާއިރު، ބައިނަލްއަޤްވާމީ މިފަދަ ދުވަހެއް މާޗް 15 ގައި ފާހަގަކުރުމަށް އެދި އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ 60 ގައުމަކުން ހުށައެޅި ރިޒޮލިއުޝަން ޔޫއެންގެ ޖެނެރަލް އެސެމްބްލީއިން ވެސް ވަނީ ބަލައިގަނެފައެވެ. މިގޮތުން، އޯއައިސީއިން ހުށައެޅި ލިޔުމުގައި ބުނެފައިވަނީ، ޓެރަރިޒަމާއި، ހަރުކަށިކަމުގެ އަމަލުތަކަކީ ވަކި ދީނަކަށް، ގައުމިއްޔަތަކަށް ނުވަތަ ނަސްލަކަށް ނިސްބަތްކުރެވިގެންވާނެ އެއްޗެއް ނޫންކަމަށާއި، ދީނީ އަދި ނަސްލީ ސިންދަފާތަށާއި
އިންސާނީ ހައްގުތަކަށް ރިއާޔަތްކޮށް އެކަށޭނަ މަޝްވަރާތައް ކުރަންޖެހޭކަމަށެވެ.
