ގޫގްލް އިން އެންޑްރޮއިޑް ފޯނުތަކަށް ތައްޔާރުކުރި އައު އަޕްޑޭޓާއެކު، ގޫގްލްގެ އޭއައި، ބާޑްއިން ފޯނުގައި ހުންނަ ހުރިހާ މެސެޖެއް ކިޔާނެކަން ހާމަވެއްޖެއެވެ.

މެސެޖަށް ބާޑް ގެންނައިރު، ބާޑްއަކީ ޗެޓްޖީޕީޓީއާއި އެއްގޮތް ގޮތެއް ހުންނަ ޔޫޒަރ އިންޓަފޭސްއެކެވެ. ބާޑްއިން ބުނާނީ އެއަކީ ”އޭއައި އެސިސްޓެންޓެއް“ ކަމަށެވެ. ”މެސެޖު ކުރުމުގެ ތަޖުރިބާ ބަދަލުކޮށްލައި، މައުލޫމާތު ފޯރުކޮށްދިނުމާއި، މުވާސަލާތުކުރުން ފުރިހަމަ ކޮށްދޭނެ ޕާސަނަލް އޭއައި އެސިސްޓެންޓެއް“ ކަމަށް ބާޑް ބުނެފައިވެއެވެ.

އެހެންނަމަވެސް، ބާޑް މެދުވެރިކޮށް މެސެޖުކުރުމުގެ ތަޖުރިބާ އިތުރަށް ފުރިހަމަ ކުރުމަށްޓަކައި ފޯނުގެ ވެރިފަރާތުން މެސެޖުކުރުމުގައި ގެންގުޅޭ ގޮތްގަނޑާއި، ރާގާއި، ޝައުގުވެރިކަން ހުންނަ ކަންކަން ދަސްކުރުމަށްޓަކައި އޭނާ މެސެޖުތަކުން ދައްކާފައި ހުންނަ ވާހަކަތަކާއި، ފޯނަށް ލިބިފައި ހުންނަ މެސެޖުތައް ބަލައި، ވަކި ވަކި ފަރާތްތަކާއި ވާހަކަދައްކާފައި ހުންނަ ގޮތްވެސް ދިރާސާކުރާނެކަމަށް ބާޑް އިން ބުނެއެވެ. އެއީ ކޮންމެ މީހަކާވެސް ވާހަކަދައްކާފައި ހުންނަ ގޮތައް ބަލައި އެމީހަކާ ހަމަ އެގޮތަށް ވާހަކަދެއްކުމަށްޓަކައި ކުރާ ކަމެއްކަމަށް ގޫގްލް އޭއައި އިން ބުނެއެވެ.

އެޕް ޕާމިޝަންތަކާއި، ޕްރައިވަސީ ލޭބަލްތަކަށް އަދިވެސް ނުހޭނޭ ސްމާޓްފޯނު ބޭނުންކުރާފަރާތްތަކަށް މިއީ ހަޖަމްކުރެވޭނެ ކަމެއްކަމަށް ހިއެއްނުވެއެވެ. ވީމާ، މީހުން ދައްކާ ވާހަކަތައް ހުއްދައާއި ނުލައި އަޑުއަހާކަމަށް ބުނާ ވާހަކަތަކާއި، މީގެކުރިން އޭއައި ޕްލެޓްފޯމްތަކުން މީހުންގެ ޕްރައިވެސީ ގެއްލުވާލާފައިވާކަމަށް ބުނާ އެހެނިހެންވެސް ކަންކަމުން ގޫގްލް އޭއައި ބަރީއަވެގެންވާކަން އެންޑްރޮއިޑް ފޯނު ބޭނުންކުރާ ފަރާތްތަކަށް ވިސްނައިދިނުމަކީ ގޫގްލްއަށް އޮތް އެންމެ ބޮޑު ގޮންޖެހުމެވެ.

27 ޖަނަވަރީގައި ގެނައި މި އަޕްޑޭޓުގައި ދެން އޮތް އަނެއް ވާހަކައަކީ، ބާޑްއަށް ފޮނުވާ މެސެޖް ރިކުއެސްޓްތަކުގެ މައުލޫމާތު ކްލައުޑަށް އަޕްލޯޑުވާކަމާއި، އެމައުލޫމާތަކީ ޓްރެއިނިންގްތަކުގައި ބޭނުންކުރެވޭ އެއްޗަކަށްވުމެވެ. ކާކުގެ މައުލޫމާތުކަން ނޭނގޭގޮތަށް މީހުންނަށް ޓްރެއިނިން ދިނުމަށްޓަކައި މިމައުލޫމާތު ބޭނުންކުރިނަމަވެސް، 18 މަސް ދުވަސްވާންދެން ކްލައުޑްގައި މި ހުރިހައި މައުލޫމާތެއް ރައްކާކުރެވެއެވެ. އަދި އޭއި ޑިސޭބްލް ކުރިނަމަވެސް މި މައުލޫމާތު ނުފުހެވުނުނަމަވެސް، މެނުއަލްކޮށް ފުހެލުމުގެ ފުރުސަތު އޮންނާނެއެވެ.

