އިންޑިއާގެ އުތުރގެ ފަރުބަދަތަކަކުން ބިންގަނޑު ކަނޑައިގެންގޮސް އެސަރަހައްދުގެ އެތައް އިމާރާތެއް ސުންނާފަތިވެއްޖެއެވެ. ހިމާލަޔާސްގައި ހިނގަމުންދާ މި ކާރިސާތަކުގައި އެތައް ބަޔަކުވަނީ މަރުވެސް ވެފައެވެ.
ހިމާޗަލް ޕްރަދޭޝްގެ ކުއްލޫ ސަރަހައްދުގައި ބުރާސްފަތި ދުވަހު ހިނގައިދިޔަ ބިންގަނޑު ކެނޑުމުގެ ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ. އެސަރަހައްދުގައި ދިރިއުޅެމުންދިޔަ މީހުން އެހެން ރައްކާތެރި ސަރަހައްދުތަކަށް މާކުރީން ބަދަލުކުރެވިފައިވާކަމަށް އެތަނުގައި ހަރަކާތްތެރިވާ އޮފިޝަލުންވަނީ ރިޕޯޓުކޮށްފައެވެ.
”އެ ހިސާބަކީ ނުރައްކާ އޮތް ސަރަހައްދެއްކަން ދެނެގަނެ، ހާދިސާ ހިނގުމުގެ ދެދުވަސްކުރިން ސަރުކާރުން އެ އިމާރާތުގައި ދިރިއުޅުނު ފަރާތްތައް ރައްކާތެރި ހިސާބުތަކަށް ވަނީ ބަދަލުކޮށްފަ.“ އެ ސްޓޭޓްގެ ޗީފް މިނިސްޓަރު، ސުކްވިންދަރް ސިންހް ސުކޫ، ކުރީގެ ޓްވިޓާ، ”އެކްސް“ގައި ޝާއިއުކުރި ޕޯސްޓެއްގައި ލިޔެފައިވެއެވެ.
އޭނާ ބުނެފައިވަނީ، ހަލާކުވި އިމާރާތަކީ ”ބޮޑު ސިނާއީ އިމާރާތެއް“ ކަމަށެވެ.