އެގޮތުން، ބާޑްއަށް ފޮނުވާ ހުރިހާ މެސެޖް ރިކުއެސްޓަކީ ސީދާ ގޫގްލްއަށް ފޮނުވާ މެސެޖުތަކެކެވެ. ޗެޓްޖީޕީޓީފަދަ އޭއައި ޗެޓްބޮޓްތަކާއި ކުރާ ހުރިހާ ސުވާލަކީވެސް ސިއްރުކުރެވިފައި އޮންނާނެ މައުލޫމާތު ނޫންކަން އެނގޭ އުސޫލުން ބާޑްއަށް ދެވޭ މައުލޫމާތަކީވެސް އެފަދަ މައުލޫމާތަށްވުން ގާތްކަން ހަނދާން ބެހެއްޓުން މުހިންމެވެ.

މިކަމުގެ އެންމެ ރައްކާތެރި ގޮތަކަށް ވާނީ ފޯނުގައި އޮންނަ އޭއައި އަކުން މެސެޖުތައް ޕްރޮސެސްކުރުމެވެ. އެއިރުން ހުރިހާ މައުލޫމާތެއް ހުންނާނީ ފޯނުގައެވެ. ކްލައުޑެއްގައެއް ނޫނެވެ. އައިފޯނާއި އެންޑްރޮއިޑާއި ތަފާތުވާގޮތަކީ މިއީއެވެ. އެޕަލްގެ އޮންޑީވައިސް އެނެލިސިން ގޫގްލްއަށްވުރެ ވަރުގަދަކަން ފާހަގަކުރެވިފައިވީ ނަމަވެސް، އެޕަލްއިން ގެންނަ އައު އަޕްޑޭޓުތަކާއެކު، ފޯނުގައި ހުންނަ މައުލޫމާތު ފޯނުގައި ހިފެހެއްޓުމަށް ކުރާ މަސައްކަތް އިސާހިތަކު ދޫކޮށްލާނެކަމަށް ލަފާކުރެވެއެވެ.

މެސެޖްކުރުމަށް އޭއައި ބޭނުންކުރަން ފެށުމާއެކު، އެންޑްރޮއިޑާއި އައިއޯއެސް ވެސް ހިމެނޭގޮތަށް ހުރިހާ ޑިވައިސްއެއްގެ މެސެޖިންގް ތަޖުރިބާއަށް އިންޤިލާބެއް އަންނާނެކަމީ ޝައްކެއް އޮތްކަމެއް ނޫނެވެ. އަދި ގޫގްލްއާއި އެޕަލްއާއި މެޓަ ފަދަ ކުންފުނިތަކުގެ މެދުގައި އޮންނަ ވާދަވެރިކަން ދެގުނައަށް ބޮޑުވެގެންދާނެކަންވެސް ކަށަވަރެވެ.

ގޫގްލް މެސެޖަށް ބާޑް ގެންނާނެ ސީދާ ތާރީޚެއް ކަނޑައަޅާފައިނުވިނަމަވެސް، 2024 ވަނަ އަހރުގެ ތެރޭގައި އެބަދަލު ގެންނާނެކަމަށް ވަނީ ލަފާކޮށްފައެވެ. ވީމާ، ބާޑް ލޯންޗުކުރުމަށްފަހު، ފޯނުގެ މެސެޖުތައް ހުޅުވާލާ ކޮންމެފަހަރަކު އެއަށް ސަމާލުވާށެވެ. މެސެޖް އެނަލިސިސް ބޭނުންކުރުމާއި ނުކުރުމަކީ ފޯނުގެ ވެރިފަރާތުގެ އަތް މަތީގައި އޮތް ކަމަކަށްވާއިރު، އަމިއްލަ ނަފްސަށް އޮތް އެންމެ ރައްކާތެރިގޮތަކަށް އެނިންމުން ނިންމާށެވެ.

ބާޑް ބޭނުންކުރުމުގައި އެންމެ ރައްކާތެރި ގޮތް ބޭނުންކުރާށެވެ. ބާޑްއަކީ ރަހުމަތްތެރިއެއް ނޫނެވެ. އެއީ ޔޫޒަރ އިންޓަފޭސްއެއްގެ ސިފައިގައި އޮތް ދުނިޔޭގެ އެންމެ ވަރުގަދަ އެންމެ އަގުބޮޑު ޓްރެކިންގް އަދި އެޑްވަޓައިޒިންގް މެޝިންއެވެ.